13 އަހަރު ކުއްޖާގެ މަރުގެ ހާދިސާ: 17 އަހަރުގެ ކުއްޖާގެ ބަންދަށް އިތުރު 13 ދުވަސް
ހުޅުމާލޭ ދެވަނަ ފިޔަވަހީގައި މަރައިލައިފައި އޮއްވާ ފެނުނު އުމުރުން 13 އަހަރުގެ ކުއްޖާގެ މަރުގެ މައްސަލައިގައި ހައްޔަރުކުރި އުމުރުން 17 އަހަރުގެ ކުއްޖާގެ ބަންދަށް އިތުރު 13 ދުވަސް ޖަހައިފިއެވެ.
މި މައްސަލައިގައި ހައްޔަރު ކުރި ކުއްޖާގެ ބަންދަށް ކުރިން 15 ދުވަސް ޖަހައިފައި ވަނީ މިދިޔަ މަހުގެ 22 ވަނަ ދުވަހުގައެވެ. ކުއްޖާގެ ބަންދަށް 13 ދުވަސް އިތުރު ކޮށްފައި ވަނީ، އޭނާގެ ބަންދުގެ މުއްދަތު ހަމަވުމުން ބަންދާ މެދު ގޮތެއް ނިންމުމަށް މިއަދު ކޯޓަށް ހާޒިރު ކުރުމުން ކަމަށް ފުލުހުން ވިދާޅުވިއެވެ.
ކުޑަ ކުއްޖަކު ރަހީނުކޮށް މަރައިލި މައްސަލައިގައި އުމުރުން 27 އަހަރުގެ ފިރިހެނެއް ވެސް ހައްޔަރު ކުރިއެވެ. އެ މީހާ ހުރީ ޝަރީޢަތް ނިމެންދެން ބަންދު ކޮށްފައެވެ.
އުމުރުން 13 އަހަރުގެ އެ ކުއްޖާ މަރައިލައިފައި އޮއްވާ ފެނިފައި ވަނީ ހުޅުމާލޭ ދެވަނަ ފިޔަވަހީގެ މޫދުންނެވެ. އެ މައްސަލަ ފުލުހުން ތަހުގީގު ކުރަމުން އަންނަ އިރު ކުއްޖާގެ ހަށިގަނޑު ވަނީ ޕޯސްޓްމޯޓަމް ހެދުމަށް އިންޑިއާއަށް ފޮނުވައިފައެވެ.
