އިންޑިއާ ހައި ކޮމިޝަން ގޮއްވައިލާނެ ކަމަށް ބުނިމީހާގެ ބަންދަށް އިތުރު 3 ދުވަސް
ރާއްޖޭގައި ހުންނަ އިންޑިއާ ހައި ކޮމިޝަން ގޮއްވައިލާނެ ކަމަށް ބުނެ ޓްވީޓްކުރި ކަމުގެ ތުހުމަތުގައި ހައްޔަރުކުރި މީހާގެ ބަންދަށް އިތުރު ތިން ދުވަސް ޖަހައިފިއެވެ.
"ރޮޔަލް ހުސެން ތަކުރު" ނަމުގައި ހަދައިފައިވާ ޓްވިޓާ އެކައުންޓަކުން އިންޑިއާ ހައިކޮމިޝަން ގޮއްވައިލާނެ ކަމުގައި އިންޒާރު ދިނުމުގެ ސަބަބުން ބަންދުގައި ބަހައްޓައިގެން ތަހުގީގު ކުރިއަަށް ގެންދަން ކްރިމިނަލް ކޯޓުން އިތުރު ތިން ދުވަސް އިއްޔެ ޖަހައިދީފައި ވަނީ މުހައްމަދު އިނާދު ނަމަކަށް ކިޔާ އުމުރުން 42 އަހަރުގެ މީހަކަށެވެ. މިއީ މީނާގެ ބަންދަށް މުއްދަތު ޖެހި ދެވަނަ ފަހަރެވެ.
އިންޑިއާ ހައި ކޮމިޝަން ގޮއްވައިލާނެ ކަމުގެ އިންޒާރު ދިން މައްސަލައާ ގުޅިގެން ފުލުހުން ނެރުނު ބަޔާނެއްގައި ބުނެފައި ވަނީ ސޯޝަލް މީޑިއާ އާއި އެ ނޫން ވެސް ވަސީލަތްތައް ބޭނުންކޮށްގެން، މީހުންނަށް އަނިޔާވެރިވުމަށާއި މުދަލާއި ތަކެއްޗަށް ގެއްލުން ދިނުމަށް ގޮވައިލުމާއި އެފަދަ ކަންކަމަށް ހިތްވަރު ދޭ މީހުންގެ މައްސަލަަތައް ބަލަައި ފިޔަވަޅު އަޅާނެ ކަމަށެވެ.
މިގޮތުންް ރައްޔިތުންގެ މަޖިލިސް ގޮއްވާލާނެކަމުގެ އިންޒާރު ދިން މީހަކާއި މުލީއާގެ ގޮއްވާލާނެ ކަމަށް ބުނި މީހެއްވެސް މީގެ ކުރިން ވަނީ ހައްޔަރުކޮށްފައެވެ. އަދި މިފަދަ މައްސަލަަތައް ސީރިއަސް މައްސަލަތަކުގެ ގޮތުގައި ހާއްސަ ސަމާލުކަމެއް ދީގެން ފުލުހުން ގެންދަނީ ބަލަމުންނެވެ.
