މާލޭގެ މަސްމާރުކޭޓުގެ އިމާރާތުގެ މަތީގައި ގަވާއިދާ ޚިލާފަށް ހިންގާ ތަންތަން ހުސްކުރަން އަންގައިފި
މާލޭގެ ރޯމަސް މާރުކޭޓް އިމާރާތުގެ މަތީގައި ގަވާއިދާ ޚިލާފަށް ހިންގާ ތަންތަން ހުސްކުރަން މާލޭ ސިޓީ ކައުންސިލުން އިއްޔެ އަންގައިފިއެވެ.
ކައުންސިލުން ނެރުނު އިއުލާނެއްގައި ބުނީ، މަސް މާރުކޭޓުގެ މަތީގައި ހުރި "ލިސްޓޯ ފިހާރަ" ފިޔަވައި އެހެން ހުރިހާ ތަނަކަށް މުދަލާއި ތަކެތި ވައްދައިފައިވާ ފަރާތްތަކުން، އެ ތަންތަނުގައި ހުރި އެއްޗެހި އެންމެ ލަސްވެގެން މި މަހުގެ 28 ގެ ކުރިން ނަގައި ހުސްކުރަން އަންގާ ކަމަށެވެ.
އަދި އެ މުއްދަތުގައި ނުގެންގޮސް ހުންނަ ތަކެއްޗާ މެދު އެ އިދާރާއިން ނިންމާ ގޮތެއްގެ މަތިން އަމަލުކުރެވޭނެ ކަމަށާއި މިކަމުގެ ސަބަބުން އެއްވެސް ފަރާތަކަށް ލިބޭ ގެއްލުމަކަށް އެ އިދާރާއިން ޒިންމާ ނުވާނެ ވާހަކަ ވެސް ސިޓީ ކައުންސިލުން އިއުލާންކޮށްފައި ވެއެވެ.
މީގެ އިތުރުން މާލޭ ސީޓީ ކައުންސިލުން ވަނީ އެ އިދާރާގެ ބެލުމުގެ ދަށުގައިވާ މާލޭ ރޯމަސް މާރުކޭޓުގެ މަސްވިއްކަން، މަސްބަހައްޓާ އަށިތަކުގެތެރެއިން އެ ކައުންސިލުން ކަނޑައަޅާ 02 އަށި، މަސައްކަތްކޮށްދޭ ފަރާތަށް 01 އަހަރު ދުވަހަށް ދިނުމުން، މާރުކޭޓުގައި މިހާރު ހުރި އަށިތައް އެ ކައުންސިލުން ދޭ މަޢުލޫމާތާ އެއްގޮތަށް އަމިއްލަ ތަކެތީގައި މަރާމާތުކޮށްދޭނެ ފަރާތެއް ހޯދަން ވެސް އިއުލާންކޮށްފައެވެ.
