ކާމިޔާބުކަމާ އެކު "އަހަރެމެން ވެސް ފަލަސްތީނާ އެކު" ނިންމައިލައިފި
އިޒްރާއީލުގެ ޔަހޫދީން ފަލަސްތީނުގެ ބިމުގައި ހިންގަމުންދި ޔަ ޖަރީމާތަކާ ގުޅިގެން ފަލަސްތީނުގައި ހާލުގައި ޖެހިފައިވާ އެތައް ހާސް މުސްލިމުންނަށް އެހީވުމުގެ ގޮތުން ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިސްވެ އޮވެ ކޮލެޖު/ ޔުނިވަރސިޓީގެ ދަރިވަރުން އެކަތިގަނޑަކަށްވެ ހިންގި ”އަހަރެމެން ވެސް ފަލަސްތީނާ އެކު“ ފަންޑް ރައިސިންގ އިވެންޓު ކާމިޔާބުކަމާ އެކު ނިންމައިލައިފިއެވެ.
މާސީއާ ގުޅިގެން މަތީ ތައުލީމު ހާސިލްކުރާ ދަރިވަރުން ހިންގި މި ހަރަކާތުގައި، ދިވެހިރާއްޖޭގެ ގައުމީ ޔުނިވަރސިޓީ (އެމްއެންޔޫ)، އިސްލާމިކް ޔުނިވަރސިޓީ އޮފް މޯލްޑިވްސް (އައިޔޫއެމް)، ވިލާ ކޮލެޖު، މެޕްސް ކޮލެޖު، އެމްއައި ކޮލެޖު، ސައިރެކްސް ކޮލެޖު، ކްލިކް ކޮލެޖު، އަދި އެވިޑް ކޮލެޖުން ވަނީ ބައިވެރިވެފައެވެ.
މި ހަރަކާތް ނިންމާލުމުގެ ރަސްމިއްޔާތުގައި ވާހަކަ ދައްކަވަމުން އެމްއެންޔޫއެސްޔޫގެ ރައީސް އަބްދުﷲ ޝަހުނީޒް ވިދާޅުވީ، މިއީ ބުރަ ބޮޑު މަސައްކަތެއް ކަމަށާއި، އެހެން ނަމަވެސް ފަލަސްތީނުގެ މުސްލިމުންގެ ހައްގުގައި މި ކުރެވުނު މަސައްކަތަކީ ކުޑަ މަސައްކަތެއް ކަމަށެވެ. އަދި މި މަސައްކަތުގައި ހަރަކާތްތެރިވި ހުރިހާ ކޮލެޖު/ޔުނިވަރސިޓީ ދަރިވަރުންނަށް ޝަހުނީޒް ވަނީ ޝުކުރު އަދާކުރައްވައިފައެވެ.
ޝަހުނީޒް ވިދާޅުވީ، މި ހަރަކާތް ކުރިޔަށް ގެންދިޔައިރު، ކޮވިޑް-19ގެ ހާލަތު ގޯސްވުމުން އެކަމުގެ އަސަރުކުރި ކަމަށާއި މި ކެމްޕޭން ދިގު ދެމިގެން ދިޔައީ ކޮވިޑްގެ ހާލަތުގައި ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ކަނޑައަޅައިފައިވާ ގައިޑްލައިންތަކާ އެއްގޮތަށް ކުރިޔަށް ގެންދިޔުމުން ކަމަށެވެ.
”މިއީ ހަގީގަތުގައި ބުރަ ބޮޑު މަސައްކަތެއް. އެހެން ނަމަވެސް ފަލަސްތީނު ރައްޔިތުންގެ ހައްގުގައި އަޅުގަނޑުމެންނަށް މިކުރެވުނީ ކުޑަ މިންވަރެއް. މިފަދަ ބޮޑު ހަރަކާތެއް ކުރިޔަށް ގެންދިޔުމުގައި ގިނަ ގޮންޖެހުންތަކެއް ވެސް ދިމާވި. މި ހަރަކާތަށް އެހީވެދެއްވި ދިވެހީންނާއި ބިދޭސީންނަށް ހިތުގެ އެންމެ ފުންމިނުން ޝުކުރުއަދާ ކުރަން.“ އެމް.އެން.ޔޫ.އެސް.ޔޫގެ ރައީސް އަބްދުﷲ ޝަހުނީޒް ވިދާޅުވިއެވެ.
މެއި މަހުގެ 19 ވަނަ ދުވަހު ފެށި މިހަރަކާތް ފެށުމުގެ ގޮތުން، މި ހަރަކާތުގައި ހަރަކާތްތެރިވާ ދަރިވަރުންނަށް ވަނީ ޝެޝަންތަކެއް ނަގައިދީފައެވެ. މި ޝެޝަންތައް ނަންގަވައިދެއްވީ، އައްޝެއިޚް އަޙްމަދު ސަމީރު ބިން އިބްރާހީމް އަދި އައްޝެއިޚް މުޖްޠަބާ ޙަމީދުއެވެ.
އެއަށްފަހު މާލޭ ސިޓީގެ އެކި ސަރަހައްދުތަކުގައި ފަންޑު ފޮށި ބަހައްޓައިފައިވެއެވެ. އަދި ޓީޝާޓު ވިއްކުމަށް ޕްރީ އޯޑަރ ކުރުމަށް ސޯޝަލް މީޑިއާގައި ކެމްޕޭނެއް ވެސް ހިންގިއެވެ. ކޮވިޑްގެ ފުރަބަންދަށް ފަހު، ހަރަކާތްތައް އިތުރަށް ވަރުގަދަ ކުރުމުގެ ގޮތުން ހަފްތާ ބަންދުގައި މާލޭ ސިޓީގެ އެކި ސަރަހައްދުތަކުގައި ފަންޑް ފޮއްޓާ އެކު ޓީޝާޓު ވިއްކުމުގެ ހަރަކާތްތަކެއް ވަނީ ބާއްވައިފައެވެ. އެ ހަރަކާތްތަކުގައި ޓީޝާޓުގެ އިތުރުން ކާބޯތަކެތި ވެސް ވިއްކައިފައިވެއެވެ.
މި ހަރަކާތްތަކުން ޖުމްލަ 125.000.00 (އެއްލައްކަ ފަންސަވީސް ހާސް ސުންލާރި) ވަނީ ލިބިފައެވެ.
