ސަލްމާން މިސްކިތް ހުޅުވުން އަވަސްކޮށްދޭން ރައީސަށް އަނެއްކާ ވެސް އެދެފިން: މުޢިއްޒު
މާލޭގައި އަޅައިފައިވާ ކިންގު ސަލްމާން މިސްކިތް ހުޅުވުން އަވަސް ކުރުމަށް ރައީސް އިބްރާހިމް މުހައްމަދު ސޯލިހު އަރިހުން އެދިފައިވާކަމަށް މާލޭ މޭޔަރު ޑރ. މުހައްމަދު މުޢިއްޒު ވިދާޅުވެއްޖެއެވެ.
މާލޭސިޓީގެ ރައްޔިތުންނާ ބައްދަލުކުރުމަށް މާލޭ ސިޓީ ކައުންސިލުން ސިލްސިލާކޮށް ބާއްވާ ބައްދަލުވުންތަކުގެ ތެރެއިން ރޭ ހެންވޭރު ރައްޔިތުންނާ އެކު ބޭއްވި ބައްދަލުވުމުގައި ވާހަކަފުޅު ދައްކަވަމުން މޭޔަރ ވިދާޅުވީ އެ މިސްކިތް ހުޅުވުން ލަސްވަނީ މިސްކިތް ހުޅުވަން އަންނަ ސައުދީގެ ވަފްދަށް ރާއްޖެ ނާދެވިގެން ކަމަށެވެ.
މޭޔަރ ވިދާޅުވީ އެ މިސްކިތް ހުޅުވުމަށް ރައީސްގެ އަރިހަށް ސިޓީއެއް ފޮނުވައިފައިވާ ކަމަށެވެ. އަދި ލަސްތަކެއް ނުވެ މިސްކިތް ހުޅުވޭނެކަމަށް އުންމީދު ކުރައްވާ ކަމަށް މުޢިއްޒު ވިދާޅުވިއެވެ.
ކިންގް ސަލްމާން މިސްކިތް ހުޅުުވާނެ ތާރީޚް ކަނޑައަޅާނީ ސައުދީގެ އޮފިޝަލުން ރާއްޖެ އައުމަށް ފަހު ކަމަށް އިސްލާމިކް މިނިސްޓްރީން ވެސް ވަނީ މީގެ ކުރިން ވިދާޅުވެފައެވެ. ކިންގް ސަލްމާން މިސްކިތަކީ ސައުދީ ސަރުކާރުން ބޮޑު ހޭދައެއް ކޮށްގެން ބިނާކޮށްފައިވާ މިސްކިތެކެވެ.
ސަލްމާން މިސްކިތުގެ ފުރަތަމަ އަދި ދެވަނަ ފަންގިފިލާގައި ޖުމުލަ 4000 މީހުންނަށް ނަމާދު ކުރެވޭއިރު ތިންވަނަ ފަންގިފިލާގައި 40 ޖާގައިގެ 4 ކްލާސްރޫމާއި، 15 ޖާގައިގެ 5 ސެމިނަރ ރޫމް ހުންނާނެއެވެ. ހަތަރު ވަނަ ފަންގިފިލާގައި ލައިބްރަރީއަކާއި، 350 މީހުންގެ ޖާގައިގެ އޮޑިޓޯރިއަމެއް ހުންނާނެ ކަމަށް އިސްލާމިކް މިނިސްޓްރީން ވަނީ ވިދާޅުވެފައެވެ.
