ޖިންސީ ގޯނާއާ ދެކޮޅަށް "ރައިޒް އަޕް އެމްވީ"ގެ ޑިމާންޑްތަކެއް!
"ސްކޫލް ދަރިވަރުންގެ ހިމާޔަތުގައި"ގެ ނަމުގައި، ޖިންސީ ގޯނާއާ ދެކޮޅަށް ހަރަކާތެއް ބޭއްވުމަށް ރައިޒް އަޕް އެމްވީން ނިންމައިފިއެވެ.
ރައިޒް އަޕް އެމްވީއަކީ ޖިންސީ ގޯނާއާއި ޖިންސީ ފުރައްސާރައާ ދެކޮޅަށް ރާއްޖޭގައި މަސައްކަތް ކުރާ އެންޖީއޯއެކެވެ.
އެ އެންޖީއޯގެ ފަރާތުން "ދެން"އަށް މައުލޫމާތު ދެއްވަމުން މަރިޔަމް ޒަހާ ޖަމީލް ވިދާޅުވީ، ރަސްފަންނުގައި މިއަދު ހަވީރު 4:00ގައި ފެށޭ މި ހަރަކާތަކީ ސުލްހަވެރި އެއްވުމެއް ކަމަށެވެ.
"މިއީ ދާދި ފަހުން ގަލޮޅު މަދަރުސާގައި އުމުރުން ހަތަރު އަހަރުގެ ކުޑަ ކުއްޖަކަށް ޖިންސީ ގޯނާ ކުރި މައްސަލައާ ގުޅިގެން، 18 ދުވަސް ފާއިތުވެފައިވީ އިރު ވެސް އެއްވެސް ފިޔަވަޅެއް އަޅައިފައި ނުވާތީ އެކަމާ ކަންބޮޑުވުން އުފުލުމުގެ ގޮތުން ބާއްވާ ސުލްހަވެރި އެއްވުމެއް" ޒަހާ ވިދާޅުވިއެވެ.
މި އެއްވުމުގައި ބައެއް ބެލެނިވެރިން ވެސް ބައިވެރިވާނެ ކަމަށާއި މި ކަންބޮޑުވުމާ ގުޅިގެން ރައިޒް އަޕްގެ ފަރާތުން ޑިމާންޑްތަކެއް ކުރާ ކަމަށް ވެސް އެ ޖަމިއްޔާއިން ވަނީ ވިދާޅުވެފައެވެ.
އެ ޖަމިއްޔާއިން ވަނީ، މި މައްސަލައިގެ ތަހުގީގު ކުރިއަށް ގެންދާ ގޮތް ހާމަ ކުރުމަށާއި ގަލޮޅު ސްކޫލުގައި އިތުރު އެހެން ކުއްޖަކު އެކަމުގެ ޝިކާރައަކަށް ވެފައިވޭތޯ ބެލުމަށާއި އިތުރު ސްކޫލެއްގައި އެފަަދަ ކަމެއް ނުހިނގާނެކަން ކަށަވަރު ކުރުމަށް އެޑިއުކޭޝަން މިނިސްޓްރީން އަޅައިފައިވާ ފިޔަވަޅުތައް ހާމަކުރުމަށް ގޮވައިލައްވައިފައެވެ
މީގެ އިތުރުން ސްކޫލު މާހައުލަކީ ކުދިންނަށް ރައްކާތެރި މާހައުލެއްކަން ޔަގީން ކުރުމަށް ސްކޫލުތަކުގައި "ސޭފްޓީ އޮޑިޓް"އެއް ހަދައި ކުދިންނަށް ނުރައްކަލެއް ކަމަށް ހީވާ ކަންކަން ފާހަގަކޮށް އިސްލާހު ކުރުމަށާއި ރައްކާތެރިކަމަށް އަޅާ ފިޔަވަޅުތައް ތަންފީޒު ކުރޭތޯ ބަލައި މޮނިޓާކުރުމަށް މިނިސްޓްރީން ހާއްސަ އޮފިޝަލުން ކަނޑައެޅުމަށް ވެސް ރައިޒް އަޕްއިން ވަނީ ޑިމާންޑް ކޮށްފައެވެ.
ރައިޒް އަޕްގެ ފަރާތުން ގޮވައިލެއްވި އަނެއް ކަމަކީ، ސްކޫލުތަކަށް މުވައްޒަފުން ނެގުމުގައި އެ މީހުންގެ ކުރީގެ ރެކޯޑް ރަނގަޅަށް ބަލައި، ހޯދުމަށް ފަހު ނޫނީ ވަޒީފާ ނުދިނުމަށާއި މިފަދަ މައްސަލަތައް ތަހުގީގުކޮށް ފިޔަވަޅު އަޅާއިރު މައްސަލައާ ގުޅުން ހުރި މީހުން މަގާމުން ވަގުތީ ގޮތުން އެކަހެރި ކުރުމުގެ ބަދަލުގައި ކުދިންނާ އެކު މަސައްކަތް ކުރަން ޖެހޭ އެއްވެސް މަސައްކަތެއް ކުރުމުގެ ފުރުސަތު އެ ކަހަލަ މީހުންނަށް ނުދިނުމަށެވެ.
