މިޔުޒިކާއި ކުޅިވަރުގެ ހިދުމަތްތެރިޔާ ތަރަބޫޒު ރިޒާ ނިޔާވެެއްޖެ
ދިވެހި މިޔުޒިކީ ދާއިރާއަށާއި ކުޅިވަރަށް ގިނަގުނަ ހިދުމަތްތަކެއް ކޮށްފައިވާ ހެންވޭރު ތަރަބޫޒުގޭ އަހުމަދު ރިޒާ (ތަރަބޫޒު ރިޒާ) މިއަދު ނިޔާވެއްޖެއެވެ.
ލަވަކިޔުމާއި ބެރު ޖެހުމުގައި ފާހަގަ ކޮށްލެވޭ ރިޒާ ވަނީ މީގެ ކުރިން އޭނާގެ އަމިއްލަ ގޭގައި މިއުޒިކް ސްޓޫޑިއޯއެއް ހަދައި އެތަނުގެ ލަވަ ރެކޯޑްކޮށް އަލްބަމް ނެރެފައިވެއެވެ. އެ ސްޓޫޑިއޯ އަކީ އޭރު ވަރަށް ގިނަ މިއުޒީޝަނުންނާއި ލަވަކިޔުންތެރިން ވެސް ބޭނުންކުރި ތަނެކެވެ.
މިޔުޒިކް ސްޓޫޑިއޯތައް މާލޭގައި މާބޮޑަށް ނެތުމުން، ރިޒާގެ އެހީތެރިކަން އޭރުގެ ފަންނާނުން ވަރަށް ބޮޑަށް ހޯދާފައިވެއެވެ.
ކުޅިވަރުގެ ދާއިރާއަށް ބަލާއިރު ރިޒާ އަކީ 1980ގެ އަހަރުތަކާއި 1990ގެ އަހަރުތަކުގައި ފުރަތަމަ ޑިވިޝަނުގެ ފުޓްބޯޅަ މެޗުގައި ރޮނގު ބެލެހެއްޓި ލައިންސްމަނެކެވެ. އަދި ދެވަނަ ޑިވިޝަނާއި ތިން ވަނަ ޑިވިޝަނުގެ މެޗުތަކާއި އަތޮޅު ފުޓްބޯޅަ މުބާރާތުގައި ރެފްރީކަން ވެސް އޭނާ ކުރިއެވެ.
މީގެ އިތުރުން ރިޒާ ވަނީ ޤައުމީ ފެންވަރުގައި ފުޓްބޯޅަ އާއި ހޮކީ ވެސް ކުޅެފައެވެ. ރިޒާ އަކީ 1968، 1969 އަދި 1970 ގައި ހޮކީ ތަށި މިލްކުކުރި ރޭޑިއަންޓް ކްލަބުގެ ކުޅުންތެރިއެއް ވެސް މެއެވެ.
ގިނަ މީހުން ފާހަގަ ކޮށްފައިވާ ގޮތުގައި ތަރަބޫޒު ރިޒާއަކީ ސަމާސާ މިޒާޖެއްގެ އެންމެންނާ ވެސް ގުޅޭ ހިތް ހެޔޮ މީހެކެވެ.
މާތް ﷲ އެމައްޔިތާގެ ފުރާނައަށް ހެޔޮ ރަޙްމަތް ލައްވާ، ފާފަ ފުއްސަވާ ސުވަރުގޭގެ މަތިވެރި ނިޢުމަތް މިންވަރު ކޮށްދެއްވާށި. އާމީން. އަދި މިހިތްދަތި ވަގުތުގައި ޢާއިލާއަށް ކެތްތެރިކަން ދެއްވާށި. އާމީން
إِنَّا لِلّهِ وَإِنَّـا إِلَيْهِ رَاجِعُون
