ނޭދެވޭ ޢަމަލުތައް ހުއްޓައިލައިގެން ނޫނީ މަގުމަތި އަމާނެއް ނުވާނެ: ނައިބު ރައީސް
މަގުމަތީގެ އަމާންކަން ކަށަވަރުކުރެވޭނީ މަގުމަތި ބޭނުންކުރާ ހުރިހާ މީހުންގެ ކިބައިން ވެސް ފެންނަ ނޭދެވޭ ޢަމަލުތައް އިސްލާޙުކޮށްގެން ކަމަށް ރައީސުލްޖުމްހޫރިއްޔާގެ ނައިބު ފައިސަލް ނަސީމް ވިދާޅުވެއްޖެއެވެ.
ނައިބު ރައީސް މިފަދައިން ވިދާޅުވީ ޓްރެފިކް މޮނީޓަރސް ތަމްރީން ކުރުމުގެ މިއަހަރުގެ ޕްރޮގްރާމް ނިންމުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.
ނައިބު ރައީސް ވިދާޅުވީ މަގުތަކުގެ އަމާންކަން ކަށަވަރުކުރުމަށް ކިތަންމެ ބައިވަރު ފުލުހުންނެއް ވެސް ނެރެވިދާނެ ކަމަށެވެ. ނަމަވެސް އެއިން ނަތީޖާއެއް ނުކުންނާނީ މަގު ބޭނުންކުރާ އެންމެންގެ ފަރާތުން ފެންނަމުންދާ ނޭދެވޭ ޢަމަލުތައް ހުއްޓައިލައިގެން ކަމަށެވެ.
މި ފަދަ ނޭދެވޭ ޢަމަލުތައް ހުއްޓުވުމަށް އެންމެން އެކީ މަސައްކަތް ކުރަން ޖެހޭ ކަމަށާއި މިކަމުގެ ސަބަބުން ރާއްޖޭގައި ހިނގާ ނުރައްކާތެރި އެކްސިޑެންޓުތައް މަދުކުރެވޭނެ ކަމަށެވެ. މީގެ އިތުރުން މަގުމައްޗަކީ އެންމެންގެ ތަނަކަށްވާއިރު އެތަނުގެ އަމާންކަން ބެލެހެއްޓުމަކީ ވަކި ބައެއްގެ ޒިންމާއެއް ނޫންކަމަށް ވެސް ނައިބު ރައީސް ވިދާޅުވިއެވެ.
މި ރަސްމިއްޔާތުގައި މިނިސްޓަރ އޮފް އެޑިއުކޭޝަން ޑރ.ޢައިޝަތު ޢަލީ އަދި ކޮމިޝަނަރ އޮފް ޕޮލިސް މުޙައްމަދު ޙަމީދު ވެސް ވަނީ ބައިވެރިވެވަޑައިގެންފައެވެ.
Ads by STO
