މުލީގައި އަލިފާނުގެ ބޮޑު ހާދިސާއެއް ހިނގައިފި
މ. މުލީގައި މިރޭ އަލިފާނުގެ ބޮޑު ހާދިސާއެއް ހިނގައިފިއެވެ.
މި ހާދިސާގައި ބަދިގެއަކާއި، ދެ ގެއަކަށް ވަނީ ވަރަށް ބޮޑަށް ގެއްލުން ވެފައެވެ.
މުލީ ކައުންސިލްގެ ރައީސް ޝަމްއޫން ރަމީޒުއާ ހަވާލާދީ، އޮންލައިން ނޫސް "މިހާރު" ގައި ބުނެފައިވާ ގޮތުގައި މި ހާދިސާ ހިނގައިފައި ވަނީ މިރޭ 7:00 ހާއިރެވެ. މި ހާދިސާގައި އަނދައި ހުލިވެފައި ވަނީ އެ ރަށު މާފަހި ގޭގައި މަސްކައްކަން ބޭނުން ކުރާ ތަނެކެވެ. ނަމަވެސް އެތަނުގައި ރޯވި އަލިފާންގަނޑުގެ ވަރުގަދަކަމުން އެގޭގެ ބައެއް ފާރުތަކާ ޖެހިގެން ހުރި ގޭގެ ފާރެއް ވެސް ވަނީ ތަޅައިލަން ޖެހިފައެވެ.
މި ހާދިސާގައި ބޮޑެތި ގެއްލުންތަކެއް ވެފައިވީ ނަމަވެސް، އެއްވެސް މީހަކަށް އަނިޔާއެއް ވެފައެއް ނުވެއެވެ.
މާފަހި ގޭގައި އަލިފާން ރޯވީ މަސްކައްކަން ދަރު އުނދުނަކަށް ލައިފައި، އެ މަސައްކަތުގައި އުޅުނު މީހުން ނަމާދަށް ދިޔަ ވަގުތުގައި ކަމަށް ވެސް މައުލޫމާތު ލިބެއެވެ.
Ads by STO
