އުމަރު ޒާހިރު އަވަހާރަވުމާ ގުޅިގެން ޤައުމީ ދިދަ ބައިދަނޑިއަށް ތިރިކުރަނީ
ދައުލަތަށް ގިނަ ދުވަހު ޚިދުމަތް ކުރެއްވި ނިޝާން އިއްޒުއްދީން އިއްޒަތުގެވެރިޔާ އޮނަރަބަލް އުމަރު ޒާހިރު އަވަހާރަވުމާ ގުޅިގެން ދިވެހި ޤައުމީ ދިދަ ބައިދަނޑިއަށް ތިރިކުރަން ނިންމައިފިއެވެ.
އުމަރު ޒާހިރު އަވަހާރަވީ ކޮވިޑް-19އަށް ފައްސިވެ، އެ ބައްޔަށް ފަރުވާ ހޯއްދަވަމުން ދަނިކޮށް ދަރުމަވަންތަ ހޮސްޕިޓަލުގައި މިއަދު މެންދުރުގެ ވަގުތެއްގައެވެ. އެމަނިކުފާނު ކޮވިޑަށް ފައްސިވީ މީގެ 10 ވަރަކަށް ދުވަސް ކުރިންނެވެ.
ނިޝާން އިއްޒުއްދީނު އިއްޒަތުގެ ވެރިޔާގެ ލަގަބު 2008 ވަނަ އަހަރު ލިބިވަޑައިގެންނެވި އުމަރު ޒާހިރު ނިޔާވި އިރު އެމަނިކުފާނުގެ އުމުރުފުޅަކީ 85 އަހަރެވެ.
އުމަރު ޒާހިރު އަވަހާރަވުމާ ގުޅިގެން މިއަދު ރައީސް އޮފީހުން ނެރުނު އެންގެވުމެއްގައި ވިދާޅުވެފައި ވަނީ، އެމަނިކުފާނު އަވަހާރަވުމުގެ ހިތާމައިގައި، މާދަމާއިން ފެށިގެން ތިން ދުވަސް ވަންދެން (21 ޑިސެމްބަރ 2021 ވާ އަންގާރަ ދުވަހުން ފެށިގެން 23 ޑިސެމްބަރ 2021 ވާ ބުރާސްފަތި ދުވަހުގެ ނިޔަލަށް) ދިވެހި ޤައުމީ ދިދަ ބައިދަނޑިއަށް ތިރިކުރެއްވުމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ނިންމަވައިފައިވާ ކަމަށެވެ.
އުމަރު ޒާހިރު ވަނީ ކުރީގެ ރައީސް މައުމޫން އަބްދުލްޤައްޔޫމްގެ ވެރިކަމުގައި ގިނަ ވުޒާރާތަކުގެ ވަޒީރުކަން ކުރައްވައިފައެވެ. އޭގެ ތެރޭގައި ޕަބްލިކް ވަރކްސްގެ ވަޒީރުކަމާއި ދާޚިލީ ވަޒީރުކަމާއި ކުޅިވަރާ ބެހޭ ވަޒީރުކަން ވެސް ހިމެނެއެވެ.
އުމަރު ޒާހިރުގެ މައްޗަށް ކުރެވޭ ކަށުނަމާދު އޮންނާނީ މިރޭގެ ޢިޝާ ނަމާދަށް ފަހު އިސްލާމީ މަރުކަޒުގައެވެ..
މާތް ﷲ އުމަރު ޒާހިރުގެ ފުރާނައަށް ހެޔޮ ރަޙްމަތް ލައްވަވައި ފާފަ ފުއްސަވައި ސުވަރުގޭގެ މަތިވެރި ނިޢުމަތް މިންވަރު ކޮށްދެއްވާށިއެވެ. އާމީން! އަދި މިހިތްދަތި ވަގުތުގައި ޢާއިލާއަށް ކެތްތެރިކަން ދެއްވާށިއެވެ. އާމީން!
إِنَّا لِلّهِ وَإِنَّـا إِلَيْهِ رَاجِعُون
انالله وانا اليه راجعون!
اللهم اغفر له وارحمه وعافه واعف عنه
اللهم ثبته عند السؤال فى القبر ويوم القيامة امين يارب العالمين امين!