ނުކުޅެދުންތެރިކަން ހުންނަ ކުދިންނަށް ދޭން 2000 ރުފިޔާ ކުޑަ: އެޗްއާރްސީއެމް

ނުކުޅެދުންތެރިކަން ހުންނަ ކުދިންނަށް ސަރުކާރުން ދޭ އެހީއެއްގެ ގޮތުގައި ދޭ 2000 ރުފިޔާއަކީ، އެފަރާތްތަކަށް ދޭން މާ ކުޑަ އަދަދެއް ކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް)އިން ބުނެފިއެވެ.

Ads by MWSC

އެ ކޮމިޝަނުން އާންމުކޮށްފައިވާ 2021ވަނަ އަހަރުގެ "ހިޔުމަން ރައިޓްސް" ރިޕޯޓުގައިވާ ގޮތުން ނުކުޅެދުންތެރިކަން ހުންނަ މީހުންނަށް މި ވަގުތު ދައުލަތުން ފޯރުކޮށްދެމުންދާ 2000 ރުފިޔާއަކީ އެ ފަރާތްތަކުގެ ޒަރޫރީ ބޭނުންތައް ފުއްދުމަށް އެކަށީގެންވާ އަދަދެއް ނޫނެވެ.

މިއަދު އާންމުކުރި އެ ރިޕޯޓުގައި ނުކުޅެދުންތެރިކަން ހުންނަ މީހުންނަށް ދިމާވާ ގޮންޖެހުންތަކަށް އަލިއަޅުވައިލައި ބަޔާންކޮށްފައި ވަނީ ނުކުޅެދުންތެރިކަން ހުންނަ މީހުންނަށް ލިބޭ އަނިޔާގެ މައްސަލަތައް ދެނެގަތުމުގައި ގިނަ ގޮންޖެހުންތަކެއް ހުރި ކަމަށެވެ. އަދި މިފަދަ މައްސަލަތައް ރިޕޯޓު ކުރުމަށް ފަސްޖެހޭކަމާއި ރިޕޯޓުކުރެވޭ މައްސަލަ މަދުކަން ވެސް އެ ރިޕޯޓުގައި ވަނީ ފާހަގަކޮށްފައެވެ.

މީގެ އިތުރުން ނަފްސާނީ ބަލިތަކަށް ފަރުވާ ހޯދަމުންދާ މީހުން އަނިޔާއަށް ހުށަހެޅިގެން ރިޕޯޓުކުރެވޭ އަދަދު އެހެނިހެން ނުކުޅެދުންތެރިކަން ހުންނަ މީހުންނާ އަޅައިބަލާއިރު ގިނަކަމާއި ތަންފީޒީ އިދާރާތައް ބައްޓަން ކުރެވިފައި ވަނީ ނުކުޅެދުންތެރިކަން ހުންނަ މީހުންނަށް އެކްސެސިބަލްކޮށް ނޫންކަން ވެސް ރިޕޯޓުގައ ފާހަގަކޮށްފައިވެއެވެ. އަދި ނުކުޅެދުންތެރިކަން ހުންނަ މީހުންނަށް އެހެން މީހެއްގެ މައްޗަށް ބަރޯސާ ނުވެ، އަމިއްލަ މިނިވަންކަންމަތީގައި އުޅުމުގެ މަގު ފަހިވެފައި ނެތްކަން ވެސް ވަނީ ފާހަގަކޮށްފައެވެ.