ރިހިވެލި މައްސަލަ ނުބަލަން ސުޕްރީމް ކޯޓުން ނިންމައިފި
ރިހިވެލި މައްސަލަ ނުބަލަން ސުޕްރީމް ކޯޓުގެ ރެޖިސްޓަރއިން އިއްޔެ ނިންމަވައިފިއެވެ.
މި މައްސަލައަކީ ދިވެހިރާއްޖޭގެ ހައިކޯޓުން ޝަރުއީ އަދި ގާނޫނީ އުސޫލުތަކާ ހިލާފަށް ނިންމައިފައިވާ މައްސަލައެއް ކަމަށް ބުނެ، ސަބަބު ބަޔާންކޮށް، އެ ނިންމުން އިސްތިއުނާފްކުރުމުގެ ހުއްދައަށް އެދި ސޭވް ދަ ޑްރީމް ޕްރައިވެޓް ލިމިޓެޑް ލައިބިލިޓީ ކޮމްޕެނީއިން ހުށަހަޅައިފައިވާ މައްސަލައެކެވެ.
ސޭވް ދަ ޑްރީމް ޕްރައިވެޓް ލިމިޓެޑްގެ ލައިބިލިޓީ ކޮމްޕެނީގެ ފަރާތުން މި މައްސަލަ ހުށަހަޅައިފައި ވަނީ މިދިޔަ އަހަރު ޑިސެމްބަރު މަހުގެ 30 ގައެވެ. މި މައްސަލަ ރައްދުވާ ފަރާތްތަކަކީ، މ. ތަނޑިނޫމާގެ ޙުސެއިން ޝިހާމާއި މ. ތަނޑިނޫމާގެ މުހައްމަދް ޝިހާމާއި މާހަލް ޓުއާސް ޕްރައިވެޓް ލިމިޓެޑެވެ.
ސުޕްރީމް ކޯޓުގެ ރަޖިސްޓްރާއިން ވިދާޅުވީ މި މައްސަލައިގައި ސޭވް ދަ ޑްރީމް ޕްރައިވެޓް ލިމިޓެޑްގެ ލައިބިލިޓީ ކޮމްޕެނީއިން ހުށަހަޅައިފައިވާ ނުގުތާތަކުގައި ގަޟިއްޔާއިން ނިންމައިފައިވާ ނިންމެވުން ރަނގަޅު ނޫންކަމަށް ބަލަން ޖެހޭ ޝަރުއީ އަދި ގާނޫނީ ސަބަބެއް ހުށަހެޅިފައި ނުވާ ކަމަށެވެ. އެހެންވެ، ސުޕްރީމް ކޯޓުގެ ގަވާއިދުގެ ދަށުން މި މައްސަލަ ބަލައިދެވެން ނެތްކަމަށް ސުޕްރީމް ކޯޓުގެ ރަޖިސްޓާރއިން ވިދާޅުވިއެވެ.
މި މައްސަލަ ދެން ހުށަހަޅަން ޖެހޭނީ ފަނޑިޔާރުންގެ މަޖިލީހަށެވެ.
