ދެ ކޮމަންޑޫ ގުޅައިލުމުގެ މަޝްރޫއުގެ އީއައިއޭގައި މައްސަލަތަކެއް
ކޮމަންޑުއާއި އެ ރަށް ކައިރީގައި އޮންނަ މަތި ކޮމަންޑޫ ގުޅައިލުމުގެ މަޝްރޫއުގެ އެންވަޔަރްމަންޓަލް އިމްޕެކްޓް އެސެސްމަންޓް (އީއައިއޭ)ގައި މައްސަލަ އެބަހުރި ކަމަށް ޑްރެޖިން އެސޯސިއޭޝަން އޮފް މޯލްޑިވްސްއިން މިއަދު ބުނެފިއެވެ.
އެ އެސޯސިއޭޝަނުން މިއަދު ނެރުނު ބަޔާނެއްގައި ބުނީ ދެ ކޮމަންޑޫ ގުޅައިލުމުގެ މަޝްރޫއުގެ އީއައިއޭގައި މައްސަލަ އެބަހުރި ކަމަށާއި އެ އީއައިއޭއަށް އެންވަޔަރްމަންޓަލް ޕްރޮޓެކްޝަން އެޖެންސީ (އީޕީއޭ)އިން ހުއްދަ ދިނީ އާއްމުކޮށް އެފަދަ ރިފޯޓުތަކަށް ހުއްދަ ދޭން ގެންގުޅޭ އުސޫލާ ހިލާފަށް ކަމަށެވެ.
އެގޮތުން މަޝްރޫއަށް އެންމެ ފުރަތަމަ ހުއްދަ ދިން އީއައިއޭގައި އެކަށީގެންވާ ވަރަށް ޕްރޮޖެކްޓް ޖަސްޓިފިކޭޝަނާއި ފީލްޑް ސާވޭ ހަދައިފައި ނެތް ކަމަށާއި ކޮމަންޑޫގެ ވޭވް ޑައިނަމިކްސް ސާވޭ ހަދައިފައި ނުވާއިރު، އޭގެ ސަބަބުން ހިއްކާ ބިމާއި ކޮމަންޑޫގެ ގޮނޑުދޮށަށް ބޮޑެތި ބަދަލުތައް އައުން އެކަށީގެންވާ ކަމަށް ވެސް ޑްރެޖިން އެސޯސިއޭޝަނުން ބުނެފައިވެއެވެ.
ކޮމަންޑުއާއި މަތި ކޮމަންޑޫ ގުޅައިލުމުގެ މަޝްރޫއުގެ ދަށުން 16.7 ހެކްޓަރުގެ ބިން ހިއްކަން ނިންމައިފައިވެއެވެ. އެމްޓީސީސީއާ ހަވާލުކޮށްގެން ކުރިއަށްގެންދާ 249 މިލިއަން ރުފިޔާގެ އެ މަޝްރޫއު މިދިޔަ އާދިއްތަ ދުވަހުގެ ރޭ ވަނީ ފަށައިފައެވެ.
Ads by STO
