ދޫނިތައް މަރައިލުން: އޭޖީގެ ރަހުމް ކުޑަ ލަފައަށް ގިނަ ބައެއްގެ ފާޑުކިޔުން

ރާއްޖެއަށް އެތެރެކުރި ގިނަ އަދަދެއްގެ ދޫނިތަކެއް މަރައިލައިފައިވަނީ އެޓާނީ ޖެނެރަލްގެ ލަފާގެ މަތިން ކަމަށް ފިޝަރީޒް މިނިސްޓްރީން ބުނެފިއެވެ.

Ads by Sosun Fihaara

އެ މިނިސްޓްރީން ވަނީ، 120 ދޫނި މަރައިލައިފައި ކަމަށް މައުލޫމާތު ލިބެއެވެ. އެ ދޫނިތައް މަރައިލީ، އެއީ ގަވާއިދާ ހިލާފަށް ރާއްޖެއަށް އެތެރެ ކުރި ދޫނިތަކެއް ކަަމަށް ބުނެ، އޭޖީގެ ލަފާގެ މަތިން ކަމަށް ވެސް ފިޝަރީޒް މިނިސްޓްރީން ވަނީ ބުނެފައެވެ.

ފިޝަރީޒް މިނިސްޓްރީއާއި އޭޖީ ގުޅިގެން ހިންގި މި އަމަލު، އެތައް ބަޔަކު ސިފަކުރީ ވަރަށް ވެސް ރަހުމު ކުޑަ އަމަލެއްގެ ގޮތުގައެވެ. އަދި މިކަމާ ގުޅިގެން މީސްމީޑިއާގައި އެތައް ބަޔަކު ދަނީ ނުރުހުން ފާޅު ކުރަމުންނެވެ. އެގޮތުން ބައެއް މީހުން ސުވާލު ކޮށްފައިވަނީ، ގަވާއިދާ ހިލާފަށް ރާއްޖެއަށް މަސްތުވާތަކެތި އެތެރެ ކުރާ މީހުންނާ މެދު ކަންކަން ކުރަން އޭޖީ ލަފާ ދެނީ ކޮންގޮތަކަށްތޯއެވެ.

އެހެން މީހަކު ސުވާލު ކުރީ، ދޫނިތައް ހިމާޔަތް ކުރާނެ ކަމަށް ބުނެ، މިއަދު މަރައިލީ ކީއްވެތޯއެވެ.

އިތުރު ބަޔަކު ބުނީ، އެ ދޫނިތައް މަރައި ނުލައި ދޫކޮށްލި ނަމަ، ނުވަތަ ފަޅު ރަށަކަށް ގެންގޮސް ދޫކޮށްލުން ވެސް މާ ރަނގަޅުވީސް ކަމަށެވެ.

އެނގިފައިވާ ގޮތުގައި ރާއްޖެއަށް އެ ދޫނިތައް އެތެރެކޮށްފައި ވަނީ އެ މަސައްކަތް ކުރާ ޕެޓްމާސްޓަރ ކުންފުނިން މީގެ ތިން މަސް ދުވަސް ކުރިންނެވެ.

ދޫނިތައް ނައްތައިލައިފައި މިވަނީ އެއާޕޯޓުން ދޫނިތައް ހިފަހައްޓައިފައިވާ މައްސަލަ ސިވިލް ކޯޓާއި ރައްޔިތުންގެ މަޖިލީހަށް ހުށަހަޅައިފައި ވަނިކޮށެވެ.

ފިޝަރީޒް މިނިސްޓްރީން އެ ދޫނިތައް މަރައިލީ އިންޖެކްޝަންތަކެއް ޖަހައިގެންނެވެ.