ލޭންޑް ޔޫސް ޕްލޭން އޮންނާނީ ހުށަހަޅައިފައި: މާލޭ ސިޓީ ކައުންސިލް
މާލޭ ލޭންޑް ޔޫސް ޕްލޭން، ޕްލޭނިންގ މިނިސްޓްރީއަށް ހުށަހަޅައިފައިވާނެ ކަމަށް މާލޭ ސިޓީ ކައުންސިލުން ބުނެފިއެވެ.
އެ ކައުންސިލުން މިހެން ބުނެފައި މި ވަނީ ވިލިމާލޭގެ ދެކުނު ފަރާތުގައި އޮންނަ ސިނާއީ ސަރަހައްދުން ބިން ކުއްޔަށް ދޫކުރުމަށް މާލެ ސިޓީ ކައުންސިލުން އިއުލާންކުރުމުން، ޕްލޭނިން މިނިސްޓްރީން އެކަން ހުއްޓުވުމާ ގުޅިގެންނެވެ. އެގޮތުން މާލެ ސިޓީ ކައުންސިލުގެ އެ އިއުލާނާ ގުޅިގެން ޕްލޭނިން މިނިސްޓްރީން އިއްޔެ ވަނީ އެ މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ސޮއި ކުރައްވައި މާލޭގެ މޭޔަރު ޑރ. މުހައްމަދު މުއިއްޒަށް އެޑްރެސް ކުރައްވާ ދެ ސިޓީއެއް ފޮނުއްވައިފައެވެ.
ފުރަތަމަ ސިޓީގައި ވަނީ ތިލަމާލެ ބްރިޖުގެ އަމަލީ މަސައްކަތް ކުރިއަށްދާއިރު ވޯކްސައިޓެއްގެ ގޮތުގައި ބޭނުންކުރުމަށް ކުރިން ހަމަޖެހިފައިވާ ސަރަހައްދުގެ ޗާޓުގައި ފާހަގަކޮށްފައިވާ ސަރަހައްދަށް މިހާރު ބަދަލު އައިސްފައިވާ ކަމަށާއި ފަހުން އައި ބަދަލު އެނގޭ ގޮތަށް ސިޓީއާ އެކު ޗާޓެއް ވެސް ފޮނުއްވައިފައި ވާނެ ކަމަށެވެ.
ދެވަނަ ސިޓީގައި ވަނީ ވިލިމާލޭގެ ސިނާއީ ސަރަހައްދުން ބިން ދޫކުރުމުގެ ކަންކަން ސިޓީ ކައުންސިލުން ކުރިއަށް ގެންދަންވާނީ ލާމަރުކަޒީ ގާނޫނުގައިވާ ގޮތަށް ލޭންޑް ޔޫޒް ޕްލޭން، ޕްލޭނިން މިނިސްޓްރީއަށް ހުށަހަޅައި އެ ޕްލޭން ފާސްކޮށްގެން ކަމަށް އަންގައިފައެވެ.
ޕްލޭނިން މިނިސްޓްރީގެ އެ ސިޓީގެ ޖަވާބުގައި މާލޭ ސިޓީ ކައުންސިލުން މިއަދު ބުނީ ލޭންޑް ޔޫސް ޕްލޭން ފާސްކޮށް ޕްލޭނިން މިނިސްޓްރީއަށް ފޮނުވުމަށް ކަނޑައަޅައިފައިވާ ތާރީހު ކަމަށްވާ ނޮވެންބަރު 30، 2021ގައި މާލެ ސިޓީ ކައުންސިލުން ލޭންޑް ޔޫސް ޕްލޭން ހުށައަޅައިފައިވާ ކަމަަށެވެ.
