ކޮމަންޑޫ އިންތިޚާބަށް ފަހު ޕްރޮޖެކްޓްތައް "ބަރަވެލި ސްޕީޑަށް" ، ރައްޔިތުންގެ ޝަކުވާ!
ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައިއިލެކްޝަނާ ދިމާކޮށް ކޮމަންޑޫގައި ސަރުކާރުން ފެށި މަޝްރޫޢުތައް ، އިންތިޚާބަށް ފަހު މަޑު ޖެހި "ބަރަވެލި ސްޕީޑަށް" ބަދަލުވިކަމުގެ ޝަކުވާ އެ ރަށު ރައްޔިތުން ކުރަން ފަށައިފިއެވެ.
ވޭތުވެދިޔަ ފެބްރުއަރީ މަހުގެ 05ވަނަ ދުވަހު އޮތް ބައިއިލެކްޝަނާ ދިމާކޮށް ސަރުކާރުން ވަނީ ކޮމަންޑޫ ދާއިރާގެ ތިން ރަށުގައި ވެސް ގިނަ މަސައްކަތްތަކެއް ފައްޓަވައިފައެވެ. އޭގެ ތެރޭގައި ދެ ކޮމަންޑޫ ގުޅައިލުމާއި ކޮމަންޑޫ ފުޓްބޯޅަ ދަނޑުގެ މަސައްކަތާއި ޖިމްގެ މަސައްކަތް ހިމެނެއެވެ. އަދި ކޮމަންޑޫ ކައިރީގައި އޮންނަ މަތިރަށާއި މެދުރަށުގެ އިތުރުން މައިރަށުގައި ރިސޯޓް ހަދާނެކަން އިއުލާންކޮށްފައި ވެއެވެ. އަދި ހަމަ އެހެންމެ ފެނަކައާއި އެހެނިހެން ކުންފުނިތައް ހިމެނޭ ގޮތުން 55 މީހަކަށް ވަޒީފާ ދީފައި ވެއެވެ.އޭގެ ތެރޭގައި ވުޖޫދުގައި އަދި ނެތް އައިސްޕްލާންޓް ހިމެނެއެވެ.
އިންތިޚާބާ ދިމާކޮށް އެފަދަ މަސައްކަތްތަކެއް ފައްޓަވައިފައި ވާތީ ޓްރާންސްޕޭރެންސީ މޯލްޑިވްސްއިން ވެސް ވަނީ އިންތިޚާބަށް ނުފޫޒުފޯރާ ފަދަ ކަންކަން ، އިންތިޚާބާ ދިމާކޮށް ނުކުރުމަށް އިލްތިމާސްކޮށްފައެވެ. ނަމަވެސް އެ ކަންކަމަށް އިޝާރާތް ކުރައްވައި ރައީސް ޞާލިޙް އޭރު ވިދާޅުވީ ސަރުކާރުން ހިންގާ ތަރައްޤީގެ މަސައްކަތްތައް ހުއްޓައިނުލެވޭނެ ކަމަށާއި އެކަންކަން ކުރިއަށް ގެންދަވާނެ ކަމަށެވެ. ރައީސް ޞާލިޙް އެގޮތަށް ވިދާޅުވި ނަމަވެސް އިންތިޚާބު ނިމި ދޮޅުމަހެއްހައި ދުވަސްވީ އިރު އިންތިޚާބުގެ ދުވަސްވަރު ފެއްޓެވި ޕްރޮޖެކްޓްތައް މިހާރު ހިނގަމުންދާ ގޮތާ މެދު ކޮމަންޑޫގެ ގިނަ ބަޔަކު ދަނީ ޝަކުވާ ކުރަމުންނެވެ.
އެ ގޮތުން އިންތިޚާބު ނިމި 10 ވަރަކަށް ދުވަސް ފަހުން ، ރިސޯޓް ހެދުމަށް ކަނޑައެޅި ރަށްތައް ވަނީ ލިސްޓުން އުނިކޮށްފައެވެ. އަދި މަސައްކަތްތައް ވަނީ "ބަރަވެލި ސްޕީޑަށް"ގޮސްފައިކަމަށް އެ ރަށުން ވާހަކަ ދެއްކި މީހަކު ބުންޏެވެ.
"މަހާ ޖައްރާފްގެ ބުރަފައްޗެއް ނައްޓައިގެންނޭ ކިޔައިފައި ދިޔަ ގޮތަކަށް ނާދޭ، އެ ޕްރޮޖެކްޓްގެ ކުރެހުމެއް ވެސް އަދި ނެތް " ދެން އޮތީ ދަނޑު، ބިންގަނޑު ލެވެލްކޮށްލައިފައި ކާނު އެޅުމުގެ މަސައްކަތް ކުރަނީ ، އެ މަސައްކަތުގައި އުޅެނީ ދެތިން މީހަކު" ކޮމަންޑޫ މީހަކު ބުންޏެވެ.
ކޮމަންޑޫގައި ހަދަމުންދާ ދަނޑު
ކޮމަންޑޫ އިންތިޚާބާ ދިމާކޮށް ވަޒީފާއަށް ނެގި މީހުންގެ ތެރޭގައި އެ ރަށުގައި ގާއިމްކުރުމަށް އިއުލާންކުރި އިންޑޯ ޖިމްގެ މުވައްޒަފުން ހިމެނެއެވެ. އިއުލާން ކުރުމެއް ނެތި މުވައްޒަފުން ނަގައިފައިވާ އެ ޖިމްގެ ސާމާނު އަދިވެސް އެ ރަށަކަށް ނުދެއެވެ. ވަޒީފާއަށް ނެގި ޒުވާނުންގެ ތެރެއިން ބައެއް މީހުންނަށް މުސާރަ ނުދޭ އިރު ވަޒީފާގެ އެއްބަސްވުމެއް ވެސް ނެތެވެ.
"މިދިޔަ މަހުގެ މުސާރަ އަދިވެސް ނުލިބޭ، ނުލިބޭ ތަނުގައި އަޅުގަނޑުމެންގެ ނެތް ވަޒީފާގެ އެއްބަސްވުމެއް ވެސް"އިންތިޚާބާ ދިމާކޮށް ވަޒީފާއަށް ނެގި މުވައްޒަފަކު "ދެން"އަށް ބުންޏެވެ.
ކޮމަންޑޫ ދާއިރާގެ އިންތިޚާބާ ދިމާކޮށް އެ ރަށުގައި ގިނަ މަސައްކަތްތަކެއް ފެށުމުން އާންމުންގެ ގިނަ ބަޔަކު ވެސް ވަނީ ސަރުކާރަށް ފާޑުކިޔުން އަމާޒުކޮށްފައެވެ. އެގޮތުން ތަރައްޤީކުރުމަށް އޮތް ގޮތަކީ ބައިއިލެކްޝަންތައް ކަމަށް ބުނެ މީސްމީޑިއާގައި ގިނަ ބަޔަކު ޚިޔާލުފާޅުކޮށްފައި ވެއެވެ.
Ads by STO
