ސަލްމާނު މިސްކިތުގައި ކުރި ހުކުރު ނަމާދު ލައިވް ނުކުރުމުން ހަސަދަ ބޭޒާރު ވެއްޖެ: ޑރ. ޖަމީލް
ސައުދީގެ އެހީތެރިކަމާ އެކު ބިނާކުރި، ކިންގް ސަލްމާން މިސްކިތް އަލަށް ހުޅުވާ، މިއަދު ކުރި ހުކުރު ނަމާދު ދައުލަތުގެ މީޑިއާއިން ލައިވް ނުކުރުމުން، ރައީސް ޔާމީން އަބްދުލްޤައްޔޫމްގެ ފުރަތަމަ ނައިބު ރައީސް، ޑރ މުޙައްމަދު ޖަމީލް އަޙްމަދު ފާޑު ވިދާޅުވެއްޖެއެވެ.
ރައީސް ޢަބްދުﷲ ޔާމީން ޢަބްދުލްޤައްޔޫމްގެ ވެރިކަމުގައި ޤާއިމްކުރި ކިންގ ސަލްމާން މިސްކިތުގައި މިއަދުގެ ހުކުރު ނަމާދުކޮށްފައިވާ އިރު، އެ މިސްކިތް މިއަދު ވަނީ ފުރައިލައިފައެވެ. މިސްކިތުގައި ކުރި ފުރަތަމަ ހުކުރު ދައުލަތުގެ މީޑިއާ ޕީއެސްއެމްއިން ލައިވްކޮށްފައެއް ނުވެއެވެ. ޕީއެސްއެމްއިން ލައިވްކޮށް ގެނެސްދީފައި ވަނީ، އިސްލާމީ މަރުކަޒުގައި ކުރިޔަށް ދިޔަ ހުކުރު ނަމާދެވެ.
ސަލްމާން މިސްކިތުގެ ފޮޓޯތަކެއް ޓްވީޓް ކުރައްވަމުން ޑރ. ޖަމީލް ވިދާޅުވީ، ސަލްމާން މިސްކިތް ވަރަށް ފުރިހަމަ ކަމަށާއި، މިސްކިތް ބިނާ ކުރެއްވި ކަމަށްޓަކައި ސައުދީ ރަސްގެފާނަށާއި ރައީސް ޔާމީނަށް ޝުކުރު ދަންނަވާ ކަމަށެވެ.
ޖަމީލް ވިދާޅުވީ، އެތައް އަހަރަކަށް ސަލްމާން މިސްކިތް ނުހުޅުވާ ބަހައްޓައިފައި ހުރުމަށް ފަހު، އެތަން ރަސްމީކޮށް އިފްތިތާޙްނުކޮށް މިއަދު މިސްކިތުގައި ހުކުރު ނަމާދު ލައިވް ނުކުރުމުން ރައީސް ޞާލިހުގެ ސަރުކާރުގެ ހަސަދަވެރި ވިސްނުން ހާމަވާކަމެއް ކަމަށެވެ. އަދި މިކަމުން މި ސަރުކާރުގެ ޖާހިލުކަން އެނގޭ ކަމަށް ވެސް ވިދާޅުވިއެވެ.
ކިންގ ސަލްމާން މިސްކިތުގެ މަސައްކަތް ނިމި، އެތަން ނުހުޅުވި އެތައް އަހަރެއް ވެގެން ދިޔުމާ އެކު ސިޔާސީ އިދިކޮޅު ފަރާތްތަކާއި އާންމުންގެ ގިނަ ބަޔަކު ވަނީ ސަރުކާރަށް ފާޑުކިޔުން އަމާޒުކޮށްފައެވެ. މިއަދު އެ މިސްކިތުގައި ނަމާދުކުރަން ފެށުނު ނަމަވެސް ރަސްމީކޮށް ހުޅުވުން ބާއްވައިފައެއް ނުވެއެވެ.
ސަލްމާން މިސްކިތަކީ އެއް ފަހަރާ 10،000 މީހުން ނަމާދުކުރެވޭ ތަނަވަސް ޖާގައިގެ މިސްކިތެކެވެ. އެ މިސްކިތުގެ އިމާރާތުގައި ބައިނަލްއަޤުވާމީ ފެންވަރުގެ ލައިބްރަރީއަކާއި މަލްޓި ޕާޕަސް ހޯލަކާއި ސެމިނަރ ރޫމްތަކާއި ކްލާސް ރޫމްތައް ގާއިމްކުރެވިފައި ވެއެވެ.
މި މިސްކިތުގެ ބޭނުން ހިފަން ފެށުމާ ގުޅިގެން އިދިކޮޅު ޕީޕީއެމްއިން ވަނީ ރައީސް ޔާމީނަށް މަރުޙަބާއާއި ޝުކުރު ދަންނަވައި ބަޔާނެއް ނެރުއްވައިފައެވެ.
Ads by STO
