މަސްޢޫދު ހިލްމީއަށް ހަމަލާދިންކަމަށް ބުނާ މައްސަލަ ސާބިތެއް ނުވި، ހެކިތަކުގައި އެތައް މައްސަލަތަކެއް!

ދިއެފްއެމްގެ ކުރީގެ ސީއީއޯ މަސްޢޫދު ހިލްމީއަށް ތޫނު އެއްޗަކުން ހަމަލާދިން ކަމަށް ތުހުމަތުކޮށް ، ލ.ފޮނަދޫ ދިލްކުސާގޭ އަޙުމަދު ޝަމީމްގެ މައްޗަށް ޕޮރެސެކިޔުޓަރ ޖެނެރަލް ޙުސައިން ޝަމީމް ކުރެއްވި ދަޢުވާ ސާބިތުކުރުމަށް ހުށަހަޅައިފައިވާ ހެކިތަކަށް ބަލާއިރު އެކަށީގެންވާ ޝައްކެއް ނެތް މިންވަރަށް ކުށް ސާބިތުނުވާކަމަށް ފޮނަދޫ މެޖިސްޓްރޭޓް ކޯޓުން ނިންމައިފިއެވެ.

Ads by STELCO

"ވާނުވާ"ގައި 8 މަސް ދުވަހު ޖަލުގައި އޮންނަން ޖެހުނު ދައުވާ ލިބޭ އަޙުމަދު ޝަމީމުގެ މައްޗަށް ޝައްކެއް ނެތް މިންވަރަށް ކުށް ސާބިތު ނުވާކަމަށް ނިންމީ އިއްޔެއެވެ.

މި މައްސަލަ ބެއްލެވި ޢަލީ ޝަރީފް ވަނީ މައްސަލައިގައި ގިނަ ކަންތައްތަކެއް ފާހަގަ ކުރައްވައިފައެވެ.

ތ.ވިލުފުށީ ހުސްނުހީނާގޭ މަސްއޫދު ހިލްމީއަށް ލިބުނު އަނިޔާކަމަށް ދިން މައުލޫމާތުގައި ފުށުއެރުންތަކެއް

ލ.ފޮނަދޫ ރޯޝަންވިލާ ފާތިމަތު އާޝިޔާއާ ކައިވެނިކޮށްގެން ލ.ފޮނަދޫގައި ދިރިއުޅޭ މަސްޢޫދަށް ލިބުނު އަނިޔާތައް ސާބިތުކުރުމަށް ފޮނަދޫ ހެލްތު ސެންޓަރާއި ފުލުހުންގެ ލިޔުމެއް ވަނީ ޝަރީޢަތަށް ހުށަހަޅައިފައެވެ. ނަމަވެސް މި ދެ ލިޔުމުގައި ވެސް ތަފާތުތަކެއް ހުރިކަން ފަނޑިޔާރު ވަނީ ފާހަގަކުރައްވައިފައެވެ. އެ ގޮތުން ޞިއްޙީ މަރުކަޒުގެ ލިޔުމުގައި ބުނެފައިވާ ގޮތުގައި އަނިޔާވެފައި ވަނީ މަސްޢޫދުގެ ވައަތަށެވެ. ނަމަވެސް ފުލުހުންގެ ލިޔުމުގައިވާ ގޮތުގައި އަނިޔާ ލިބިފައި ވަނީ މަސްޢޫދުގެ ކަނާތު އަތްދަނޑި މައްޗަށެވެ. އަދި ޒަހަމް ހުރީ މަށައިގެން ގޮސްފައި ކަހަލަ ގޮތަކަށް ކަމަށާއި އެއީ ތޫނު އެއްޗަކުންވެފައިވާ ޒަހަމެއް ނޫން ކަމަށް ވެސް ފުލުހުންގެ ލިޔުމުގައި ބުނެފައި ވެއެވެ.

ދިއެފްއެމްގެ ކުރީގެ ސީއީއޯ، މަސްޢޫދު

ފާތިމަތު އާޝިޔާގެ ފޯނުގެ މައުލޫމާތު ވެސް ދިމާނުވޭ

މަސްޢޫދަށް ހަމަލާދިންކަމަށް ހެކި ބަސްދިން އާޝިޔާ ބުނެފައި ވަނީ އެ ހާދިސާގެ މަންޒަރު އޭނާގެ އައިފޯން 13 ޕްރޯ މެކްސްއިން ރެކޯޑްކޮށްފައިވާ ކަމަށެވެ. ނަމަވެސް ފުލުހުން އާޝިޔާގެ އަތުން ގެންގޮސްފައި ވަނީ އައިފޯން 11 ޕްރޯ މެކްސް ފޯނެއް ކަމަށް ފުލުހުން ބުނެފައި ވެއެވެ. އަދި ހަމަލާދިންކަމަށް ބުނާ ވީޑިއޯ ހެއްކެއްގެ ގޮތުގައި ބަލައިނުގަންނަން ފަނޑިޔާރު ނިންމަވައިފައިވެއެވެ. އެ ނިންމެވުން ނިންމަވައިފައި ވަނީ އެ ފުށުއެރުން އޮތުމާ އެކު އެފަދަ މައްސަލައެއްގައި ދިވެހިރާއްޖޭގެ ހައިކޯޓުން ނިންމައިފައިވާ ޤަޟިއްޔާއަކަށް ރިޢާޔަތްކޮށެވެ. އެ ގަޟިއްޔާގައި ބުރަދަން ދީފައި ވަނީ ކަމެއްގެ އަސްލު ނެތިގެން ގޮސްފި ނަމަ އެކަމެއްގެ ފަރްޢުގައިވާ ކަންތައްތައް ވެސް ނެތިގެން ދިޔައީކަމަށް ބަލަން ޖެހޭ ފިޤުހީ ޤާއިދާއަށެވެ.

ފާތިމަތު އާޝިޔާގެ ހެކި ބަހަކީ މަސްލަހަތު ފުށުއަރާ ހެކިބަހެއް

ފަނޑިޔާރު ފާހަގަކޮށްފައިވާ ކަންކަމަށް ބަލާއިރު ފާތިމަތު އާޝިޔާއަކީ މަސްޢޫދު ހިލްމީގެ އަނބިމީހާ ކަމަށްވާ އިރު މަސްޢޫދާ އެއްކޮޅަށް އަދި އަޙުމަދު ޝަމީމާ ދެކޮޅަށް އާޝިޔާ ދޭ ހެކި ބަހަކީ މަސްލަހަތު ފުށުއަރާ ހެކިބަހެއް ކަމަށް ބަޔާންކުރައްވައިފައި ވެއެވެ. އެ ގޮތުން މަތީ މަރުޙަލާގެ ކޯޓްތަކުން ނިންމާ ނިންމުންތަކަށް އެއަށް ވުރެ ދަށު ކޯޓްތަކުން ތަބާވާން ޖެހޭނެކަމަށް ޤާނޫނު އަސާސީގެ 143ވަނަ މާއްދާގެ ރ.ގައި ބަޔާންކޮށްފައިވާ ކަމަށާއި ، ދިވެހިރާއްޖޭގެ ހައިކޯޓުން ނިންމަވައިފައިވާ ޤަޟިއްޔާއެއްގައި މި ފަދަ ހެކި ބަހަށް ބުރަދަން ދީފައި ނުވާތީ އާޝިޔާގެ ހެކި ބަހަކީ މައްސަލައިގެ ނިޔާ ކަނޑައެޅުމުގައި ޝަރީޢަތަށް ބަލައިގަނެވޭނެ ހެކިބަހެއް ނޫންކަމަށް ވަނީ ނިންމަވައިފައެވެ.

ރިޟްވާން ޙަލީމްގެ ހެކި ބަހުގެ ބުރަދަން ދަށް

ހާދިސާ ހިނގިކަމަށް ބުނާ ރޭ ، މަސްޢޫދުގައިގައި އަޙުމަދު ޝަމީމް ޖަހައިފިކަމަށް މަސްޢޫދު ބުނިކަމަށް ލ.ފޮނަދޫ ނޫރާނީގޭ ރިޟްވާން ޙަލީމް ހެކިބަސް ދީފައި ވެއެވެ. ނަމަވެސް ހާދިސާ ހިނގިކަމަށް ބުނާ ވަގުތުގައި އޭނާ ހުރީ އެހެން ތަނެއްގައި ކަމަށް ދިފާޢުން ހުށަހެޅި ތިން މީހަކު ހެކިބަސް ދީފައިވާތީ ރިޟްވާން ޙަލީމްގެ ހެކިބަހުގެ ބުރަދަން ދަށްކަމަށް ނިންމަވައިފައި ވެއެވެ.

މި ކަންކަމުގެ އިތުރުން ދެ ފަރާތުން ހުށަހެޅި ހެކިތަކަށް ރިޢާޔަތްކޮށް ފަނޑިޔާރު ނިންމަވައިފައި ވަނީ މީހަކު ކުށެއްކޮށްފިކަން އެކަށީގެންވާ މިންވަރެއްގެ ޝައްކެއް ނެތި ޝަރީޢަތުގައި ސާބިތުނުކުރެވޭ ނަމަ އެމީހަކީ ކުށެއް ނެތް މީހެއްކަމުގައި ބެލުމުގެ ޙައްޤު ޤާނޫނު އަސާސީން ލިބިދީފައިވާ ކަމަށާއި ޝައްކެއް ނެތް މިންވަރަށް އަޙުމަދު ޝަމީމްގެ މައްޗަށް ކުށް ސާބިތު ނުވާކަމަށެވެ. އަދި އަޙުމަދު ޝަމީމް ބަންދުން ދޫކޮށްލުމަށް ފަނޑިޔާރު ވަނީ އަމުރުކުރައްވައިފައެވެ.