ރައީސް މައުމޫންގެ އަނިޔާވެރިކަމުގެ ވާހަކަތަކުން ، ޢަބްދުއްރަޙީމްގެ ހޫނު ރައްދެއް ޔުމްނާއަށް!
ރައީސް ޔާމީނަށް ފާޑު ވިދާޅުވެ ޔުމްނާ މައުމޫން ދެއްކެވި ވާހަކަފުޅުތަކަށް ޕީއެންސީގެ ރައީސް، އަބްދުއްރަޙީމް އަބްދުﷲ ހޫނު ރައްދެއް ދެއްވައިފިއެވެ.
މާލެ ސިޓީ އަންހެނުން ތަރައްގީއަށް މަސައްކަތް ކުރާ ކޮމެޓީއަށް ޕީޕީއެމްގެ ޓިކެޓްގައި ވާދަކުރާ ފާތިމަތު ނާޒިމާގެ ކެމްޕޭން ޖަލްސާގައި ވާހަކަފުޅު ދައްކަވަމުން ރައީސް ޔާމީން ވަނީ، "އިންޑިއާ އައުޓް" ކެންޕެއިނާއި މުޒާހަރާތައް ހުއްޓުވަނީ ޣައިރު ޤާނޫނީކޮށް ކަމަށާއި، ކޮމިޝަނާ އޮފް ޕޮލިސް މުހައްމަދު ޙަމީދު ދިގު މުއްދަތަކަށް ޖަލަށް ދާން ޖެހިދާނެކަމަށް ވިދާޅުވެފައެވެ.
ރައީސް ޔާމީންގެ މި ވާހަކަތަކާ ގުޅިގެން ޔުމްނާ ކުރެއްވި ޓްވީޓެއްގައި ވިދާޅުވީ، ރައީސް ޔާމީންގެ ވެރިކަމެއްގައި ޖަލުތައް ބޮޑުކޮށް ހުރިހައި އެންމެން ޖަލަށް ލާންވީ ނޫންތޯ ސުވާލު ކުރައްވައިފައެވެ. އަދި ކުރީގައި ޖަލަށް ލެވުނުވަރު މަދީތޯ ސުވާލު ކުރެއްވިއެވެ.
ރޭ ޕީޕީއެމް އޮފީހުގައި ބޭއްވި ޖަލްސާގައި މިކަމާ ގުޅޭ ގޮތުން ވާހަކަފުޅު ދައްކަވަމުން އަދުރޭ ވަނީ ޔުމްނާއަށް ވަރަށް ބޮޑަށް ފާޑު ވިދާޅުވެފައެވެ. އަދި ޔުމްނާގެ ބައްޕާފުޅުގެ ވެރިކަމުގައި އަނިޔާވެރިވި ވަރަށް މިހައިތަނަށް އައި އެއްވެސް ރައީސަކު އަނިޔާވެރިވެފައި ނުވާ ކަމަށާއި ރައީސް ޔާމީނަށް ރައްދުދީ ވާހަކަފުޅު ދައްކަވަން ލަދު ގަންނަވަން ޖެހޭ ކަމަށް ވިދާޅުވިއެވެ.
ރައީސް ޔާމީން ވެސް ބައިވެރިވެ ވަޑައިގެންނެވި މި ޖަލްސާއެއްގައި އަދުރޭ ވިދާޅުވީ، ރައީސް މައުމޫންގެ އަނިޔާވެރިކަމުގެ ވާހަކަ ދައްކަން ބޭނުންނުވާ ކަމަށާއި ނަމަވެސް މި ވާހަކަ ދައްކަން ޖެހެނީ ޔުމްނާއާ ހެދި ކަމަށެވެ.
"އަޅުގަނޑު މިހާރަކު ބޭނުމެއް ނޫން، ރައީސް މައުމޫނޭ ކިޔައިގެން މާ ގިނަ ވާހަކައެއް ދައްކާކަށް. އެހެން ނަމަވެސް ރައީސް މައުމޫންގެ ބޭފުޅުން، ޚާއްސަކޮށް ޔުމްނާ ނިކުމެ ވަޑައިގެން، ރައީސް މައުމޫން އެ ހާލުގައި ވެސް ހުންނެވިޔަ ނުދެއްވަން ވެގެން، ރައީސް ޔާމީނަށް ރައްޔިތުންގެ މަލާމާތާއި، ފުރައްސާރައާއި އަމިއްލައަށް ހޯއްދަވަން ވެގެން ކުރައްވާ ކަންތައްތަކުން އެ ވާހަކަ އިތުރަށް ދައްކަވަން ޖެހެނީ" އަދުރޭ ވިދާޅުވިއެވެ.
ޔުމްނާއަށް ވަރަށް ބޮޑަށް ފާޑު ވިދާޅުވަމުން އަދުރޭ ވިދާޅުވީ، ރައީސް ޔާމީންއަށް ރައްދު ދެއްވަނީ ލަދު ޙަޔާތް ކުޑަވީމާ ކަމަށާއި ތިމާގެ އިސްކޮޅާ އެއްވަރުގެ ވާހަކަ ދެއްކުމަށް ވިދާޅުވެފައެވެ. އަދި ޔުމްނާއަކީ ރައީސް ޔާމީނަށް ރައްދު ދެވޭ ވަރުގެ މީހެއް ނޫން ކަމަށް ބުނެ ސީދާ ހަމަލާތައް ޔުމްނާއަށް ރައްދު ކުރެއްވިއެވެ.
އަދުރޭގެ ވާހަކަފުޅުގައި އޭނާއަށް ލިބިވަޑައިގެންނެވި އަނިޔާގެ ވާހަކަަތައް ވެސް ފުރަތަމަ ފަހަރަށް ޕޯޑިއަމްއެއްގައި ހިއްސާ ކުރެއްވިއެވެ.
"އަބްދުއްރަޙީމްގެ މައްޗަށް ދައުލަތުން ދައުވާ ކުރަނީ އެސްޓީއޯގެ ފައިސާއަށް ޚިޔާނާތްތެރިވުމާ ގުޅިގެންނޭ. ފުލުސް ކޯޓުގެ ޤާޟީއަކަށް އިންނެވި ބޭފުޅާ ތެދުވެ ވަޑައިގެން ދެންނެވީ ފައިސާގެ މައްސަލައިގައި 11 އަހަރާއި 11 މަސް ދުވަހަށް މި ޤަޟިއްޔާ ނިންމެވީއޭ" އަދުރޭ ވިދާޅުވީ ރައީސް މައުމޫންގެ ދުވަސްވަރު ފުލުސް ކޯޓެއް ހައްދަވައިގެން ޖަވާބުދާރީ ވާން އެއްވެސް ފުރުސަތެއް ނުދީ އެތައް ބަޔަކަށް އަނިޔާ ދީފައިވާ ކަމަށެވެ.އަދި މިކަމުގެ ސަބަބުން އެތައް ބައެއްގެ މުސްތަޤްބަލް ގެއްލުވައިލި ކަމަށް ވިދާޅުވެ އެ މަނިކުފާނަށާއި ބައެއް ފަރާތްތަކަށް ދިން އަނިޔާގެ ތަފްސީލް ހިއްސާ ކުރެއްވިއެވެ.
"އަޅުގަނޑު އޮތީމޭ ވަލުތެރޭގައި ވެހޭހައި ވާރޭގައި، ދިއްލާހާ އަވީގައި 8 އިންޗި ފިލައެއްގެ މަތީގައި އަނދަގޮނޑި ޖަހައިފައި، ޗޭނު ޖަހައިފައި އެއްމަސް ދުވަސް ވަންދެން. އެ އަނިޔާދީފައި ހުރީމަ މި ދައްކަނީ، ޔުމްނާއަކަށް ނުދެއްކޭނެ އަނިޔާގެ ވާހަކައެއް"
އަދުރޭގެ ވާހަކަފުޅުގައި އިތުރަށް ވިދާޅުވީ، ރައީސް މައުމޫނަކީ މި ރާއްޖެ ދުށް އެންމެ ޖައްބާރު ވެރިމީހާ ކަމަށެވެ. އަދި އެމަނިކުފާނުގެ ވެރިކަމުގައި ގާމާދޫ ޖަލުގައި، ގިރިފުށީ ޖަލުގައި، ދޫނިދޫ ޖަލުގައި ވާނުވާ ނޭނގި އެތައް ބަޔަކު މަރުވެފައިވާކަން ފާހަގަ ކުރައްވައި، ޖަލުތަކުގައި އަނިޔާ ދިން ބައެއް ބޭފުޅުންގެ ވާހަކަތައް ހިއްސާ ކުރެއްވިއެވެ.
"މަރުޙޫމް މީދޫ އަޒީ، ގިރިފުށީގައި ދަގަނޑު ގޮނޑިއެއްގައި ބައިންދައިފައި، ކަރަންޓް ދިން ދިނުމުން އޭނާގެ މުޅި ޙަޔާތް ބަރުބާދު ވެގެން ދިޔައީ. ފޯއްމުލަކު ވާފިރު، ސެންޓަރަލް ހޮސްޕިޓަލުގައި އަޅުގަނޑުމެންގެ ލޯމަތީގައި މަރުވެގެން ދިޔައީ، ފުވައްމުލަކު ތިޖޫރި ފަޅައިލީ އޭނާކަމަށް ބުނެގެން، އިލްޔާސް އިބްރާހީމް އޭނާގެ ޒާތީ އުފަލަކަށް އޭނާ ހުރަސް އެޅިއޭ ކިޔައިގެން ގެންގޮސް، މަރުވެގެން ދިޔައީ އެ ތާންގައި އޮއްވާ. އަޅުގަނޑު ހުރިން ކައިރީގައި މަރުވިއިރު"
"އަޅުގަނޑު އޮތިން 14 ނަންބަރު ގޮޅީގައި ގާމާދޫގައި. މައްޗަންގޯޅީ ބާބުލްއަވާލީ، ޝެއިޚް މުޙައްމަދު އިބްރާހީމަށް ދިން އަނިޔާ އަޅުގަނޑު އަމިއްލަ ލޮލުން ދުށިން. 8 ފޫޓް 8 ފޫޓް ގޮޅިއަކަށް ލައިފައި، ފާޚާނާ ކުރަން ދިނީ މަތި ކަނޑައިލައިފައި ޓައްޕެއް. ހަފްތާއަކު އެއްފަހަރު ގޮޅި ހުޅުވަނީ، އެއަށް ފާޚާނަ ކުރަން ޖެހެނީ، އަމިއްލަ އަތުން ސާފު ކުރަން ޖެހެނީ" ރައީސް މައުމޫންގެ ވެރިކަމުގައި ދީނީ ޢިލްމުވެރިންނަށް ޖަލުގައި ދިން އަނިޔާ ކިޔައިދެމުން އަދުރޭ ވިދާޅުވިއެވެ.
އަދުރޭ ވިދާޅުވީ، ރައީސް މައުމޫން، ރައީސް ޔާމީންގެ ވެރިކަމާ ވަކިވެ ވަޑައިގަތީ ކޮރަޕްޝަނާއި އަނިޔާވެރިކަމުގެ ސަބަބުންނޭ ވިދާޅުވާ އިރު، ރައީސް މައުމޫންގެ ވެރިކަމުގައި މިކަންކަންމާ ބޮޑު ކަމަށެވެ.
"ރައީސް ޔާމީން ބަންދުކުރި ކޮންމެ މީހަކު ބަންދުކޮށްފައި އޮންނާނީ ޤާނޫނީ އިމުގެ ތެރެއިން. އެހެން ނަމަވެސް މިދެންނެވި ދުވަސްވަރު ކިހިނެތްތޯ ކަންތައް ކުރީ. ވާނުވާ ނޭނގެ. އަބުރާ ބެހެނީއޭ، ސިޔާސަތާ ބެހެނީއޭ ކިޔައިފައި އެބަ ގެންގޮސް އަހަރު ދެ އަހަރު އޮންނަން ޖެހޭ ޖަލުގައި." އަދުރޭ ވިދާޅުވިއެވެ.
އަބުދުއް ރަހީމު ގެ ލަދު ހަޔާތްކޮބާ، ލޯގަންޑެއް ގެ ކުރިމައްޗައް އަރައި އަމިއްލަ ސިފަ ބަލާލަބަލަ އަނެކާއަށް އެއްޗެއް ބުނުމުގެ