ކައުންސިލްތަކަށް ގެސްޓު ހައުސްއާއި ފިހާރަތައް ވެސް ހިންގޭނެ!
ކައުންސިލްތަކަށް އާމްދަނީ އިތުރުކުރުމަށް ކުންފުނި އުފައްދައިގެން ކުރެވޭ ވިޔަފާރިތަކުގެ ތެރެއަށް ގެސްޓު ހައުސް ވިޔަފާރިއާއި އަސާސީ މުދާ ވިއްކާ ފިހާރަތައް ހިމަނައި ޤަވައިދު އިސްލާހުކޮށްފިއެވެ.
ކައުންސިލްތައް އިތުރަށް ބާރުވެރި ކުރުވުމުގެ ގޮތުން މި ސަރުކާރުގެ ސިޔާސަތުގެ ދަށުން ޤާނޫނަށް ގެނައި ބޮޑެތި ބަދަލުތަކުގެ ތެރޭގައި ކައުންސިލްތަކަށް ކުންފުނި ހަދައިގެން ވިޔަފާރި ކުރެވޭނެ ފުރުސަތު ވަނީ ފަހިކޮށްދީފައެވެ.
އިކޮނޮމިކް މިނިސްޓްރީން ޤަވާއިދު އިސްލާހުކޮށްފައިވާ އިރު ރަށްރަށާއި ސިޓީތަކުގައި އާއްމު ފަރާތްތަކުން ނުކުރާ ވިޔަފާރިތަކާއި އާއްމު ފަރާތްތަކުން ކުރި ނަމަވެސް އެކަށީގެންވާ މިންވަރަށް ހިދުމަތް ފޯރުކޮށް ނުދެވޭ ކަންކަން ކުރުމުގެ ފުރުސަތު މިހާރު މި ޤަވާއިދުގެ ދަށުން ކައުންސިލްތަކަށް ވަނީ ހުޅުވައިލެވިފައެވެ.
އެގޮތުން ކައުންސިލްތަކަށް ކުރެވޭނެ ބައެއް ވިޔަފާރިތަކުގެ ތެރޭގައި ކޮންވެންޝަން ސެންޓަރު ހިންގުމާއި، އެއާޕޯޓު ހިންގުމާއި، ކްލިނިކާއި ހޮސްޕިޓަލް ހިންގުމާއި، ގެސްޓު ހައުސް، މަސް ޕްރޮސެސް ކުރުން، ކޭބަލް ޓީވީގެ ހިދުމަތް ދިނުމާއި، ބޯޓު ޔާޑު އަދި ފާމަސީ ހިންގުން ފަދަ ކަންކަން ފާހަގަކޮށްލެވެއެވެ.
މިކަންކަމުގެ ތެރޭގައި ނުހިމެނޭ ކަމެއް ވިޔަފާރިގެ ގޮތުގައި ކައުންސިލަކުން ކުރުމަށް ހުށައަޅައިފި ނަމަ، އިކޮނޮމިކް މިނިސްޓްރީން މިކަމަށް ހުއްދަ ދޭން ވާނީ އެލް.ޖީ.އޭގެ ލަފަޔާ އެކީ ކަމަށް ވެސް އެ ޤަވާއިދުގައި ބުނެފައިވެއެވެ.
މީގެ އިތުރުން މި ޤަވާއިދުގެ ދަށުން ހުއްދަ ނޫން ވިޔަފާރިއެއް ކައުންސިލަކުން ކުރާ ނަމަ 10،000ރ.އިން ޖޫރިމަނާ ކުރެވޭނެކަމަށް ވެސް އެ ޤަވާއިދުގައި ބުނެފައިވެއެވެ.
