ތަފާތު މަންމައެއް! ދަރިފުޅު ޖަލުން ސަލާމަތްކުރަން ކޮނުނީ 35 ފޫޓުގެ ވަޅުގަނޑެއް!

ބައެއް ފަހަރު ހަމައެކަނި ފިލްމުތަކުގައި ވާނެ ކަންކަމޭ ހީވާކަންކަން ހަގީގަތުގައި ވެސް ހިނގައެވެ.

ޖަލުތަކުގައި ހިނގާފައިވާ އެތައް ވާހަކަތަކެއް އިވިފައިވާއިރު، މިއީ ހަމަ ޔަގީނުންވެސް އޭގެ ތެރެއިން ވަރަށް ފާހަގަ ކޮށްލެވޭނެ އެއްވާހަކައެވެ.

ޔޫކްރޭނުގައި އުމުރު ދުވަހަށް ޖަލަށްލާފައި ހުރި މީހަކު ސަލާމަތް ކުރުމަށް އޭނާގެ މަންމަ ވަޅުގަނޑެއް ކޮނުނު ޚަބަރެއް ވަނީ ފެންމަތިވެފައެވެ.

މީހަކު މެރުމުގެ ކުށުގައި އުމުރު ދުވަހަށް ޖަލަށްލި އެމީހާގެ މަންމަ، 35 ފޫޓްގެ ފުން އެވަޅުގަނޑު ކޮނެފައިވާކަން ޔޫކްރޭނުގެ ފުލުހުންނަށް އެނގި، މިހާރު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.

"ޓައިމްސް ނައު" ގައި ޝާއިއު ކޮށްފައިވާ ރިޕޯޓެއްގައި ބުނެފައިވާ ގޮތުގައި، ދަރިފުޅު ސަލާމަތް ކުރަން އެވަޅުގަނޑު ކޮންނަން އަންހެން މީހާއަށް ހިޔާލު އައީ ޖަލު ކައިރީ ސަރަޙައްދަކުން ގެއެއް ކުއްޔަށް ހިފުމަށް ފަހުގައެވެ. އަދި އެކަމަށް ތައްޔާރުވުމުގެ ގޮތުން އޭނާ ވަނީ އުދައްޔާއި ފަކީރާތަކެއް ވެސް ގަނެފައެވެ.

އުމުރުން 51 އަހަރުގެ އެއަންހެންމީހާ މިމަސައްކަތް ފަށާފައިވަނީ ވަރަށް ރޭވުންތެރި ކަމާއެކުގައެވެ. އެގޮތުން ވަޅުގަނޑު ކޮނުމުގެ މަސައްކަތް އޭނާ ކޮށްފައިވަނީ ހަމައެކަނި ރޭގަނޑު ގަޑީގައެވެ. އަދި އެސަރަޙައްދަށް އޭނާ ދަނީ އަޑު މަޑު ސްކޫޓަރެއްގައެވެ.

އެއަންހެންމީހާ އެފަދަ ވަޅުގަނޑެއް ކޮންނަކަން އެނގިފައިވަނީ، ޖަލުގެ ފާރުތަކުގެ އަޑިއަށް 10 ފޫޓާއި ހަމައަށް ކޮނެވިފައި ވަނިކޮށެވެ.

ފުލުހުން އެއަންހެންމީހާ ކުށުގެވެށިން ހައްޔަރު ކޮށްފައިވަނީ ތިން ހަފްތާ ވަންދެން އޭނާ އެވަޅުގަނޑު ކޮނުނު ފަހުންނެވެ.