ކޮވިޑް-19: އޮމަދޫއިން މާލެ ގެނައި މީހަކު ފައްސި ވެއްޖެ!
އދ. އޮމަދޫއިން މާލެ ގެނައި މީހަކު ކޮވިޑަށް ފައްސި ވެއްޖެއެވެ.
އެނގިފައިވާ ގޮތުގައި ފައްސި ވެފައިވަނީ އުމުރުން 64 އަހަރުގެ އަންހެނެކެވެ.
އޮންލައިން ނޫސް "ސީއެންއެމް" ގައި ބުނެފައިވަނީ އަބަދުވެސް ނޭވާ ހިއްލުމުގެ މައްސަލަ ހުންނަ، އެ މީހާ، އިއްޔެ ވަރަށް ބޮޑަށް ނޭވާ ހިއްލާތީ ހެލްތު ސެންޓަރަށް ދިއުމުން މަހިބަދޫގައި ހުންނަ އެ އަތޮޅު ހޮސްޕިޓަލަށް ގެންދިއުމަށް ލަފާދީފައިވާ ކަމަށް އެރަށު ހެލްތު ސެންޓަރުގެ ކޮމިއުނިޓީ ހެލްތު އޮފިސަރ އަހުމަދު ނަޝީދު ވިދާޅުވި ކަމަށެވެ. އަދި އަތޮޅު ހޮސްޕިޓަލަށް ގެންދިއުމުން މާލެ ގެންދިއުމަށް ލަފާދިން އިރު ރޭގެ ވަގުތެއްގައި އެއަންހެން މީހާ ވަނީ މާލެ ގެނެސް އައިޖީއެމްއެޗަށް ގެންގޮސްފައިވާ ކަމަށް ވެސް އޭނާ ވިދާޅުވިއެވެ.
އެގޮތުން އައިޖީއެމްއެޗުން ހެދި ޓެސްޓުގެ ނަތީޖާ އިން އެއަންހެންމީހާ ބައްޔަށް ފައްސި ވެފައިވާކަން މިއަދު ހެނދުނު ހެލްތު ސެންޓަރަށް އަންގާފައިވާ ކަމަށާއި އެހެންކަމުން އެމީހާ ރަށުގައި ދިރިއުޅެމުންދާ ގޭގެ މީހުންނަށް އެކަން އަންގައި ބޭރަށް ނުނިކުތުމަށް އަންގާފައިވާ ކަމަށްވެސް ނާޝިދު ވިދާޅުވެފައިވެއެވެ.
އޮމަދޫ މީހަކު ކޮވިޑަށް ފައްސިވި ނަމަވެސް އެރަށް މޮނީޓަރިންގެ ހާލަތަށް އަދި ގެންގޮސްފައި ނުވާ ކަމަށް ވެސް ނާޝިދު ވަނީ ވިދާޅުވެފައެވެ.
