ޅެމުގެ މާނަ އޮންނާނީ ޅެންވެރިޔާގެ ބަނޑުގައެވެ.
ކޫފާގައި ދިރިއުޅުނު އެެއްލޯ އަވަރު ފަހާމީހެއްގެ ކައިރިއަށް، ހެދުމެެއް ފެހުމަށްޓަކައި ޅެންވެރިޔަކު ދިޔައެވެ.
ފަހާމީހާ ބުންޏެވެ.
އޭ .. އަހަރެންގެ އެކުވެރިޔާއެވެ.
الله ގަންދީ ބުނަމެވެ.
އަހަރެން ތިބާއަށް ހެދުމެއް ފަހައިދޭނަމެވެ. އެ ހެދުމަކީ އަބާއެއްކަމެއް، ނުވަތަ ގަމީހެއްކަމެއް އެކަކަށްވެސް ބުނެދޭކަށް ނޭނގޭނެއެވެ.
އެވާހަކަ އަޑުއަހާފައި، ޅެންވެރިޔާ ބުންޏެވެ. އެންމެ ރަނގަޅެވެ. ތިބާ އެފަދަ ހެދުމެއް އަހަރެންނަށް ފަހައިދީފިނަމަ، އަހަރެންވެސް އެފަދަ ޅެމެއް ތިބާއަށް ހަދައިދޭނަމެވެ. އެ ޅެމަކީ ތަޢުރީފެއްކަމެއް ނުވަތަ މަލާމާތެއްކަމެއް އެއްވެެސް މީހަކަށް ބުނެދޭކަށް ނޭނގޭނެއެވެ.
ކޮންމެއަކަސް، ހެދުންފަހައި ނިންމިއިރު، އެއީ އަބާއެެއްކަމެއް، ނުވަތަ ގަމީހެއްކަމެއް ބުނެދޭކަށް ނޭނގެއެވެ.
އެހިނދު ޅެންވެރިޔާ ވަގުތުން ޅެމެއް ހަދައިގެން ކިޔަންފަށައިފިއެވެ.
ޅެމުގެ މާނައިގައި އޮންނަނީ މިފަދައިންނެވެ.
ޒައިދު ކިޔާ މީހަކު އަހަރެންނަށް ހެދުމެއް ފަހައިދިނެވެ.
އޭނާގެ ދެ ލޯ ވެސް އެއްގޮތްވުމަށް އަހަރެން އެދެމެވެ.
އޭރުން، މީސްތަކުންނާ އަހަރެން ސުވާލުކުރާނަމެވެ. އޭނާއަކީ ތަޢުރީފު ލިބިގެންވާ މީހެއް ހެއްޔެވެ ؟ ނުވަތަ އޭނާއަކީ މަލާމާތް ލިބިގެންވާ މީހެއް ހެއްޔެވެ ؟
( ނޯޓު : މިތާ ދެ ލޯ އެއްގޮތްވުމުގެ މާނަ ދެގޮތަކަށް ނެގިދާނެއެވެ. އެއްގޮތަކީ އޭނާގެ ދެ ލޯވެސް އަވަރުވުމެވެ. އަނެއްގޮތަކީ އޭނާގެ ދެ ލޯ މުޅިން ރަނގަޅުވުމެވެ. ޅެންވެރިޔާ ކުރައްވާ މާނަ އޮތީ ވަންހަނާވެފައެވެ. )
ޅެމުގެ މާނައާމެދު އަރަބިން ބުނެއުޅޭ ވާހަކައެއް އޮވެއެވެ.
المعنى في بطن الشاعر
ޅެމުގެ މާނަ އޮންނާނީ ޅެންވެރިޔާގެ ބަނޑުގައެވެ.
ޅެމުގެ މާނަ އޮންނާނީ ޅެންވެރިޔާގެ ބަނޑުގައޭ ބުނެވޭ ވާހަކައިގެ އަޞްލު ހާދިސާއަކީ މިއީ ކަމުގައި ބުނެވެއެވެ.
Ads by Sosun Fihaara
Ads by Allied Insurance
