މައިންބަފައިންނަށް ހެޔޮކޮށް ހިތުމަކީ ﷲ ގެ މަގުގައި ޖިހާދުކުރުމަށް ވުރެ ވެސް މަތިވެރިވެގެންވާ ކަމެއް: ޚުޠުބާ
- މައިންބަފައިންނަށް ހެޔޮކޮށް ހިތައި އިހްސާންތެރިވެ، އޯގާތެރިވުމަކީ ﷲ ތަޢާލާގެ ހަޟްރަތުގައި ލޮބުވެތިކަން ބޮޑުވެގެންވާ ޢަމަލެއް ކަމަށާއި އެއީ ﷲ ގެ މަގުގައި ޖިހާދުކުރުމަށް ވުރެ ވެސް މަތިވެރިވެގެންވާ ކަމެއް ކަމަށް މިއަދުގެ ޚުޠުބާގައި ބުނެފިއެވެ.
މައިންބަފައިންނަށް ހެޔޮކޮށް ހިތައި އިހްސާންތެރިވެ، އޯގާތެރިވުމަކީ ﷲ ތަޢާލާގެ ހަޟްރަތުގައި ލޮބުވެތިކަން ބޮޑުވެގެންވާ ޢަމަލެއް ކަމަށާއި އެއީ ﷲ ގެ މަގުގައި ޖިހާދުކުރުމަށް ވުރެ ވެސް މަތިވެރިވެގެންވާ ކަމެއް ކަމަށް މިއަދުގެ ޚުޠުބާގައި ބުނެފިއެވެ.
މައިބަފައިންނަށް އިހްސާންތެރިވެ ހެޔޮކޮށް ހިތުމަށް ގޮވާލައި މިއަދު އިއްވި ޚުޠުބާގައި ބުނެފައި ވަނީ މައިންބަފައިންނަކީ އޯގާތެރިކަމާއި ކުލުނުގެ ބަގީޗާއެއް ކަމަށާއި އެ ދެމީހުންގެ ހައްގު ނުހަނު މަތިވެރި ކަމަށެވެ. އަދި އެ ދެ މީހުންގެ ހެޔޮކަމުގެ ބަދަލެއް ނުދެވޭނެ ކަމަށާއި ޚަލްޤުތަކުންގެ އެންމެހާ ރިވެތިކަމުގެ މައްޗަށް އެދެމީހުން ކޮށްދީފައިވާ ހެޔޮކަން ގިނަގުނަވެގެންވާ ކަމަށް ޚުޠުބާގައި ބުނެފައިވެއެވެ.
"ކީރިތި ގުރްއާނުގައި ވަނީ މައިންބަފައިންގެ ދަރަޖަ އާއި އެ މީހުންނަށް އަދަބު އިޙްތިރާމް އަދާކުރަންވާ ގޮތް ބަޔާންކޮށްދެއްވާފައެވެ. އެދެމީހުން ނުވަތަ އޭގެ ތެރެއިން އެކަކު ނަމަވެސް މުސްކުޅި އުމުރާ ބައްދަލުކުރާ ހިނދު، ކައިރީގައި ތިބޭ ދަރީން މައިންބަފައިންނަށް އަޅާލައި، އޯގާތެރިވާން ޖެހޭ ކަމުގައި ވަނީ އަންގަވާފައެވެ." ޚުޠުބާގައި ބުނެފައިވެއެވެ.
ޚުޠުބާގައި އިތުރަށް ބުނެފައިވަނީ މައިންބަފައިންގެ ކިބައިން ނުރުހެވޭ ފަދަ ބައެއް ކަންތައްތައް ފެނުނު ކަމުގައި ވިޔަސް، މައިންބަފައިންނާ ދެކޮޅު ހެދުމެއް ނެތި، އެ މީހުންނަށް ކިޔަވަންތެރިވާން ޖެހޭ ކަމަށެވެ. އަދި އެއީ އެ މީހުންނަކީ މުޝްރިކުން ކަމުގައި ވިޔަސްމެއެވެ.
"ތިޔަބައި މީހުންގެ މައިންބަފައިންނަށާއި، ގާތްތިމާގެ މީހުންނަށް އިހްސާންތެރިވާށެވެ.! އަދި ހުރިހާ ގޮތަކުން ރަހިމުގެ ގުޅުން ބަދަހިކުރާށެވެ. އެހެނީ އެއުރެންނަކީ ތިޔަބައިމީހުންނަށް ﷲގެ ޘަވާބާއި، އެކަލާނގެ ރުހިވޮޑިގަތުން ލިބިގަތުމަށް އޮތް ވަސީލަތަކަށް ވާތީއެވެ. އަދި އަޅަމެންގެ ރިޒްޤު ތަނަވަސް ކޮށްދެއްވައި، އަޅަމެންގެ އުމުރު، ސާލިހު އަމަލު ކުރުމުގައި ދަމަހައްޓަވައި ދެއްވުމުގެ ވަސީލަތަކަށް ވާތީ ވެސް މެއެވެ. ﷲގެ ރުހުން އެދޭކަމަށް ވަނީ ނަމަ މައިންބަފައިންގެ ރުހުން ހޯދަން ޖެހެއެވެ. ބާއްޖަވެރި އަކީ މާތްﷲ އަށް ތަޤްވާވެރިވުމަށްފަހު އެމީހެއްގެ މައިންބަފައިންނަށް ހެޔޮކޮށް ކަންތައް ކުރާ މީހާއެވެ." ޚުޠުބާގައި ބުނެފައިވެއެވެ.
ޚުޠުބާގައި އިތުރަށް ބުނެފައި ވަނީ ﷲގެ ރަޙުމަތްފުޅުން މައިންބަފައިންނަށް ހެޔޮކޮށް ހިތުން ވާނީ ދެމިގެންދާ ކަމެއްގެ ގޮތުގައި ލައްވާފައި ކަމަށެވެ. މާނައަކީ އެދެމީހުން ކުރެ މީހަކު ނުވަތަ އެދެމީހުން ދުނިޔެ ދޫކުރުމަށްފަހުގައި ވެސް ހެޔޮކޮށް ހިތޭނެ މަގު ﷲ ވަނީ ފަހިކޮށްދެއްވާފައި ކަމަށް ޚުޠުބާގައި ވަނީ ބުނެފައެވެ. އެއީ އެ މީހުންނަށްޓަކައި ހެޔޮދުޢާ ކޮށްދީ އެ ދެ މީހުންގެ މަތިން ޞަދަޤާތް ކޮށް، އެމީހުންގެ ގާތްތިމާގެ މީހުންނާ ގުޅުން ބަދަހިކޮށް، ރަހިމުގެ ގުޅުން ދަމަހައްޓައި، އެ މީހުންގެ ގާތް ރަހުމަތްތެރިންނަށް ހެޔޮކޮށް ހިތުމުން ކަމަށް ވެސް ޚުޠުބާގައި ބުނެފައިވެއެވެ.
