ނަރުހުގެ މަރު: ހެކިބަސް ނެގުމުގެ މަރުހަލާ ސިއްރުކޮށްދޭން އެދިއްޖެ
އައިޖީއެމްއެޗްގައި މަސައްކަތް ކުރި ފިލިޕީންސްގެ ނަރުހެއް ކަމަށްވާ މޭރީ ގްރޭސްގެ މަރުގެ ތުހުމަތު އުފުލިފައިވާ ހަލީމަތު ލަމްހާގެ ޝަރީއަތުގެ ހެކިބަސް ނެގުމުގެ މަރުހަލާ ސިއްރުކޮށްދޭން ލަމްހާގެ ފަރާތުން އެދިއްޖެއެވެ.
މިއަދު އޮތް އަޑުއެހުމުގައި ލަމްހާގެ ވަކީލު އަހުމަދު ޔާމީން ވިދާޅުވީ ހެކިބަސް ނެގުމުގެ މަރުހަލާ ސިއްރު ކޮށްދޭން އެދިފައިވަނީ ޖިނާއީ އިޖުރާއަތުގެ ގާނޫނުގެ ދަށުން ކަމަށެވެ. އެއީ އަޑުއެހުން ހާމަކޮށް ކުރިއަށް ގެންގޮސްފިނަމަ އަދުލުވެރިކަމަށް އަސަރުކޮށްފާނެ ކަމަށް ބުނެ ހުށަހެޅި ހުށަހެޅުމެއް ކަމަށް ވަކީލު. ވިދާޅުވިއެވެ.
އެއާއެކު މައްސަލަ ބައްލަވާ ގާޒީ ހުސައިން ފާއިޒް ރަޝާދު ނިންމެވީ އަޑުއެހުންތައް ސިއްރުކުރުމުގެ ބަހުސްވެސް ސިއްރުކޮށްގެން ކުރިއަށް ގެންދިއުމަށެވެ.
މޭރީގެ މަރުގެ މައްސަލައިގައި ދައުލަތުން ލަމްހާގެ މައްޗަށް ކޮށްފައި ވަނީ ތިން ދައުވާއެކެވެ. އެއީ މީހަކު މަރައިލުމުގައި ބައިވެރިވުމުގެ އިތުރުން ހޮސްޕިޓަލްތަކުގައި ނޫނީ ނުގެންގުޅެވޭނެ ފަދަ އިންޖެކްޝަންތަކެއް ގެންގުޅެފައިވާތީ ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގައި ކުރުމުގެ ދައުވާއާއި އެހެން މީހެއްގެ މުދަލަށް ހުއްދަ ނޫން ގޮތުގައި ބާރު ހިންގުމުގެ ދައުވާއެވެ.
މިދިޔަ މަހުގެ 19ވަނަ ދުވަހު ޑިއުޓީގައި ހުރެފައި ބްރޭކަށް ގެއަށް ދިޔަތާ އިރުކޮޅެއް ފަހުން، މޭރީ ދަންޖެހުނީ ކަމަށް ބުނެ އޭނާގެ ހަށިގަނޑު ހޮސްޕިޓަލަށް ގެންދިޔައީ އޭނާގެ ފިރިމީހާ މާވިންއެވެ. މި މައްސަލައާ ގުޅިގެން އޭނާގެ ފިރިމީހާގެ މައްޗަށް މަރުގެ ތުހުމަތު ކުރެވި އޭނާވެސް ހުރީ ހައްޔަރު ކޮށްފައެވެ. އޭނާގެ މަރުގެ މައްސަލައިގައި މާވިން ހައްޔަރު ކުރީ އެ މަހުގެ 27ވަނަ ދުވަހުގައެވެ.
މޭރީގެ މަރާ މެދު ފުރަތަމަ ބުނަމުން ދިޔައީ އޭނާ މަރުވީ އަމިއްލައަށް ކަމަށެވެ. ނަމަވެސް އޭނާގެ މަރުގައި ޝައްކު ކުރެވޭ ކަންތައްތަކެއް ފާހަގަ ވާތީ އޭނާގެ ހަށިގަނޑުގެ ޕޯސްޓްމޯޓަމެއް ވަނީ ހަދައިފައެވެ. އައިޖީއެމްއެޗްގައި ހީމޯ ޑަޔަލެސިސް ނަރުހެއްގެ ގޮތުގައި މަސައްކަތް ކުރި މޭރީގެ ހަށިގަނޑުގެ ޕޯސްޓުމޯޓެމް ހެދީ އިންޑިއާއިންނެވެ.
