ގާސިމް ކުރެއްވީ ރަން އަކުރުން ފާހަގަކުރެވޭނެ ގައުމީ މަސައްކަތެއް: ޖޭޕީ
އާ ގާނޫނު އަސާސީ އެކުލަވާލުމުގައި ޖުމްހޫރީ ގާސިމް އިބްރާހިމް ކުރެއްވި މަސައްކަތް ރަން އަކުރުން ފާހަގަކުރެވޭނެ ކަމަށް ޖޭޕީން ބުނެފިއެވެ.
ރާއްޖެ ޑިމޮކްރަސީއަށް ކުރި ދަތުރުގެ ނަތީޖާއެެއްގެ ގޮތުން އުފެދުނު “ފެހި ގާނޫނު އަސާސީ” އަށް މިއަދު 12 އަހަރު ވެފައިވާއިރު މި ގާނޫނު އަސާސީހެދުމަށް އެކުލަވާލި ހާއްސަ މަޖިލީހުގެ ރައީސްކަން ފުރަތަމަ ކުރެއްވީ އޭރުގެ ގދ.އަތޮޅު މެންބަރު އައްބާސް އިބްރާހިމްއެވެ.
ނަމަވެސް ދިމާވި އެކި ކަންކަމާ ކުރިމަތިވި ސިޔާސީ ހައިޖާނުތަކުގެ ސަބަބުން އެ މަނިކުފާނު މަގާމުން އިސްތިއުފާ ދެއްވުމުން ދެން ގާނޫނު އަސާސީ އެއްކޮށް އެކުލަވައިލާ ނިމެންދެން ހާއްސަ މަޖިލީހުގެ ރައީސްކަން ކުރެއްވީ ގާސިމް އިބްރާހިމްއެވެ.
އާ ޤާނޫނު އަސާސީއަށް މިއަދު 12 އަހަރު ފުރުމާއި ގުޅިގެން ޖޭޕީގެ ނެރުނު ބަޔާނެއްގައި ބުނީ ގާނޫނު އަސާސީ އެކުލަވާލި ހާއްސަ މަޖިލީހުގެ ރައީސްގެ ހައިސިއްޔަތުން ގާސިމް މި މުހިއްމު ގައުމީ މަސައްކަތުގައި ވެވަޑައިގެންނެވި ގުރުބާނީއާއި އަދާކުރެއްވި މުހިންމު ދައުރު އެއީ މި ޤާނޫނުއަސާސީ ވުޖޫދުކުރުމަށް ކުރެވުނު މަސައްކަތުގައި ރަންއަކުރުން ފާހަގަކުރެވޭނެ ކަމެއް ކަމަށެވެ.
އަދި އެއީ ގާސިމަށް އެކަމުގެ ޝަރަފާއި ޝުކުރު ޙައްޤު އިޚްލާސްތެރި މަސައްކަތެއް ކަމަށްވެސް ޖޭޕީގެ ކައުންސިލުން ބުނެފައިވެއެވެ.
Ads by STO
