ފަހުގެ ތާރީޚުގައި ހިނގި އަލިފާނުގެ ހާދިސާތަކާ ގުޅޭ ޚާއްސަ ތަހުޤީޤެއް ހިންގަނީ
މާލޭ އާ އަތޮޅު ތެރޭގައި ފަހުގެ ތާރީޚެއްގައި ހިނގައިފައިވާ އަލިފާނުގެ ހާދިސާތައް ހިނގައިދިޔަ ގޮތާ ގުޅޭ ޚާއްސަ ތަހުޤީގެއް ފަށާފައިވާކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވެއްޖެއެވެ.
ސީޕީ މިހެން ވިދާޅުވީ މިއަދު ފަތިހުގެ ވަގުތެއްގައި މާލޭގައި ހުންނަ ނީލަން ފިހާރާާއިގައި ރޯވެ އަނދަމުން ދަނިކޮށް ކުރެއްވި ޓްވީޓެއްގައެވެ. ސީީޕީ ވަނީ މިފަދަ ހާދިސާތައް ތަހުޤީޤު ކުރުމުގައި، އާންމު ރައްޔިތުންގެ އެހީތެރިކަން ބޭނުންވެވަޑައިގަންނަވާކަންވެސް ފާހަގަކުރައްވައިފައެވެ.
ރޭ ފަތިހު 05:40 ގައި މާލޭގައި ހުންނަ ނީލަން ފިހާރައިގައި ހިފި އަލިފާންގަނޑު ކޮންޓްރޯލްކުރެވުނީ ދެ ގަޑިއަރަށްވުރެ ގިނަ އިރު ވީ ފަހުންނެވެ.
މި އަލިފާންގަނޑު ފެތުރި ނީލަން ފިހާރައާއި އިންވަގެން ހުންނަ މާލޭ ސިޓީ ކައުންސިލްގެ މުވައްޒަފުން އެކޮމެޑޭޝަން ބްލޮކުގައި ރޯވެ އެތަންވެސް ވަނީ އަނދައި ހުލިވެފައެވެ.
އެ ބްލޮކްގައި ދިރިއުޅޭ ސިޓީ ކައުންސިލުގެ 166 ބިދޭސީ މުވައްޒަފުން ވަނީ ވަގުތީ ހިޔާއަށް ބަަދަލު ކޮށްފައެވެ. އެމީހުން ބަދަލު ކޮށްފައިވަނީ އިމާދުއްދީން ސްކޫލަށެވެ.
ނައިބު ރައީސް ފައިސަލް ނަސީމާ މާލެ ސިޓީގެ މޭޔަރު ޑރ.މުޙައްމަދު މުޢިއްޒު ވަނީ އަލިފާނުގެ ހާދިސާ ހިނގި ސަރަހައްދަށް ވަޑައިގެން އެމީހުންގެ ހާލު ބައްލަވައިފައެވެ.
