ސިޔާސީ މަޤާމުތަކުގައި ތިއްބަވައިގެން، ރައީސްއަށް ފާޑުކިޔާތީ ނިހާދުގެ ނުރުހުން
ސަރުކާރުގެ އެކި ސިޔާސީ މަޤާމުތަކުގައި ތިބޭ މީހުން ރައީސުލްޖުމްހޫރިއްޔާއަށް ފާޑުކިޔައި، ހަޖޫ ނުޖެހޭނެކަމަށް ރައްޔިތުންގެ މަޖިލީހުގެ ފޭދޫ ދާއިރާގެ މެންބަރު މުޙައްމަދު ނިހާދު ވިދާޅުވެއްޖެއެވެ.
ނިހާދު މިހެން ވިދާޅުވީ، މިމަހުގެ 28 ވަނަ ދުވަހު ބާއްވާ އެމްޑީޕީގެ ރިޔާސީ ޕްރައިމަރީއާ ދިމާކޮށް، ސަރުކާރުގެ ސިޔާސީ މަަޤާމުތަކުގައި ތިއްބެވި ބައެއް ބޭފުޅުން ރައީސް ޞާލިޙަށް ވަރަށްބޮޑަށް ފާޑުކިޔަމުންދާ ދަނޑިވަޅެއްގައެވެ.
މިގޮތުން ފާޑު ވިދާޅުވަމުން ދަނީ، ރައީސް ނަޝީދުގެ ފެކްޝަނުގެ ބޭފުޅުންނެވެ.
ނިހާދު ކުރެއްވި ޓްވީޓެއްގައި ވިދާޅުވީ އެ މީހަކު ތާއީދުކުރާނެ މީހަކަށް ތާއީދުކުރުމަކީ މައްސަލައެއް ނޫންކަމަށެވެ.
ނަމަވެސް ރައީސުލްޖުމްހުރިއްޔާ އައްޔަންކޮށްފައި ތިބޭ ސިޔާސީ ބޭފުޅުން ރައީސްގެ ސިޔާސަތަށް ފާޑު ކިޔައި، ހަޖޫ ޖެހުމަކީ ރައްޔިތުންގެ ފައިސާއަށް ހަރާން ކޯރުވުންކަމަށެވެ.
"އެމީހަކު ތާއީދުކުރާނެ މީހަކަށް ކުރުން އޯކޭ. އެކަމަކު ރައީސުލްޖުމްހުރިއްޔާ އައްޔަންކޮށްފައިވާ މަގާމެއްގައި ހުރެފައި، ރައީސުލްޖުމްހުރިއްޔާގެ ސިޔާސަތަށް ހަޖޫ ޖަހައި ބެވުމާއި ވަގަށް ގޮވުމާއި، ޑިއުޓީއަށް ނުނިކުމެ ގޭގައި އޮވެގެން މުސާރަ ނެގުން ވާނީ ރައްޔިތުންގެ ފައިސާއަށް ހަރާންކޯރުވުމަށް. އެ ފައިސާ ކާންވެސް ހެޔޮނުވާނެ." ނިހާދު ވިދާޅުވިއެވެ.
ނިހާދުވވަނީ ރައީސުލްޖުމްހޫރިއްޔާ އައްޔަންކޮށްފައި ތިބޭ ސިޔާސީ މުވައްޒަފުން ޢަމަލުކުރަންޖެހޭ ގޮތުގެ އުސޫލުވެސް ހިއްސާކުރައްވާފައެވެ.
