ރޯދައަށް ހާއްސަކޮށް ހިޔާ ސަރަހައްދުގައި އެޗްޑީސީން ވަގުތީ މާރުކޭޓެއް ހަދަނީ
ރޯދަ މަހަށް ހާއްސަކޮށްގެން ހިޔާ ސަރަހައްދުގައި ވަގުުތީ މާރުކޭޓެއް ބިނާ ކުރުމަށް 18 ގޮޅިއެއް ދޫކުރުމަށް ނިންމާފައިވާކަމަށް އެޗްޑީސީއިން އިއުލާނުކޮށްފިއެވެ.
އެޗްޑީސިން ވިދާޅުވީ އެ ކުންފުނިންވަނީ ރޯދަމަހަށް ހާއްސަކޮށް ދެވަނަ ފިޔަވަހީގައި ވަގުތީ މާރުކޭޓެއް ބިނާ ކުރުމަށް ނިންމާފައިވާ ކަމަށެވެ. އަދި އެ ސަރަހައްދުން ޖުމުލަކޮށް 18 ގޮޅި ދޫކުރުމަށް ކަނޑައެޅިފައިވާއިރު އެތަނުން 9 ގޮޅިއެއް ހިޔާގައި ދިރިއުޅޭ ފަރާތްތަކަށް ހާއްސަ ކުރެވިގެންދާނެކަމަށް ވިދާޅުވިއެވެ.
އެޗްޑީސީއިން ވިދާޅުވީ ބާކީ 9 ގޮޅި އާންމުކޮށް އިއުލާނުކޮށް ހުޅުވާލާނެ ކަމަށާއި މި މަސައްކަތްތައް ކުރުމުގެ މަގުސަދަކީ ރޯދަމަހުގެ ތެރޭގައި ލުއި ފަސޭހަތަކެއް ހޯދައިދިނުންކަމަށް އެޗްޑީސީން ވިދާޅުވިއެވެ.
މީގެ އިތުރުން މާލެ ސިޓީ ކައުންސިލަށްވެސް ވަގުތީ މާރުކޭޓެއް ހެދުމަށް ބިން ހަމަޖައްސައިދީފައިވާ ކަމަށާއި އެކަން ކުރެވިފައިވަނީ އެ ސަރަހައްދުގައި ދިރިއުޅޭ ރައްޔިތުންނަށް ފައިދާތަކެއް ލިބިގެންދާތީކަަމަށް އެޗްޑީސީން ވިދާޅުވިއެވެ.
އަދި އެސްޓީއޯގެ ވަގުތީ މާރުކޭޓު ބިނާކުރުމަށްވެސް ފުރުސަތު ފަހިކޮށްދީފައިވާ ކަމަށާއި ރައްޔިތުންނަށް ފައިދާ ހުރި ކަމެއް ކުރުމުގައި އެ ކުންފުނީގެ އެއްބާރުލުން އެންމެހާ މުއައްސަސާތަކަށްވެސް ލިބޭނެކަމަށް އެޗްޑީސީން ވިދާޅުވިއެވެ.
