ގުރައިދޫ ދާއިރާގެ ޕްރައިމަރީ: ޕީޕީއެމްގެ ޓިކެޓު ރިޒާގެ ކޮއްކޮއަށް!
އޭޕްރިލް މަހުގެ 15 ވަނަ ދުވަހު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ ހުސްވެފައިވާ ގުރައިދޫ ދާއިރާގެ ގޮނޑިއަށް މެމްބަރަކު ހޮވުމުގެ އިންތިޚާބަށް ޕީޕީއެމްގެ ފަރާތުން ވާދަކުރުމުގެ ޓިކެޓް، ހުސައިން ރިޒާއަށް ދީފިއެވެ.
މިއިންތިހާބުގައި ޕީޕީއެމްގެ ފަރާތުން ވާދަކުރާނެ ކެންޑިޑޭޓެއް ކަނޑައެޅުމަށް ބާއްވާ ޕްރައިމަރީއަށް ކުރިމަތިލުމަށް ހުޅުވާލި ފުރުސަތުގައި އިތުރުފަރާތެއް ކުރިމަތި ނުލާތީ ހުސައިން ރިޒާއަށް ޓިކެޓް ދީފައިވަނީ އިންތިހާބަކާއި ނުލައެވެ.
މީގެ އިތުރުން ރައްޔިތުންގެ މަޖިލީހުގެ ގުރައިދޫ ދާއިރާގެ ގޮނޑިއަށް އެމްއެންޕީންވެސް ކުރިމަތިލާއިރު ސަރުކާރު ހިނގާ މައިޕާޓީ އެމްޑީޕީންވެސް ވަނީ މިގޮނޑިއަށް ކުރިމަތި ލާނެކަމަށް އިއުލާނުކޮށްފައެވެ. މީގެތެރެއިން އެމްއެންޕީ އިން މިގޮނޑިއަށް ކުރިމަތިލުމަށް އަލީ އާރިފަށް މިހާރުވަނީ ޓިކެޓު ދީފައެވެ.
ގުރައިދޫ ދާއިރާގެ ބައި-އިލެކްޝަނަށް އެމްޑީޕީން ޓިކެޓް ހޯދުމަށް ހަތަރު ބޭފުޅަކު ވަނީ ކުރިމަތިލައްވާފައެވެ. ގުރައިދޫ ދާއިރާގެ އެމްޑީޕީގެ ޕްރައިމަރީ ބޭއްވުމަށް އެޕާޓީން ނިންމާފައިވަނީ އަންނަ ހޮނިހިރު ދުވަހުއެވެ.
ރައްޔިތުންގެ މަޖިލީހުގެ ގުރައިދޫ ދާއިރާގެ ބައި-އިލެކްޝަން 2023 އޭޕްރިލް 15 ވާ ހޮނިހިރު ދުވަހު ބާއްވާ ގޮތަށް އިލެކްޝަންސް ކޮމިޝަނުން ވަނީ ނިންމައި އިންތިހާބަށް ވާދަކުރުމަށް ކުރިމަތިލުމުގެ ފުރުސަތު މިހާރު ވަނީ ހުޅުވާލައިފައެވެ.
Ads by STO
