ހިއްސާއަކަށް 77ރ. ބަހަން ފާސްކޮށްފި
މިދިޔަ އަހަރުގެ ފައިދާއިން ކޮންމެ ހިއްސާއަކަށް 77ރ. ބަހަން ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)ގެ ބޯޑުން ނިންމާފައިވާ ގޮތަށް، ހިއްސާދާރުން މިރޭ ފާސްކޮށްފިއެވެ.
ހުޅުމާލޭ ސެންޓްރަލް ޕާކްގައި ބޭއްވި އެ ކުންފުނީގެ އަހަރީ އާންމު ޖަލްސާގައި އެ އަދަދު ފާސްވީ، ޖަލްސާގައި ބައިވެރިވި މީހުންގެ 99 ޕަސެންޓު ވޯޓުންނެވެ.
މިރޭގެ ޖަލްސާގައި އާއްމުކޮށްފައިވާ ކުންފުނީގެ އަހަރީ ރިޕޯޓުން ދައްކާގޮތުގައި ޓެކުހަށް ކެނޑުމަށްފަހު މިދިޔަ އަހަރު ސާފު ފައިދާގެ ގޮތުގައި އެސްޓީއޯއަށް ވަނީ 742 މިލިއަން ރުފިޔާ ރިކޯޑު ކުރެވިފައެވެ. އެއީ އޭގެ ކުރީ އަހަރާ އަޅާ ބަލާއިރު 52 ޕަސެންޓުގެ ކުރިއެރުމެކެވެ.
އެސްޓީއޯ އިން ބުނީ އާމްދަނީ އާއި ކުންފުނީގެ ސާފު ފައިދާ އިން އެހާ ބޮޑު ކުރިއެރުމެއް ލިބުނީ، ކުންފުނީގެ ދަށުން ހިންގާ ތެލާއި ކޮންސްޓްރަކްޝަން ދާއިރާ އާއި ޝިޕިން ދާއިރާ އިން ލިބުނު އާމްދަނީ އިތުރުވެ، ވިޔަފާރިތަކުގެ މާކެޓް ޝެއާ ބޮޑުވުމުގެ ސަބަބުން ކަމަށެވެ.
މީގެ އިތުރުން މިރޭގެ ޖަލްސާގައި އެކުންފުނީގެ ހިއްސާދާރުންގެ ފަރާތުން ނިންމާފައި ވަނީ މިދިޔަ ދައުރުގައި ވެސް ސަރުކާރު ތަމްސީލު ކުރި ޑިރެކްޓަރުން ކުރިއަށް އޮތް ދައުރުގައި ވެސް ބޯޑުގައި ދެމެހެއްޓުމަށެވެ. އަދި ހަމައެހެންމެ އާންމު ހިއްސާދާރުންގެ ފަރާތުން ޑިރެކްޓަރުންގެ ބޯޑަށް އިންތިހާބުކޮށްފައި ވަނީ މުހައްމަދު އަހުސަން ސަލީމް، މއ. ތިއުލިޕްވިލާ، ކ، މާލެ އިންތިހާބުކޮށްފައިވަނީ ޖަލްސާއަށް ހާޒިރުވި މެންބަރުންގެ 66.08 އިންސައްތަ ވޯޓުންނެވެ.
އެސްޓީއޯގެ އަހަރީ އާއްމު ޖަލްސާގައި ހިއްސާގެ ފައިދާގެ އިތުރުން ކުރިއަށް އޮތް އަހަރަށް ކުންފުނީގެ އެކްސްޓާނަލް އޮޑިޓަރެއްގެ ގޮތުގައި ޕްރައިޒް ވޯޓާ ހައުސް ކޫޕާސް ހަމަޖެއްސި އެވެ. އެ ކުންފުންޏަށް އުޖޫރައެއްގެ ގޮތުގައި 63،800 ޑޮލަރު (983،796 ރުފިޔާ) ދިނުމަށް އެސްޓީއޯ އިން ނިންމި އެވެ.
Ads by STO
