އޭޝިއަން އަންޑަރ 20 އެތްލެޓިކްސް މުބާރާތުގެ ޓެކްނިކަލް އޮފިޝަލަކަށް މުންތަގިމް!
އޭޝިއަން އެތުލެޓިކްސް އަންޑަރ 20 މުބާރާތުގައި އެތުލެޓިކްސް އެސޯސިއޭޝަން އޮފް މޯލްޑިވްސްގެ ޖެނެރަލް ސެކްރެޓަރީ އަޙްމަދު މުންތަގިމް (މުންތޭ) ރެފްރީކަންކޮށްފިއެވެ.
އައްޑޫ އިންޓަ ސްކޫލް އެތުލެޓިކްސް މީޓުގައި 1996 ވަނަ އަހަރު އެންމެ ފުރަތަމަ އޮފިޝަލްކުރަން ފެށި މުންތަގިމަކީ މިވަގުތު ރާއްޖޭގައި ހުރި އެންމެ ތަޖުރިބާކާރު އެއް އެތުލެޓިކްސް ރެފްރީއެވެ. ސްޕޯޓްސް ޑިވިޝަނުގައި 1995 ވަނަ އަހަރު ވަޒީފާއަދަކުރަން ފަށައި 1999 ވަނަ އަހަރުން ފެށިގެން އެތުލެޓިކްސް އެސޯސިއޭޝަނުގައި މުންތަގިމް މަސައްކަތް ކުރަމުން އަންނައިރު އޭނާ އަކީ 2008 ވަނަ އަހަރުން ފެށިގެން އެތުލެޓިކްސް އެސޯސިއޭޝަނުގެ ޖެނެރަލް ސެކްރެޓަރީއެވެ.
މުންތަގިމަކީ އިންޓަނޭޝަނަލް އެސޯސިއޭޝަން އޮފް އެތުލެޓިކްސް ފެޑެރޭޝަން (އައިއޭއޭއެފް) ގެ ލެވެލް ދޭއްގެ ރެފުރީ ފާސް އޮންނަ ހަމައެކަނި ދިވެހި ރެފުރީއެވެ. އޭނާ އަދާކޮށްފައިވާ ރޯލްތަކުގެ ތެރޭގައި ރެފްރީ ފޯ ވިމެން ލޯންގް ޖަމްޕް، މެން ޓްރިޕަލް ޖަމްޕް، ވިމަން ޝޮޓް ޕުޓް މެން ހެމާ ތްރޯ ހިމެނެއެވެ.
މުންތަގިމް ވަނީ ބައިނަލްއަގުވާމީ ގިނަ މުބާރާތްތަކެއްގައި ވެސް މަސައްކަތް ކޮށްފައެވެ. އޭގެ ތެރޭގައި އޭޝިއަން ޖޫނިއަރ އެތުލެޓިކްސް ޗެމްޕިއަންޝިޕު (ދެފަހަރު)، އޭޝިއަން ޔޫތް އެތުލެޓިކްސް ޗެމްޕިއަންޝިޕް، އޭޝިއަން ކްރޮސް ކަންޓްރީ، ސައުތް އީސްޓް އޭޝިއަން ގޭމްސް، ސައުތް އޭޝިއަން ގޭމްސް އަދި ދަކާމެރެތަން (ދެ ފަހަރު) ހިމެނެއެވެ.
