މިއީ ތާރީޚުގައި ވެސް ހެދުނު އެންމެ ބޮޑު ކޯލިޝަން: ރައީސް

އެމްޑީޕީ އާއި އަދާލަތު ޕާޓީ އަދި އެމްޑީއޭގެ ކޯލިޝަނަކީ ތާރީޚުގައި ވެސް މިހައިތަނަށް ހެދުނު އެންމެ ބޮޑު ކޯލިޝަން ކަމަށް ރައީީސް އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.

Ads by MWSC

ރައީސް މިފަދައިން ވިދާޅުވީ، ކ.އަތޮޅު ގުރައިދޫއަށް ވަޑައިގެން އެ ރަށުގައި ބޭއްވި ކަންމަތީ ޖަލްސާގައި މިއަދު ވާހަކަފުޅު ދައްކަވަމުންނެވެ.

"މިއީ ރާއްޖޭގެ ތާރީޚުގައި އިންތިޚާބަކަށް ކުރިމަތިލާ، އެންމެ ގިނަ މެމްބަރުން ތިބި ކޯލިޝަން. މިހައިތަނަށް މިހާ މެމްބަރުން ގިނަ ކޯލިޝަނެއް ރާއްޖޭގައި ހެދިފައެއް ނެތް. އަޅުގަނޑުމެންގެ އަމާޒަކީ އެ ދުވަހު ވޯޓުލާއިރު، އެއް ލައްކަ ވޯޓުން ފެށުން."

ރައީސް ވިދާޅުވީ، އެއްލައްކަ ވޯޓު ލިބުމުން، އިންތިޚާބު ކާމިޔާބު ކުރުމަށް މަދުވާ ވޯޓު މާލެ އަތޮޅުން ހަމަކޮށްލެވޭނެ ކަމަށެވެ.

ރައީސް ޞާލިޙު އިތުރަށް ވިދާޅުވީ ތަރައްޤީ އަކީ ހަމަޖެހޭ އުފާވެރި ދިރިއުޅުމެއް ލިބުން ކަމަށާއި، އެމްޑީޕީން ގެނެސްދޭ ތަރައްޤީ އަކީ އެއީ ކަމަށެވެ.

"ހަލަބޮލިކަމުން ނެއްޓި، އަމާންކަން އޮތް ޖައްވެއްގައި، ދިރިއުޅުން ހޭދަ ކުރުން. އިރާދަކުރެއްވިއްޔާ، އަޅުގަނޑުމެން ފަށައިގެން މި ގެންދާ މަސައްކަތް، ފުރިހަމަ ކުރާނީ، އެމްޑީއޭ އާއި ޢަދާލަތު ޕާޓީއާއިއެކުގައި."

ރައީީސް ޞާލިޙުގެ ވާހަކަފުޅުގައި ގުރައިދޫ ދާއިރާއަށް ސަރުކާރުންވި ވަޢުދުތައް ގާާތްގަނޑަކަށް ފުއްދިފައިވާ ކަމަށް ވިދާޅުވިއެވެ. އަދި ގުރައިދޫ ދާއިރާއިން 2018 ވަނަ އަހަރުގެ ރިޔާސީ އިންތިޚާބުގައި މެޖޯރިޓީ ނުލިބުނަސް، މި ފަހަރު ލިބޭނެ ކަމަށް ޔަޤީން ކުރައްވާ ކަމަށް ވިދާޅުވިއެވެ.