މުލީ އެމްޑީޕީ ހަރުގެއަށް ކަޅު ތެޔޮ ޖަހައިފި
މ. މުލީ އެމްޑީޕީ ހަރުގެއަށް ކަޅު ތެޔޮ ޖަހައިފިއެވެ.
އެމްޑީޕީން ހާމަކޮށްފައިވާ ގޮތުގައި ކަޅު ތެޔޮ ޖެހުމަށްފަހު ތަނަށް ގެއްލުން ދޭން ވެސް ވަނީ މަސައްކަތްކޮށްފައެވެ. އެގޮތުން ހަރުގޭގައި ހުރި ޓީވީ ބޮކްސްއަށް ގެއްލުން ދޭން މަސައްކަތްކޮށްފައިވާއިރު, މިކަމެއް ހިނގާފައިވަނީ ރޭ ދަންވަރުގެ ވަގުތެއްގައެވެ.
މިކަން ކުރި ބަޔަކު އަދި ދެނެގަނެވިފައެއް ނުވެއެވެ.
ރިޔާސީ އިންތިޚާބަށް ކުޑަ ދުވަސްކޮޅެއް ވެފައިވާއިރު, ރިޔާސީ އިންތިޚާބުގެ ފޯރި ދަނީ ގަދަވަމުންނެވެ.
އެމްޑީޕީގެ ރިޔާސީ ކެނޑިޑޭޓް އިބްރާޙީމް މުޙައްމަދު ޞާލިޙް ވެސް ގެންދަވަނީ ރާއްޖޭގެ ރަށްތަކަށް ކެންޕެއިން ދަތުރު ކުރައްވަމުންނެވެ. ރައީސް ވަޑައިގަންނަވާ ރަށްރަށުން ރައީސަށް މަރުޙަބާ ކިޔަން ގިނަ ބަޔަކު ނިކުންނައިރު, އިދިކޮޅުގެ ފަރާތްތަކުން އަންނަނީ ރައީސް ޞާލިޙްގެ އިސްތިއުފާއަށް ގޮވާލާ ކޮންމެ ރަށެއް ކަހަލަ ގޮތަކަށް މުޒާހަރާތައް ކުރަމުންނެވެ.
މި އަހަރުގެ ރިޔާސީ އިންތިޚާބު އޮންނާނީ ސެޕްޓެންބަރު މަހުގެ 9ގައެވެ. ރިޔާސީ އިންތިޚާބަށް ނަން ފޮނުވުމަށް އަންނަ އާދީއްތަ ދުވަހު ހުޅުވާލާނެއެވެ.
