ފްލޯރަލް ކްލޯވްސް: އުމުރުން އެންމެ 16 އަހަރުގައި ފައުޒާގެ ދުރުވިސްނުމުން ފެށި ވަރަށް ނަލަ ވިޔަފާރިއެއް

އަޅުގަނޑުމެންގެ ތެރޭގައި ގިނައީ ފުރާވަރުގެ އުމުރު މަޖަލާއި، ސަކަރާތް ޖެހުމުގައި ހޭދަ ކޮށްލާ ކުދިންނެވެ. އެއުމުރަކީ ދިރިއުޅުމާއިމެދު މާބޮޑު ޚިޔާލެއް ފިކުރެއް، އަދި ވަކިން ޚާއްސަކޮށް މުސްތަޤުބަލު އުޖާލާ ކުރުމަށް ވިސްނުންްތަކެއް ވިސްނި ކަމުުގައި ވިޔަސްް، އެކަމާއިމެދު ޢަމަލީ ގޮތުން މާބޮޑު މަސައްކަތެއް ކުރެވޭ އުމުރެއް ނޫނެވެ.

Ads by Hajj Corporation

ނަމަވެސް ރ. މީދޫ އަށް އުފަން ފައުޒާ ޙުސެއިން ފަޔާޒް (18އ.) ގެ ވިސްނުން ވަރަށް ތަފާތެވެ. އޭނާވަނީ ނުހަނު ހިތްވަރާއެކު އުމުރުންް އެންމެ 16 އަހަރުގައި އަމިއްލައަށް އާމްދަނީ ހޯދުމަށް ވިޔަފާރިއެއް ފަށާ، މިވީ ދެ އަހަރު ދުވަހުގެ ތެރޭގައި ނުހަނު ހިތްވަރާއެކު އެވިޔަފާރި ފުޅާކޮށް ލާމަސީލު ނަމޫނާއެއްކަން ދައްކާފައެވެ.

ފައުޒާގެ ވިޔަފާރީގެ ވާހަކަ "ދެން" އަށް ހިއްސާ ކުރަމުން އޭނާ ބުނީ، އޭނާ އަކީ އެކިއެކި ޕާޓީތަކާއި އެނޫން ވެސް ޙަފްލާތައް ޒީނަތްތެރި ކުރުމުގެ ގޮތުން އެއްޗެހި ތައްޔާރު ކޮށްދޭ މީހެއް ކަމަށެވެ.

"ވިޔަފާރީގެ ނަމަކަށް ކިޔާފައިވާނީ 'ފްލޯރަލް ކްލޯވްސް'. އަޅުގަނޑު ހަދަނީ ކައިވެނީގެ ޙަފްލާތަކުގެ ޑެކޮރޭޝަންސް އާއި ޕާޓީ ޑެކަރޭޝަންސް. ވެޑިންގ ޕާޓީއަށް ބޭނުންވާ ހުރިހާ އެއްޗެއް ވެސް ހަދައިދެން. އޭގެ ތެރޭގައި ބުކޭ، ބެކްޑްރޮޕް ހިމެނޭ. އޭގެ އިތުރުންް ބޭބީ މޮބައިލް (ތުއްތު ކުދިންްގެ ނިދާކޮޓަރި ޒީނަތްތެރިކުރަން ބޭނުންކޮށްފައި ހުންނަ ސާމާނާއި އަކުރުބަރި) ވެސްް ހަދައިދެން. ވެޑިންްގ ބޯވް ޓައީ އާއި ހެޑް ޕީސް ވެސް ހަދައިދެން. ވެޑިންގ ކޭކުގެ އިތުރުން ޑެޒާޓް ޓޭބަލްް ވެސް ހަދައިދެން" ފައުޒާ ބުންޏެވެ.

މިއީ ހަމަޔަގީނުން ވެސް ޒުވާނަކު ކުރަން ވަރަށް ގިނަ ވަރަށް ބުރަ މަސައްކަތް ތަކެކެވެ. ފައުޒާ ބުނި ގޮތުގައި އޮންލައިންކޮށް އެންމެ ފުރަތަމަ އޯޑަރު ނަގަން ފެށި އެމަސައްކަތް ފަހުން އޭނާ ވަނީ ފުޅާކޮށް މީދޫގައި ފިހާރައެއް ވެސް ހުޅުވާފައެވެ. ނަމަވެސް ކޮވިޑުގެ ބަލިމަޑުކަން ރާއްޖެއަށް ފެތުރުމުން މިހާރު ވަނީ ފިހާރު ބަންދުކޮށް، އަނެއްކާވެސް އޮންލައިންކޮށް އޯޑަރު ނަގަން ފަށާފައެވެ.

"ކުރިއާއި އަޅާބަލާފައި ވެޑިންގ ޑެކަރޭޝަން އޯޑަރުތައް މިހާރު ތަންކޮޅެއް މަދު. އެކަމަކު ބޭބީ މޮބައިލްް އޯޑަރުތައް ފުދޭވަރަަކަށް ލިބޭ. އޭގެ އިތުރުން ގިފްޓް ބޮކްސް ކަހަލަ އެއްޗެހި، ޗޮކްލެޓް ބުކޭ ކަހަލަ އެއްޗެހި ހަދަން ވެސް ތަންކޮޅެއް ގިނައިން ލިބޭ މިހާރު އޯޑަރު." ފައުޒާ ބުންޏެވެ.

އުމުރުން އެންމެ 16 އަހަރުގައި ފައުޒާ މިމަސައްކަތް ފަށާފައިވާއިރު، މިފަދަ މަސައްކަތެއް ފެށުމުގެ ވިސްނުން އައީ ކިހިނެއްތޯ ވެސް އޮޅުން ފިލުވާލަން ބޭނުންވިއެވެ.

"އެންމެ ކުޑައިރުވެސް ދެކެމުން އައި ހުވަފެނެއް ވިޔަފާރިއެއް ފެށުމަކީ. އުންމީދަކީ ޒުވާން ވިޔަފާރިވެރިއަކަށް ވުން"

"ވަރަށް ގިނައިން މިކަހަލަ އަތްތެރި މަސައްކަތް ގޭގައި އިނދެގެން ކުރިން ވެސް ކުރަން، ޔޫޓިއުބް ބަލައިގެން ވެސް. ދެން އުމުރުންް 16 އަހަރުގައި ސްކޫލް ނިންމާލާފައި މާލެ އައިތަނުން ފެނުނީ 'ތަފޫސް ބްރައިޑަލް' އިން ކޯހެއް ފަށާފައި އިންދާ. ދެ ހަފްތާގެ ކޯހެއް އެއީ. އެކޯހުގައި ބައިވެރިވެގެން ދަސްކުރީ ބުކޭ އާއި އެއްޗެހި ހަދަން. އަތްތެރި މަސައްކަތުގެ ތެރެއިން ރަން ހެދުމާއި ބޭބީ މޮބައިލް އަދި އެހެން އެއްޗެހި ހަދަން ދަސްކުރީ އަމިއްލައަށް. ބެކްޑްރޮޕެއް ވެސް ހަދާލިން ރަށްޓެއްސަކާއި ގުޅިގެން ހަމަ ވަަރަށް ބޮޑުކޮށް" ފައުޒާ ބުންޏެވެ.

މިހާ ބޮޑު މަސައްކަތްތަކެއް ފުރިހަމަ ކުރުމުގައި ހަމަ ޔަގީނުން ވެސް އެހެން ބައެއްގެ އެހީތެރިކަން ވެސް ފައުޒާއަށް ލިބޭނެއެވެ. އެގޮތުން މިމަސައްކަތުގައި ފައުޒާއަށް އެންމެ އެހީތެރިވެދޭ ފަރާތްތައް އޭނާ ވަނީ ފާހަގަ ކޮށްފައެވެ.

"އެއް އުމުރެއްގެ ދެބެންގެ ދެދަރި ކުދިން އުޅޭނެ، އެމީހުން ވަރަށް އެހީވެދޭ. މަންމައާއި ބައްޕަވެސް ވަރަށް ބޮޑަށް އެހީތެރިވެދޭ. ދެން އަޅުގަނޑުގެ ވަރަށް ޚާއްސަ މީހެއް ވެސް އެހީތެރިވެދޭ. އޭގެ އިތުރުންް ތަފޫ ވެސް ވަރަށް އެހީވެދޭ" ފައުޒާ ބުންޏެވެ.

ފައުޒާގެ މިމަސައްކަތަކީ ހަމައެކަނި ރ. މީދޫގެ ރައްޔިތުންނަށް އެކަނި އޭނާ ފޯރުކޮށްދޭ ޚިދުމަތެއް ނޫނެވެ. ފެރީއަށް ލާފައި ރ. އަތޮޅުގެ ރަށްތަކަށް ވެސް އޯޑަރ ޑެލިވަރ ކޮށްދިނުމުގެ އިތުރުން އެހެން ރަށްތަކަށް ވެސް ޑެލިވަރ ކޮށްދެއެވެ.

"އެހެން ރަށްތަކަށް އޯޑަރު ކުރަންޏާ އަޅުގަނޑު އާއްމުކޮށް އޯޑަރު ނަގަނީ ދެ މަހެއްހާވަރު ކުރިންް. އެކަމަކު ބައެއް މީހުން ރިކުއެސްޓު ކުރޭ ބޭނުންވާ ދުވަހުގެ ހަފްތާއަކަށް ވެސް ވެފައި ހުއްޓާ. ތަންކޮޅެއް އުނދަގޫވޭ އެހާ ވަގުތު ކައިރިވެފައި ވަނިކޮށް ބުނީމަ. އެކަމަކު ވެސް ކޮށްދެން" ފައުޒާ ބުންޏެވެެ.

ފައުޒާގެ މަސައްކަތްތައް އިތުރަށް ބަލާލުމަށާއި، އެމަސައްކަތްތަކުގެ އަޖުމަ ބަލާލުމަށް އޯޑަރު ދިނުމަށް "Floral Cloves"  (ފްލޯރަލް ކްލީވްސް) ފޭސްބުކް ޕޭޖަށާއި އިންސްޓަގްރާމް ޕޭޖަށް ބަލާލައި، މެސެޖު ކޮށްލުމަށް އޭނާ އެދެއެވެ.