ބޮޑެތި ގޮންޖެހުންތައް ކުރިމަތިވި އިރުވެސް، ރައީސް ޞާލިޙް އިސްކުރެއްވީ ކެތްތެރިކަން: ޝެއިޚް އިލްޔާސް

ރާއްޖޭގެ އެތެރެއިންނާއި ރާއްޖެއިން ބޭރުންވެސް ރައީސް އިބްރާހީމް މުޙައްމަދު ޞާލިޙުއަށް ކުރިމަތިވެވަޑައިގެންނެވި ގޮންޖެހުންތަކާއެކުގަވެސް ރައީސް އިސްކުރެއްވީ ކެތްތެރިކަންކަމުގައި ޝެއިޚް އިލްޔާސް ވިދާޅުވެއްޖެއެވެ.

Ads by Sosun Fihaara

ރާއްޖޭގައި އިސްލާމްދީނާއި ދީނުގެ ކަންތައްތައް ކުރިއެރުވުމަށް މަސައްކަތްކުރާ ބައެއް ބޭފުޅުންގެ ތާއީދު ރައީސް ޞާލިޙުއަށް އޮތްކަމަށް ހާމަކުރައްވައި އަދާލަތު ޕާޓީގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ރާއްޖޭގައި ދީނީ ދަރުސް ދިނުމާއި، ދީނުގެ ކަންކަން އުނގަންނައި ދިނުމަށް މަސައްކަތްކުރައްވާ 24 ބޭފުޅަކު ވަނީ ބައިވެރިވެވަޑައިގެންފައެވެ.

ޝެއިޚް އިލްޔާސް ވިދާޅުވީ ރައީސް ޞާލިޙުއާ ދިމާވި އެތަކެއް ގޮންޖެހުންތަކާއެކުގައިވެސް ވެރިއެއްގެ ކިބައިގައި ހުންނަންޖެހޭ ކެތްތެރިކަން ދައްކާފައިވާކަމަށާއި އަނިޔާވެރިކަން އިސްނުކޮށް ސިޔާސީ ޚިޔާލުތަފާތުވުންތަކަށް ފުރުޞަތު ދެއްވާފައިވާކަމަށެވެ.

އަދި ރާއްޖޭގެ އެތައް ބަޔަކު ރައީސްގެ ޚުލްޤު ހެޔޮކަމަށް ހެކިވާނެކަމަށާއި، ރާއްޖޭގައި ސިޔާސީ ހަލަބޮލިކަން ފެށިގެން ދިޔަފަހުން މި 5 އަހަރަކީ އެންމެ ސުލްޙަވެރި 5 އަހަރުކަމަށްވެސް އިލްޔާސް ވިދާޅުވިއެވެ.

އިލްޔާސްގެ އިތުރުން މި ނޫސްވެރިންގެ ބައްދަލުވުމުގައި ވާހަކަ ދެއްކެވި ޑރ. ޤުބާދު ރައީސް ޞާލިޙުއަށް ތަޢުރީފްކުރައްވާ ވިދާޅުވީ ރައީސްއަށް ތާއީދުކުރުމަށް ނިންމެވީ ރާއްޖޭގައި ތަފާތު ސިޔާސީ ފިކުރުތަކާއެކު ސުލްޙަވެރިކޮށް މަސައްކަތް ކުރެއްވުމުގެ ޙިކުމަތާއި، އޯގާތެރިކަމާއި، މަޑުމައިތިރި ކަމާއި ހިތްތިރިކަން އެމަނިކުފާނުގެ ކިބައިގައި ހުރުމުން ކަމަށެވެ.

ޑރ. އިޔާޒު ވާހަކަ ދައްކަވަމުން ވިދާޅުވީ ޢިލްމުވެރިންގެ ކަންބޮޑުވުންތައް އަޑުއައްސަވައި އެކަންތައްތަކަށް ޙައްލު ހޯއްދަވައިދެއްވީ ރައީސް ޞާލިޙުކަމަށެވެ. އެގޮތުން މޫނު ބުރުގާ އަޅާ ޓީޗަރުން ކިޔަވައިދިނުމުގައި ދިމާވި މައްސަލައާއި، އެމް.ޑީ.އެންގެ މައްސަލައާއި ނަފުރަތުގެ ބިލުގެ މައްސަލާގައި ވެސް ޢިލްމުވެރިން އެދުނު ގޮތަށް ކަންތައްތައް އިސްލާޙުކޮށްދެއްވީ ރައީސްކަމަށް އިޔާޒު ވިދާޅުވިއެވެ.

މި ބައްދަލުވުމުގައި ބައިވެރިވެވަޑައިގެންނެވި ޢިލްމުވެރިންގެ އިތުރުން ވެސް ރައީސް ޞާލިޙުއަށް ތާއީދުކުރައްވާ ބޭފުޅުން އެބަ ތިއްބެވިކަމަށް އިލްޔާސް ވިދާޅުވިއެވެ.