ރިޔާސީ އިންތިޚާބު އޮބްޒާވްކުރުމަށް ކޮމަންވެލްތުގެ ވަފުދު ރާއްޖެ އަތުވެއްޖެ

ކޮމަންވެލްތުގެ ވަފްދުގައި 10 މެންބަރުން ހިމެނިވަޑައިގަންނަވާއިރު، މި ޓީމު ލީޑު ކުރައްވާނީ، ސީޝެލްސްގެ ކުރީގެ ރައީސް ޑެނީ ފައުރޭއެވެ. އެގޮތުން އެމަނިކުފާނު ވަނީ 2023 ވަނަ އަހަރު ރާއްޖޭގައި ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި ކޮމަންވެލްތުގެ އޮބްޒާވަރުން ތިބުމަކީ ކޮމަންވެލްތުން ދިވެހި ރައްޔިތުންނާ އެކު ދެމިއޮންނާނެ އެއްބައިވަންތަކަން ސާބިތުކޮށްދޭ ކަމެއް ކަމަށް ވިދާޅުވެފައިވެއެވެ.
"މި މުހިންމު ޑިމޮކްރެޓިކް މަސައްކަތުގައި ބައިވެރިވުމަކީ ލިބޭ ވަރަށް ބޮޑު ޝަރަފެއް. މި ދަނޑިވަޅަކީ މިހާ މުހިންމުވެގެންދަނީ ދަނީ 2020 ވަނަ އަހަރުގެ ފެބްރުއަރީ މަހު ރާއްޖެ އަލުން ކޮމަންވެލްތާ ގުޅުނު ފަހުން ރާއްޖޭގައި އިންތިހާބެއް އޮބްޒާވް ކުރާ ފުރަތަމަ ކޮމަންވެލްތު އޮބްޒާވަރ ގްރޫޕަށް ވާނެތީ." ޑެނީ ފައުރޭ ވިދާޅުވިއެވެ.
ކޮމަންވެލްތުގައި ވަފުދުން ހޮނިހިރު ދުވަހު އޮންނަ އިންތިހާބު އޮބްޒާވް ކުރުމަށް ފަހު އިންތިހާބުގެ ކަންކަން ހިނގައިދިޔަ ގޮތާ ގުޅޭ ގޮތުން ރިޕޯޓެއް އެކުލަވާލާނެއެވެ.
މި ރިޕޯޓުގައި އިންތިހާބުގެ ކުރިން ކަންކަން ހިނގައިދިޔަ ގޮތާއި ވޯޓުލާ ދުވަހުގެ ކަންކަމާ އަދި ވޯޓަށް ފަހު ހިނގާކަންކަން މޮނިޓާކޮށް އެ މައުލޫމާތު ރިޕޯޓުގައި ހިމަނާނެއެވެ.
މި ގްރޫޕުގެ ފައިނަލް ރިޕޯޓް ކޮމަންވެލްތުގެ ސެކްރެޓަރީ ޖެނެރަލް، އާރްޓީ އޮނަރަބަލް ޕެޓްރީޝިއާ ސްކޮޓްލޭންޑް ކޭސީ، ދިވެހި ސަރުކާރާއި އިލެކްޝަންސް ކޮމިޝަނާއި ސިޔާސީ ޕާޓީތަކާއި ކޮމަންވެލްތުގެ މެމްބަރު ސަރުކާރުތަކަށް ހުށަހަޅަން ވަނީ ހަމަޖެހިފައެވެ. އަދި ފަހުން އެ ރިޕޯޓް އާންމުންނަށް ލިބޭނެ އިންތިޒާމު ހަމަޖައްސާނެ ކަމަށް ކޮމަންވެލްތުން މައުލޫމާތުދެއްވައެވެ.





ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.