ރިޔާސީ އިންތިޚާބު އޮބްޒާވްކުރުމަށް ކޮމަންވެލްތުގެ ވަފުދު ރާއްޖެ އަތުވެއްޖެ
ކޮމަންވެލްތުގެ ވަފްދުގައި 10 މެންބަރުން ހިމެނިވަޑައިގަންނަވާއިރު، މި ޓީމު ލީޑު ކުރައްވާނީ، ސީޝެލްސްގެ ކުރީގެ ރައީސް ޑެނީ ފައުރޭއެވެ. އެގޮތުން އެމަނިކުފާނު ވަނީ 2023 ވަނަ އަހަރު ރާއްޖޭގައި ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި ކޮމަންވެލްތުގެ އޮބްޒާވަރުން ތިބުމަކީ ކޮމަންވެލްތުން ދިވެހި ރައްޔިތުންނާ އެކު ދެމިއޮންނާނެ އެއްބައިވަންތަކަން ސާބިތުކޮށްދޭ ކަމެއް ކަމަށް ވިދާޅުވެފައިވެއެވެ.
"މި މުހިންމު ޑިމޮކްރެޓިކް މަސައްކަތުގައި ބައިވެރިވުމަކީ ލިބޭ ވަރަށް ބޮޑު ޝަރަފެއް. މި ދަނޑިވަޅަކީ މިހާ މުހިންމުވެގެންދަނީ ދަނީ 2020 ވަނަ އަހަރުގެ ފެބްރުއަރީ މަހު ރާއްޖެ އަލުން ކޮމަންވެލްތާ ގުޅުނު ފަހުން ރާއްޖޭގައި އިންތިހާބެއް އޮބްޒާވް ކުރާ ފުރަތަމަ ކޮމަންވެލްތު އޮބްޒާވަރ ގްރޫޕަށް ވާނެތީ." ޑެނީ ފައުރޭ ވިދާޅުވިއެވެ.
ކޮމަންވެލްތުގައި ވަފުދުން ހޮނިހިރު ދުވަހު އޮންނަ އިންތިހާބު އޮބްޒާވް ކުރުމަށް ފަހު އިންތިހާބުގެ ކަންކަން ހިނގައިދިޔަ ގޮތާ ގުޅޭ ގޮތުން ރިޕޯޓެއް އެކުލަވާލާނެއެވެ.
މި ރިޕޯޓުގައި އިންތިހާބުގެ ކުރިން ކަންކަން ހިނގައިދިޔަ ގޮތާއި ވޯޓުލާ ދުވަހުގެ ކަންކަމާ އަދި ވޯޓަށް ފަހު ހިނގާކަންކަން މޮނިޓާކޮށް އެ މައުލޫމާތު ރިޕޯޓުގައި ހިމަނާނެއެވެ.
މިފަހަރުގެ ރިޔާސީ އިންތިޚާބުގައި ވޯޓުލުމުގެ ހައްގު ލިބިގެންވާ 282،395 މީހުން އެބަތިބިކަމަށާއި އޮބްޒާވަރުންގެ މިނިވަންކަމަށް ޑެނީ ފައުރޭ ވަނީ ބާރު އަޅުއްވާފައެވެ
"އަޅުގަނޑުމެންގެ މެންޑޭޓަކީ އޮބްޒާވް ކުރުން، އިންތިހާބީ މަރުހަލާއަށް ނުފޫޒު ފޯރުވުން ނޫން،" އެމަނިކުފާނު ވިދާޅުވި އެވެ.
ކޮމަންވެލްތުގެ އޮބްޒާވަރުން އިންތިޚާބުގެ ކުރިން އޮތް މާހައުލާއި ވޯޓުލާ ދުވަހާއި އިންތިހާބަށް ފަހުގެ މުއްދަތު އިވެލުއޭޓް ކުރައްވާނެ ކަމަށާއި އެ އޮބްޒާވަރުންގެ އޮބްޒަވޭޝަންތަކުގެ ފުރިހަމަ ތަފްސީލެއް ދެއްވާނެ ކަމަށްވެސް އެމަނިކުފާނު ވިދާޅުވިއެވެ.
ކޮމަންވެލްތު އޮބްޒާވަރ ގްރޫޕްގެ މެމްބަރުން ސެޕްޓެމްބަރު މަހުގެ ދެ ވަނަ ދުވަހު ރާއްޖެ އައިސްފައިވާއިރު، އެ ގްރޫޕް މަޑުކުރާނީ ސެޕްޓެމްބަރު މަހުގެ 15 ވަނަ ދުވަހުގެ ނިޔަލަށެވެ. އަދި ކުރިއަށް އޮތް ދުވަސްތަކުގެ ތެރޭގައި އޮބްޒާވަރުންނަށް އިލެކްޝަންސް ކޮމިޝަނުގެ އޮފިޝަލުންނާއި ސިޔާސީ ޕާޓީތަކުގެ މަންދޫބުންނާއި މަދަނީ ޖަމިއްޔާޖަމާއަތްތަކުގެ މަންދޫބުންނާއި ފުލުހުންނާއި ޑިޕްލޮމެޓިކް ކޮމިއުނިޓީގެ މެމްބަރުންނާއި ސިޓިޒަން އަދި ބައިނަލްއަގުވާމީ އޮބްޒާވަރުންގެ ބްރީފިންތައް ހޯއްދަވާނެކަމަށް މައުލޫމާތު ލިބެއެވެ.
މި ގްރޫޕުގެ ފައިނަލް ރިޕޯޓް ކޮމަންވެލްތުގެ ސެކްރެޓަރީ ޖެނެރަލް، އާރްޓީ އޮނަރަބަލް ޕެޓްރީޝިއާ ސްކޮޓްލޭންޑް ކޭސީ، ދިވެހި ސަރުކާރާއި އިލެކްޝަންސް ކޮމިޝަނާއި ސިޔާސީ ޕާޓީތަކާއި ކޮމަންވެލްތުގެ މެމްބަރު ސަރުކާރުތަކަށް ހުށަހަޅަން ވަނީ ހަމަޖެހިފައެވެ. އަދި ފަހުން އެ ރިޕޯޓް އާންމުންނަށް ލިބޭނެ އިންތިޒާމު ހަމަޖައްސާނެ ކަމަށް ކޮމަންވެލްތުން މައުލޫމާތުދެއްވައެވެ.
