ވޯޓުކޮޅެއް ބޭނުންވުމުން، މައްސަލަ އަނބުރާ ގެންދިޔުމަކީ ބޮޑު ސަކަރާާތް ގަނޑެއް ނޫންތޯ؟: ބޮންޑޭ
ދަ ޑިމޮކްރެޓްސް އާއި ރައީސް މުހައްމަދު ނަޝީދުގެ ތާއީދާއިއެކު ސަރުކާރުން "ވޯޓުކޮޅެއް" ބޭނުންވުމުން، މަޖިލީހުގެ ރައީސް ނަޝީދާއި، ނައިބު ރައީސް އީވާގެ މައްސަލަ އަނބުރާ ގެންދިޔުމުން، މާފަންނު މެދު ދާއިރާގެ މެމްބަރު އިބްރާހީމް ރަޝީދު(ބޮންޑޭ) ފާޑުވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަ ދައްކަވަމުން ބޮންޑޭ ވިދާޅުވީ، ވޯޓުކޮޅެއް ބޭނުންވުމުން، މައްސަލަ އަނބުރާ ގެންދިޔުމަކީ ސަކަރާތްގަނޑެއް ކަމަށެވެ.
"ރައްޔިތުންގެ މަޖިލީހުގައި އިތުބާރު ނެތްކަމުގެ މައްސަލަ މި ވެއްދީ ކަނޑުގެ ސަރަހައްދު ވިއްކައިލި ހިސާބުން. އެހެންވީމަ، އެ މައްސަލައިގައި އަޅުގަނޑުމެންނަށް ކުރިއަށް ދެވޭނެ ގޮތެއް ހޯދަންޖެހޭ."އޭނާ ވިދާޅުވިއެވެ.
ބޮންޑޭ ވިދާޅުވީ، ހެއްދެވުނު ގޯސްތައް ރަނގަޅު ކުރައްވާނެ ކަމަށް ރައީސް އިބްރާހީމް މުޙައްމަދު ޞާލިޙު ވިދާޅުވިއިރު، މޮރިޝަސް އާއި ރާއްޖޭގެ ކަނޑުގެ ފުށު އަރާ ސަރަހައްދުގެ އިން ކަނޑައެޅުމުގެ މައްސަލައިގައި މޮރިޝަސްގެ ބޮޑުވަޒީރަށް ފޮނުއްވި ސިޓީވެސް ހާމަކުރަން ޖެހޭނެ ކަމަށެވެ.
"އަދި އޭގެއިތުރުން، ރައީީސް ނަޝީދުގެ ކިބައިން މައާފަށް ވެސް އެދިވަޑައިގަންނަވާނެ."
ބޮންޑޭ އިތުރަށް ވިދާޅުވީ އެމްޑީޕީގެ ގައުމީ މަޖިލީހުން ވެސް، ރައީސް މުހައްމަދު ނަޝީދުގެ އަރިހުން މައާފަށް އެދިވަޑައިގަންނަވަން ޖެހިވަޑައިގަންނަވާނެ ކަމަށެވެ.
ނަޝީދާއި އީވާ މަގާމުން ވަކި ކުރުމުގެ މައްސަލަ މިއަދުގެ ޖަލްސާ އަށް އެޖެންޑާ ކުރުމުން އެމަނިކުފާނާއި އީވާގެ މައްސަލަ އަނބުރާ ގެންދަން އެމްޑީޕީގެ ޕާލަމެންޓަރީ ގުރޫޕުން ރޭ ވަނީ ނިންމައިފައެވެ.
މިއަދުގެ މަޖިލީހުގެ ޖަލްސާ ފައްޓަވަމުން، ރިޔާސަތުގައި އިންނެވި ރައީސް ނަޝީދު ވިދާޅުވީ އެމަނިކުފާނު ވަކިކުރުމުގެ މައްސަލާގައި ސޮއިކުރެއްވި މެމްބަރުންގެ ތެރެއިން 25 މެމްބަރުން ނަން އަނބުރާ ގެންދެވިއިރު، މައްސަލަ ކުރިއަށް ގެންދަންޖެހޭ އަދަދު އަދިވެސް ހަމަވާ ކަމުގައެވެ.
އަދި އިތުރު އަށް މެމްބަރުން ސޮއި އަނބުރާ ގެންދަން ޖެހޭ ކަމަށެވެ.
އެ މައްސަލަ ކުރިއަށް ގެންދަން ވިލުފުށި ދާއިރާގެ މެމްބަރު ހަސަން އަފީފު ފެއްޓެވުމާ އެކު، މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވީ އެ މައްސަލަ އަނބުރާ ގެންދަން އެމްޑީޕީގެ ޕީޖީ ގުރޫޕުން ނިންމާފައިވާކަން މަޖިލީހުގެ އިދާރާއަށް އެންގިފައި ނުވަނީ އިދާރީ އޮޅުމަކުން ކަމަށެވެ.
އެހެންކަމުން، ބާކީ ތިބި މެމްބަރުންގެ ސޮއި އަނބުރާ ގެންގޮސް، އެކަން އިދާރާއަށް ރަސްމީކޮށް އަންގަން 15 މިނެޓުގެ ފުރުސަތެއް ދެއްވުމަށް އޭނާ އެދިވަޑައިގަތެވެ.
އެމްޑީޕީން އެދުނު ގޮތަށް ޖަލްސާ މެދުކަނޑައިލެއްވުމަށް ފަހު، ޖަލްސާ އަލުން ފައްޓަވައި ރިޔާސަތުން ވިދާޅުވީ ނަޝީދުގެ އިތުރުން މަޖިލީހުގެ ނައިބު ރައީސް އީވާ މަގާމުން ވަކިކުރަން ހުށަހެޅި މައްސަލާގައި ސޮއި ކުރެއްވި މެމްބަރުންގެ ތެރެއިން 33 މެމްބަރުންގެ ސޮއި އަނބުރާ ގެންދަވާފައިވާ ކަމަށެވެ.
Ads by STO
