ބުނަން ބޭނުންވާ އެއްޗެއް ހާމަކޮށް ބުނަން ބިރެއް ނުގަންނާނެ: ރޮޒައިނާ
އަމިއްލަ ނަންފުޅުގައި ބުނަން ބޭނުންފުޅުވަ އެއްޗެއް ޓްވީޓްކޮށް ބުނަން ބިރު ނުގަންނަވާކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވެއްޖެއެވެ.
ރޮޒައިނާ މިހެން ވިދާޅުވެ އެކްސްގައި ޕޯސްޓުކުރައްވާފައިވަނީ ރޮޒައިނާގެ ނަމުގައި އައްޑޫ ސިޓީގައި އެއްވެސް ބިމެއް ނެތްކަމަސް އައްޑޫ ސިޓީގެ ކައުންސިލުން އިއްޔެ އެބޭފުޅާއަށް އަންގާފައިވާކަން އެކްސްގައި ހިއްޞާކުރެއްވުމުން މީހަކު އެކަމަސް ފާޑުކިޔުމާއި ގުޅިގެންނެވެ.
މީސްމީޑިއާގައި ރޮޒައިނާ އަށް ލިބިފައިވާކަމަށް ބުނާ ގޯތިތަކާއި ފަޅުރަށާއި އަދި ރުފިޔާތަކުގެ ހަޤީޤަތް ހޯދުމަށް ކަމާބެހޭ އިދާރާތަކަށް އެބޭފުޅާ ހުށަހެޅުއްވި ސިޓީތަކުގައި އައްޑޫ ސިޓީގައި ރޮޒައިނާގެ 2 މިލިއަން ރުފިޔާގެ އަގުހުރި ގޯއްޗެއް އޮތްކަމަށް ލިޔެ ފަތުރާ ވާހަކައާއި، ލ. ގަމުގައި އެބޭފުޅާގެ ނަމުގައި 1 މިލިއަން ރުފިޔާގެ އަގުހުރި ގޯއްޗެއް އޮތްކަމަށް ލިޔެ ފަތުރާ ވާހަކައިގެ ހަޤީޤަތް ހޯދުމަށް ރޮޒައިނާވަނީ އައްޑޫ ސިޓީ ކައުންސިލަށްވެސް ސިޓީ ހުށަހަޅާފައެވެ.
އަދި އެ އިދާރާތަކުން ޖަވާބު ފޮނުއްވުމުން އެކަންވެސް ޙިއްޞާކުރައްވާނެކަމަށް ރޮޒައިނާ ވިދާޅުވެފައިވެއެވެ. އެގޮތުން، އައްޑޫ ސިޓީ ކައުންސިލުން ފޮނުއްވި ސިޓީގެ ޖަވާބު ރޮޒައިނާވަނީ އިއްޔެ އެކްސްގައި ޙިއްޞާކުރައްވާފައެވެ.
"ނަމުގައި ނެތީމާ އެ ނިމުނީ؟ ވަރަށް މަދުވާނެ އެމީހެއްގެ ނަމުގައި ކަންކަން ކުރާ މީހުން މިޒަމާނުގައި" ރޮޒައިނާގެ ޕޯސްޓަށް ރައްދު ދިން މީހާ ބުނެފައިވެއެވެ.
"އަޅުގަނޑަކީ އަމިއްލަ ނަމުގައި ކަންކަން ކުރަންވެސް ޓްވީޓް ކުރަންވެސް ބުނާ އެއްޗެއް ބުނަންވެސް ބިރުގަންނަ މީހެއް ނޫން. އަޅުގަނޑު ވިޔަފާރި އެއް ކުރަން ހުޅުމާލެ ގެ ބިޑް އަކަސް ކުރިމަތިލިއިރުވެސް ވަގަށް އެހެން މީހެއްގެ ނަމަކުނޫން ލީ، ތިބޭފުޅާ ދަންނަ މީހުން އުޅޭ ގޮތް ވީމަ ތިހެން ހީވަނީ ދެއްތޯ" އެމީހާއަށް ރައްދުދެއްވަމުން ރޮޒައިނާ ވިދާޅުވެފައިވެއެވެ.
އައްޑޫ ސިޓީގެ އިތުރުން ރޮޒައިނާވަނީ، ރައީސް އޮފީހުގަ އޮންނަ ބަދަލުދޭ ކޮމިޓީއަކުން އެބޭފުޅާއަށް އެއްވެސް ކަމެއްގެ ބަދަލުގައި އެއްވެސް އެއްޗެއް ދޭން ނިންމާފައިވޭތޯ ބެލުމަށް ރައީސް އޮފީހަށްވެސް ސިޓީ ފޮނުވާފައިވާފައެވެ.
އަދި ލ. ގަމުގައި އެބޭފުޅާގެ ނަމުގައި 1 މިލިއަން ރުފިޔާގެ އަގުހުރި ގޯއްޗެއް އޮތްކަމަށް ލިޔެ ފަތުރާ ވާހަކައާއި، ނ. މަނަދޫގައި އެބޭފުޅާއަށް ދީފައިއޮތް 200 މިލިއަން ރުފިޔާގެ އަގުހުރި ފަޅުރަށެއް އޮތްކަމަށް ލިޔެ ފަތުރާ ވާހަކަ އަދި އދ. އަތޮޅުގައި އެބޭފުޅާގެ 4 މިލިއަން ރުފިޔާގެ އަގުހުރި ބިމެއް އޮތްކަމަށް ލިޔެ ފަތުރާ ވާހަކަތަކާއި ގުޅިގެން އެ ކައުންސިލްތަކަށް ރޮޒައިނާވަނީ ސިޓީ ފޮނުއްވާފައެވެ.
"މިކަން ބަލަން މި ޖެހުނީ، ފަހަރެއްގައި މި ފޮޓޯ ހީދައިގެން ދައުރުކުރާމީހާ އަޅުގަނޑަށް ނޭގިވެސް އަޅުގަނޑަށް ބިމެއް ހަދިޔާކޮއްފައިވެސް އޮވެދާނެތީ، މިފަދަ ތަނެއް އޮތްކަން އަޅުގަނޑަށްވެސް އަދި މިވާހަކަ ގަބޫލުކޮށް ފަތުރާ ބޭފުޅުންނށްވެސް އެނގުމަކީ މުހިންމު ކަމެއްކަމުގައި ދެކޭތީއެވެ." ރޮޒައިނާގެ ސިޓީތަކުގައި ލިޔުއްވާފައިވެއެވެ.
ރޮޒައިނާ މިފަދައިން އިދާރާތަކަށާއި ރައީސް އޮފީހަށް ސިޓީ ހުށަހަޅުއްވާފައިވާއިރު، ސަރުކާރުން ފެށި ބިންވެރިޔާ ސްކީމްގެ ދަށުން 5،000 ގޯތި ލިބޭ ފަރާތްތަކުގެ ލިސްޓު އާންމުކުރި އިރު އެބޭފުޅާއަށް ގޯތި ލިބިވަޑައިގެންފައިވާތީ އާންމުންގެ ފަރާތުން އަމާޒުވި ފާޑުކިޔުންތަކަށް ރޮޒައިނާވަނީ މީގެ ކުރިންވެސް ރައްދުދެއްވައިފައެވެ.
އެގޮތުން، އެބޭފުޅާގެ ގޯއްޗެއް ނެތްކަމަށާއި، މާލެ މީހުންނަށް ގޯތި ދޭއިރު ރޮޒައިނާއަށް ގޯތި ނުލިބެންވީ ކީއްވެކަން ބުނެދެއްވުމަށް ރޮޒައިނާ ވިދާޅުވިއެވެ.
