ޝިފާޒް ރައީސް ޞާލިޙަށް: ރަނގަޅުވާނީ ދެންވެސް ރީތިކޮށް އުޅެވޭތޯ ބެލުން

ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙަށް ދެން އެންމެ ރަނގަޅުވާނީ "ރީތިކޮށް އުޅެވޭތޯ" ބެއްލެވުންކަމަށް އެމްޑީޕީގެ ކުރީގެ ނައިބު ރައީސް މުޙައްމަދު ޝިފާޒު ވިދާޅުވެއްޖެއެވެ.

Ads by MWSC

ޝިފާޒް މިހެން ވިދާޅުވީ، ރައީސް ނަޝީދު މަޖިލީހުގެ މަޤާމުން ދުރުކުރުމަށް އެމްޑީޕީން ކުރަމުން އަންނަ މަސައްކަތްތަކަށް ފާޑުވިދާޅުވަމުންނެވެ. ރައީސް ނަޝީދު ވަކި ކުރުމަށް އިތުބާރު ނެތް ކަމުގެ މައްސަލަ ކުރިއަށް ނުގެންގޮސް، އިންތިޚާބީ ރައީސް ޑރ. މުހައްމަދު މުޢިއްޒު ރައީސުލްޖުމްހޫރިއްޔާގެ މަޤާމުގެ ހުވާކުރައްވައިފިނަމަ އެ ހުވާ ގަބޫލު ނުކުރާނެ ކަމަށް ސަރުކާރު ހިންގާ އެމްޑީޕީގެ ޕާލިމެންޓްރީ ގުރޫޕުން އިއްޔެ ވިދާޅުފައިވެއެވެ.

އެމްޑީޕީން އެހެން ވިދާޅުވުމުން ދަ ޑިމޮކްރެޓްސްއިން ވިދާޅުވީ، އިންތިޚާބީ ރައީސް އާއި އިންތިޚާބީ ނައިބް ރައީސް ހުވާ ކުރެއްވުމުގެ ދަރުބާރަށް ހުރަސް އެޅުމަށް އެމްޑީޕީން މަސައްކަތް ކުރަނީ ރިޔާސީ އިންތިހާބުގައި ނާކާމިޔާބުވެ ވަޑައިގެންނެވި ރައީސް ޞާލިހްގެ އެންގެވުމަކަށް ކަމަށެވެ.

އެކަމާ ގުޅިގެން ޝިފާޒު ވިދާޅުވީ ރައީސް ނަޝީދަށް އެމްޑީޕީ މެންބަރުން ދެއްވި ރިޔާސީ ޓިކެޓު ރައީސް ޞާލިޙަށް އަރުވައި ވެރިކަމުގެ ދައުރެއް ދެއްވުމުންވެސް އެމަނިކުފާނުގެ "ހިތް ނުފުރުނު" ކަމަށެވެ.

"ދެން މި ފެންނަނީ ވެރިކަން ކުރި މީހެއްގެ ކިބައިން ފެންނާނެކަމަސް އުއްމީދުކުރި ކަމެއްވެސް ނޫން. ދެންވެސް ރީތިކޮށް އުޅެވޭތޯ ބެލުން ރަނގަޅުވާނީ" ޝިފާޒު ވިދާޅުވެފައިވެއެވެ.

އެމްޑީޕީގެ ނިންމުމާއި ގުޅިގެން ދަ ޑިމޮކްރެޓްސް އިން ރޭ ނެރުނު ބަޔާނެއްގައި ވިދާޅުވީ އެމްޑީޕީގެ ޕާލިމެންޓްރީ ގުރޫޕްގެ ބައެއް މެންބަރުން ލައްވައި ރައީސް ޞާލިޙް ކުރައްވަން އުޅުއްވާ ހުތުރު މަސައްކަތްޕުޅު ކުށްވެރިކުރާ ކަމަށާއި ރައްޔިތުންގެ ނިންމުމަށާއި ޤާނޫނުއަސާސީގެ ހުރުމަތަށާއި ޑިމޮކްރަސީގެ އަސާސްތަކަށާއި މަކާރިމުލް އަހްލާގުގެ ހަމަތަކަށް ރުޖޫއަވެ ވަޑައިގަތުމަށް އިލްތިމާސް ކުރާކަމަށެވެ.

އެމްޑީޕީގެ ޕީޖީ ގްރޫޕްގެ ބައްދަލުވުމަށް ފަހު އެ ޕާޓީން އިއްޔެ ބުނެފައި ވަނީ ރައީސް ނަޝީދުގެ އިތުބާރު ނެތް ކަމުގެ މައްސަލަ 29 ވަނަ ދުވަހު ހުށައަޅަން ޖެހޭނެ ކަމަށާއި އިންތިޚާބީ ރައީސް ހުވާ ކުރުމުގެ  ރަސްމިއްޔާތު ކުރިއަށް ގެންދަން ބޭނުންފުޅު ވަނީ އިތުބާރު އޮތް ރައީސަކާއެކު ކަމަށެވެ. މީގެ އިތުރުން އިތުބާރު ނެތް ރައީސަކާއި އެކު ހުވާކުރުމުގެ ރަސްމިއްޔާތު ކުރިއަށް ގެންގޮސްފިނަމަ ރައީސުލްޖުމްހޫރިއްޔާ ފޮނުވާ ކެބިނެޓަށް އެމްޑީޕީގެ ތާއީދެއް ނުލިބޭނެ ކަމަށް ވެސް އެ ޕާޓީން ވަނީ ބުނެފައެވެ.