ޑރ. މުޢިއްޒުގެ ސަރުކާރުގައި ޖުމްލަ 22 ވުޒާރާ، ދެއްވީ ޚަރަދު ބޮޑު ނުވާނެކަމުގެ ޔަޤީންކަން

އިންތިޚާބީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގައި ޖުމްލަ 22 ވުޒާރާ ހުރިނަމަވެސް ޚަރަދު ބޮޑު ނުވާނެކަމުގެ ޔަޤީންކަން އެމަނިކުފާނު ދެއްވައިފިއެވެ.
މިއަދު ފާހަގަކުރާ ޖުމްހޫރީ ދުވަހުގެ މުނާޞަބަތުގައި ޓީވީއެމްއިން ކުރިއަށްގެންދިޔަ "ދިވެހީންގެ ރާއްޖެ" ޕްރޮގްރާމްގައި ވާހަކަފުޅުދައްކަވަމުން ޑރ. މުޢިއްޒު ވިދާޅުވީ އެމަނިކުފާނުގެ ސަރުކާރުގެ ޚަރަދުތައް ބޮޑު ނުވާނެކަމަށެވެ. އަދި ވޭތުވެދިޔަ ސަރުކާރުތަކުގެ ސިޔާސީ މަޤާމުތަކަށްވުރެ އެމަނިކުފާނުގެ ސަރުކާރުގެ ސިޔާސީ މަޤާމުތައްވެސް މަދުވާނެކަމަށާއި އެއަދަދު 700 އަށްވުރެ އިތުރުނުވާނެކަމަށެވެ.
ޑރ. މުޢިއްޒު ވިދާޅުވީ މިހާރު ސަރުކާރުގެ އޮފީސްތައް ހިންގުމަށް މި ބޭނުންކުރާ އިމާރާތްތަކަށްވުރެ އިތުރަށް އަމިއްލަ އެއްވެސް ތަނަކުން ކުއްޔަކަށް އެއްވެސް ތަނެއް އެމަނިކުފާނުގެ ސަރުކާރުގައި ނުނަންގަވާނެކަމަށާއި، އެހެންނަމަވެސް، ބައެއް މިނިސްޓްރީތައް ބައިބައި ކުރެއްވުމުން މިނިސްޓްރީތަކުގެ އަދަދު އިތުރުވާނެކަމަށެވެ.
ނަމަވެސް އެގޮތަށް މިނިސްޓްރީތައް ބައިބައިކުރެއްވީ ފޯކަސްޑް މަސައްކަތްތަކެއް ކުރައްވައިގެން، ނަތީޖާ ނެރެދެއްވަން ބޭނުންފުޅުވާތީކަމަށާއި، އެގޮތަށް މިނިސްޓްރީތައް އިތުރުވިނަމަވެސް އަމިއްލަ ފަރުދެއްގެ ގެއަކުން ނޫނިއްޔާ ސަރުކާރުން ބޭރުން އިތުރުތަނެއް ކުއްޔައް ހިފައި އެ ޚަރަދު އެމަނިކުފާނު ނުކުރައްވާނެކަމަށެވެ. އަދި ކުރެއްވޭނެކަމަށެވެ.
މީގެ އިތުރުން، ސިޔާސީ މަޤާމްތައްވެސް މަދުކޮށް، ސިވިލް ސަރވިސްގެ އޭގެ ޒާތުގައި ބޮޑުނުކުރައްވާނެކަމަށްވެސް ޑރ. މުޢިއްޒު ވިދާޅުވިއެވެ. ބައެއް ބަދަލުތައް މުޅި ދަޢުލަތުގެ ހިންގުމަށް ގެނައި ނަމަވެސް އެއީ ބޮޑު ބަދަލަކަށް ނުވާނެކަމަށާއި އެމަނިކުފާނުގެ ސަރުކާރަކީ ނަތީޖާ ނެރެދެއްވާނެ ވަރުގެ ޓީމަކާއެކު ކުރިއަށްގެންދަވާ ސަރުކާރަކަށް ވެގެންދާނެކަމަށް ޑރ. މުޢިއްޒު ފާހަގަކުރެއްވިއެވެ.




ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.