ސިޔާސީ ޕާޓީތަކުން ޤައުމު އިސްކުރައްވައިގެން ޒިންމާދާރުކަމާއެކު މަސައްކަތްކުރެއްވުމަށް ޑރ. މުޢިއްޒު އިލްތިމާސްކުރައްވައިފި

ސިޔާސީ ޕާޓީތަކުން ޤައުމު އިސްކުރައްވައިގެން ޒިންމާދާރުކަމާއެކު މަސައްކަތްކުރެއްވުމަށް އިންތިޚާބީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިލްތިމާސްކުރައްވައިފިއެވެ.
މިއަދު ފާހަގަކުރާ ޖުމްހޫރީ ދުވަހުގެ މުނާޞަބަތުގައި ޓީވީއެމްއިން ކުރިއަށްގެންދިޔަ "ދިވެހީންގެ ރާއްޖެ" ޕްރޮގްރާމްގައި ވާހަކަފުޅުދައްކަވަމުން ޑރ. މުޢިއްޒު ވިދާޅުވީ، ރާއްޖޭގައި މިއޮތް ސިޔާސީ ޕާޓީގެ ނިޒާމު ރަނގަޅުކޮށް ހަރުދަނާވުމަށް ރައްޔިތުން އެދޭކަމަށާއި، އަދި ވަރަށް ގިނަ ރައްޔިތުން ޕާޓީތަކަށް ވަންނަން ޝައުގުވެރިވާކަމަށެވެ.
އެހެންކަމުން ސިޔާސީ ޕާޓީތަކުން އެންމެ އިސްކަންދެއްވަން ޖެހެނީ ޕާޓީތައް އުފެއްދުމުގެ މައިގަނޑު މަޤްޞަދު ހާޞިލްކުރުމަށް މަސައްކަތްކުރެއްވުމަށް ކަމަށާއި އަމިއްލަ މަސްލަޙަތަށްވުރެ ބޮޑަށް ޤައުމުގެ މަސްލަޙަތު އިސްކުރައްވަން ޖެހިވަޑައިގަންނަވާކަމަށެވެ.
"ޤައުމު އެއީ ބުނެލާ ޖުމްލައަކަށް ނަހަދަންވީއޭ، ޕާޓީގެ މަސްލަޙަތު ޕާޓީތައް އުފައްދަނީ ކޮން ބޭނުމެއްގައިތޯ ވިސްނާވަޑައިގެން ޕާޓީގެ މަސްލަޙަތަށްވުރެ ޤައުމުގެ މަސްލަޙަތު އިސްކުރައްވާށޭ ކޮންމެ ބޭފުޅަކުވެސް" ޑރ. މުޢިއްޒު ވިދާޅުވިއެވެ.
އަދި އެމަގުން ޕާޓީތައް ހަރުދަނާކުރެއްވުމަށް އެމަނިކުފާނަށް ކޮށްދެވެންހުރި ހުރިހާ ކަމެއް ކޮށްދެއްވާނެކަމަށް ފާހަގަކުރައްވަމުން ޑރ. މުޢިއްޒު ވިދާޅުވީ، ޤައުމީ މަސްލަޙަތު އިސްނުކޮށް ޕާޓީތައް މަސައްކަތްކުރައްވާނަމަ ރައްޔިތުންނަށް އެއިން ފައިދާއެއް ނުކުރާނެކަމަށެވެ.
"ތިމަންނައަށް އެންމެ ފައިދާހުރި ގޮތެއްނޫނޭ، ޤައުމަށް ފައިދާހުރިގޮތް، ސަރުކާރުންވެސް ރަނގަޅުވާހަކައެއް ދައްކަންޏާ ސަރުކާރުން ރަނގަޅުކަމެއް ކުރަން އުޅެންޏާ އެކަމަކަށް އެހީތެރިކަމެއް ދެއްވާށޭ" ޑރ. މުޢިއްޒު އެދިވަޑައިގެންނެވިއެވެ.
ކޮންމެ ޕާޓީއަކުންވެސް އެގޮތަށް މަސައްކަތްކުރެއްވުމަށާއި، ސަރުކާރުތަކުން ކުރައްވާ ކަންކަމުގައި ރައްޔިތުންނަށް އެންމެ ފައިދާހުރި ގޮތް ނޫންގޮތަށް ކަންކަން ކުރާކަމަށް ފެނިވަޑައިގަންނަވާނަމަ، އެކަމެއްގައި އެބޭފުޅުން އެކަން ކުރައްވާނެ އެންމެ ރަނގަޅުގޮތް ރައްޔިތުންނަށް ހުށަހަޅުއްވައިދެއްވުމަށްވެސް ޑރ. މުޢިއްޒު ވިދާޅުވިއެވެ.





ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.