ނޫސްވެރިންނަށް ހިލޭ ސްކޮލަޝިޕް ތަޢާރަފްކޮށް، މީޑިއާ ހިންގުމަށް ޚާއްސަ ވިލެޖެއް ޤާއިމްކުރާނަން: ޑރ. މުޢިއްޒު
މީޑިއާތަކަށް ހާއްސަކޮށްގެން މާލެ މީޑިއާ ވިލެޖެއް ތަރައްގީކޮށް، ނޫސްވެރިކަމާއި މީޑިއާގެ ރޮނގުން ހިލޭ ކިޔެވުމުގެ ސްކޮލަޝިޕްތަކެއް ތައާރަފު ދެއްވާބނެ ކަމަށް އިންތިޚާބީ ރައީސް ޑރ. މުޙައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ މީޑިއާތަކާ ރޭ ބައްދަލުކުރައްވައި ދެއްކެވި ވާހަކަފުޅުގައެވެ.
ރޭ ބޭއްވި ޖަލްސާގައި އެ މަނިކުފާނު ވަނީ ނޫސްވެރިންގެ ކަންބޮޑުވުންތަކާއި އެ ދާއިރާ އިތުރަށް ތަރައްގީކުރުމާ ގުޅޭގޮތުން ނޫސްވެރިންގެ ޚިޔާލު ހޯއްދަވާފައެވެ. ނޫސްވެރިން ވަނީ ނޫސްވެރިކަމުގެ ދާއިރާގައި ދިމާވާ ގޮންޖެހުންތަކާއި، މި ދާއިރާ ތަރައްޤީކުރަން ބޭނުންވާ ގިނަ ޚިޔާލުތަކެއް އިންތިޚާބީ ރައީސާއި ހިއްސާކުރައްވާފައެވެ.
މުޢިއްޒު ވިދާޅުވީ މިހާރު ގިނަ ނޫސްތަކުން މަސައްކަތްކުރައްވަނީ ތަންތަން ކުއްޔަށް ހިފައިގެން ކަމަށާއި މިއީ މިހާރުން މިހާރަށް ޙައްލުކުރެވޭނެކަމެއް ނޫން ކަމަށެވެ. އެހެންނަމަވެސް ކުރިއަށް އޮތްތަނުގައި ގްރޭޓަރ މާލޭ ރީޖަންގައި މީޑިއާތަކަށް ޚާއްސަ މީޑިއާ ކްލަބަކާއި މީޑިއާ ވިލެޖެއް ޤާއިމުކުރައްވާނެ ކަމަށެވެ.
ނޫސްވެރިކަމުގެ ދާއިރާގެ ކޯސްތަކުގައި ކޮންމެ އަހަރަކުވެސް ވަކި އަދަދަކަށް ހިލޭ ސްކޮލަޝިޕް ދީގެން ކިޔެވޭނެ އިންތިޒާމް ފަހިކޮށްދެއްވާނެކަމަށް ވެސް މުޢިއްޒު ވިދާޅުވިއެވެ.
“ކޮންމެ އަހަރަކުވެސް ވަކި އަދަދަކަށް ހިލޭ ސްކޮލަޝިޕް ދީގެން ކިޔެވޭނެ އިންތިޒާމް ފަހިކޮށްދެއްވާނަން. މިއީ މިދާއިރާގައި ތަޢުލީމީ ނޫސްވެރިން އުފެދިގެންދާނެ ކަމެއް” މުޢިއްޒު ވިދާޅުވިއެވެ.
މީގެ އިތުރުން މީޑިއާއަށް އޮތް މާލީ ދަތިކަން ހައްލު ކޮށްދެއްވުމުގެ ގޮތުން ފައިސާ، އަންނަ އަހަރުގެ ބަޖެޓުގައި ހިމެނުމަށް މަސައްކަތްކުރައްވާނެކަމަށް ވެސް ޑރ. މުޢިއްޒު ވިދާޅުވިއެވެ.
