ޤުރުއާން ކިޔެވުމުގެ 36 ވަނަ ޤައުމީ މުބާރާތް ފެބްރުއަރީ މަހު ބާއްވަނީ
ކީރިތި ޤުރުއާން ކިޔެވުމުގެ 36 ވަނަ ޤައުމީ މުބާރާތް އަންނަ ފެބްރުއަރީ މަހު ބާއްވަން ނިންމައިފިއެވެ.
މިކަން ހާމަކޮށް ކީރިތި ޤުރްއާނާ ބެހޭ ޤައުމީ މަރުކަޒުން މިއަދު ވިދާޅުވީ، ކޮންމެ އަހަރަކު ބާއްވަމުންދާ، ކީރިތި ޤުރްއާން ކިޔެވުމުގެ ޤައުމީ މުބާރާތް، އަންނަ އަހަރުގެ ފެބްރުއަރީ މަހުގެ 23 ވަނަ ދުވަހު ފަށަން ހަމަޖެހިފައިވާ ކަމަށެވެ.
އެގޮތުން މި މުބާރާތް ކުރިއަށް ދާނީ 2024 ފެބްރުއަރީ 23 ވަނަ ދުވަހުން ފެށިގެން މާރިޗު މަހުގެ 2 ވަނަ ދުވަހާ ހަމައަށް ކަމަށް ޤުރުއާނާއި ބެހޭ މަރުކަޒުން ވިދާޅުވެފައި ވެއެވެ.
މި އަހަރުގެ މި މުބާރާތް ކުރިއަށްގެންދިއުމަށް ހަމަޖެހިފައި ވަނީ 3 ބަޔަކަށް ބަހާލައިގެން ކަމަށާއި އެއީ ހާފިޒުންގެ ބަޔާއި، ސްކޫލް ކުދިންގެ ބަޔާއި، މުއައްސަސާތަކުގެ ބައި ކަމަށް ޤުރުއާނާއި ބެހޭ މަރުކަޒުން ހާމަކޮށްފައި ވެއެވެ. އަދި މި މުބާރާތުގައި ބަލައިގެން ކިޔެވުމުގެ ގޮތްޕާއި ނުބަލާ ކިޔެވުމުގެ ގޮތްޕާއި ހާފިޒުންގެ ގޮފި އޮންނާނެ ކަމަށްވެސް ޤުރުއާނާއި ބެހޭ މަރުކަޒުން ހާމަ ކުރެއެވެ.
މިގޮތުން މި މުބާރާތުގައި ކޮންމެ ބަޔަކުން 1 ވަނަ، 2 ވަނަ އަދި 3 ވަނަ ހޮވުމަށް ވަނީ ހަމަޖެހިފައެވެ.
ޤުރުއާނާއި ބެހޭ މަރުކަޒުން ވިދާޅުވީ ސްކޫލް ކުދިންގެ ބައިން ސިޓީތަކުގެ ސްކޫލްތަކުން ކޮންމެ ސްކޫލެއްގެ އަމިއްލަ ނަމުގައިވެސް މުބާރާތުގައި ބައިވެރިވެވޭނެ ކަމަށެވެ.
ހަމަ އެހެންމެ ސިޓީތަކުގެ ސްކޫލްތައް ފިޔަވާ އެހެން ސްކޫލްތަކުން މުބާރާތުގައި ބައިވެރިވެވޭނީ އަތޮޅު ސްކޫލްތަކުގެ މެދުގައި ބާއްވާ އަތޮޅު މުބާރާތުން ހޮވޭ ދަރިވަރުން ކަމަށް އެ މަރުކަޒުން ހާމަ ކުރެއެވެ.
ކީރިތި ޤުރުއާން ކިޔެވުމުގެ ޤައުމީ މުބާރާތުގެ ކޮންމެ ބަޔަކުންވެސް އެއްވަނަ އަށް ހޮވޭ ބައިވެރިޔަކަށް ރައީސުލްޖުމްހޫރިއްޔާގެ ޚާއްސަ އިނާމް ދެއްވާނެއެވެ.
