ޕީޕީއެމް އަކީ މިހާރު ވަކިބަޔަކު ހައިޖެކް ކޮށްފައި އޮތް ޕާޓީއެއް: ޖަމީލް

ޕްރޮގްރެސިވް ޕާޓީ އޮފް މޯލްޑިވްސް އަކީ މިހާރު ވަކި ބަޔަކު "ހައިޖެކްކޮށްފައި" އޮތް ޕާޓީއެއްކަމަށް ކުރީގެ ނައިބު ރައީސް ޑރ. މުހައްމަދު ޖަމީލް އަހްމަދު ވިދާޅުވެއްޖެއެވެ.
ޖަމީލް މިހެން ވިދާޅުވެފައިވަނީ، ކުރީގެ ރައީސް އަބްދުالله ޔާމީން އަބްދުލް ޤައްޔޫމް ޕީޕީއެމުން ވަކިވެ ވަޑައިގެންފައިވާކަން ހާމަކުރައްވަމުން ޗެނަލް13 އަށް ދެއްވި އިންޓަރވިއުއެއްގައެވެ.
އެގޮތުން، ޕީޕީއެމްއަކީ މިހާރު ވަކި ބަޔަކު ހައިޖެކް ކޮށްފައިވާ ޕާޓީއެއްކަމަށް ސިފަކުރައްވަމުން ޖަމީލްވަނީ ޕީޕީއެމް/ޕީއެންސީގެ ލީޑަރޝިޕްގައި އަދި މި ސަރުކާރުގައި ރައީސް ޑރ. މުޙައްމަދު މުޢިއްޒު އަރިހުގައި އިސްކޮށް އުޅުއްވާ ބޭފުޅުންނަށް ފާޑުވިދާޅުވެފައެވެ.
ޖަމީލް ވިދާޅުވީ، ރައީސް ޞާލިޙުގެ ވެރިކަމުގައި ރައީސް ޔާމީނަށް ރިޔާސީ އިންތިޚާބުގައި ބައިވެރިނުވެވޭނެގޮތަށް އެމަނިކުފާނު ޖަލަށް ލުމަށްފަހު ތަންފީޛުކުރުވި ޙުކުމުގެ ސަބަބުން ރައީސް ޔާމީނަށް ނުޙައްޤުން އެތަކެއް އަނިޔާއެއް އެ ސަރުކާރުން ދިންކަމަށެވެ. އަދި ޕްލޭން އޭ، ބީ އަދި ސީ އަކާއެކު ރިޔާސީ އިންތިޚާބުގައި ޕީޕީއެމް/ޕީއެންސީން ވާދަކުރިއިރުވެސް، ރައީސް ޔާމީނަކީ ކިހާ "ސިމްޕަލް" ނުވަތަ ކިހާ ރަނގަޅަށް ކަންކަމާމެދު ގޮތް ނިންމަވާ ބޭފުޅެއްކަން އެނގޭނެކަމަށެވެ.
"ޕީޕީއެމް/ޕީއެންސީގެ ލީޑަރޝިޕުން ފޮނުވީއޭ އިނގޭތޯ މަނިކުފާނު ނަންފުޅެއް ފޮނުވަދޭށޭ، 2 ނަން ފުޅު. އެއްފަހަރަކު ނޫނޭ! ދެފަހަރު ތިން ފަހަރު ފޮނުވީމޭ. އެކަމަކު ރައީސް ޔާމީނު ވިދާޅުވީ ނޫނެކޭ، ތިކަން ކުރައްވާން ޖެހޭނީ ތިމަންނާމެންނަކީ ޕާޓީއެކޭ، ސިޔާސީ ޕާޓީއެކޭ، މިތާ ތެރޭގައި އެބައޮތޭ ޑިމޮކްރެޓިކް ހަމަތަކެއް، އެ މަގުންނޭ ހިނގަންވާނީ. އެހެންވީމާ އެގޮތުގެ މަތިން ތިބޭފުޅުންގެ ތެރެއިން ޕާޓީގެ އަސާސީ ޤަވާއިދުގެ ތެރެއިން އެކަން އޮންނަ ގޮތުގެ މަތިން ބަޔަކު ހޮވައިގެން ތިމަން މަނިކުފާނު ހަމައަށް ގެންނާށޭ" ޖަމީލް ވިދާޅުވިއެވެ.
އެހާވެސް އެޕާޓީގެ ހުރިހާ މެންބަރުންގެ ރަޢުޔަށް އެމަނިކުފާނު އިޙްތިރާމް ކުރެއްވިކަމަށް ފާހަގަކުރައްވަމުން ޖަމީލް ވިދާޅުވީ، ރައީސް ޔާމީނު ޚުދު ޖަމީލް ގާތުވެސް ރިޔާސީ އިންތިޚާބުގައި ރައީސް ޑރ. މުޢިއްޒު ހޮވުމަށް މަސައްކަތްކޮށްދިނުމަށް އެދިވަޑައިގެންނެވިކަމަށާއި، އެންމެންވެސް އެކަމުގައި ބުރަ މަސައްކަތް ކުރި ކަމަށެވެ.
"އެންމެން އެކަމުގައި އެ އުޅުނީ. އެންމެން އެ ބުރަ މަސައްކަތްކުރީ، އެބަޔަކު އެބަޔަކު އަތުގައި ހުރި ފައިސާއެއް ހުރިގޮތަކަށް ހުރި ތަނަކުން ހޭދަކޮށްގެން އެބަޔަކަށް ކުރެވުނު ކަމެއް ކޮށްގެން ބުރަ މަސައްކަތްކުރީ. އެކަމަކު ބައްލަވާ. ނަތީޖާ ނިމިގެން އައިއިރު މިނިވަންކަމަށްޓަކައިވެސް ކުރެވުނު ކަމެއް ނެތް" ޖަމީލް ފާހަގަކުރެއްވިއެވެ.
ޖަމީލް އިތުރަށް ވިދާޅުވީ، ޑރ. މުޢިއްޒު އިންތިޚާބުވެވަޑައިގެންނެވި ފަހުންވެސް ރައީސް ޔާމީނުގެ ޝަރީޢަތުގެ އަޑުއެހުންތައް ބޭއްވުނު ކަމަށާއި ނަމަވެސް ޕީޕީއެމް/ޕީއެންސީގެ ލީޑަރޝިޕުގެ ބޭފުޅުން ނުފެންނަކަމަށެވެ.
"އަމުދުން މިހާދުވަސް ވަންދެން މި ދެޕާޓީ ހިންގުމަށް އިސްވެ ހުންނެވި ޢަބްދުއްރަޙީމް އެއްވެސް ވަރަކަށް މި އިންތިޚާބު ނިމުނު ފަހުންވެސް ފެނިފައެއްނުވޭ. ހަމައެކަނި މި ފެންނަނީ ރައީސް ޔާމީނަށް ކުޑައިމީސްވާގޮތަށް ތަންތާނގައި ވާހަކަ ދައްކަވާތަން ފެނިގެންމިދިޔައީ" ޖަމީލް ވިދާޅުވިއެވެ.
އެހެންކަމުން ކުރިއަށް ރައްޔިތުންގެ މަޖިލީހަކީ ބޮޑު އިންތިޚާބަށް ވާނެކަމަށާއި، ރާއްޖޭގެ ރައްޔިތުންގެ ޙައްޤުގައި އެ އިންތިޚާބު ކާމިޔާބުކުރަން ޖެހޭކަމަށާއި ރާއްޖޭގެ އެތައް ރައްޔިތުންނެއް ރައީސް ޔާމީނަށް އެދި އެދި ތިބިކަމަށް ޖަމީލް ފާހަގަކުރެއްވިއެވެ.
ރައީސް ޔާމީން އާ މެދު އެހެން ކަންތައް ނުކުރުމަށް ރައްޔިތުން ކެނޑިނޭޅި ބުނާއިރުވެސް، ރައީސް ޔާމީންގެ ނިންމެވުންތަކަށް ރައީސް ޑރ. މުޢިއްޒުވެސް އަދި އެމަނިކުފާނުގެ އަރިހުގައި އުޅުއްވާ ޕީޕީއެމް/ޕީއެންސީގެ ލީޑަރޝިޕުންވެސް ބޭނުންފުޅުނުވާކަމަށް ޖަމީލް ވިދާޅުވިއެވެ.
ރައީސް ޔާމީން އަކީ ސިޔާސީ ޙަޔާތުގައި ދުރު ވިސްނުންފުޅުތަކަކާއި ތަޖުރިބާތަކެއް ހުންނެވި ބޭފުޅެއްކަމަށާއި، އެމަނިކުފާނުގެ ވިސްނުން ކުރިއަށް ނެރެވޭނެގޮތަކަށް އެފަދަ ޕާޓީއެއް އޮންނަން މުހިންމުކަން ފާހަގަކުރައްވަމުން ޖަމީލް ވިދާޅުވީ، މިވަގުތު ޕީޕީއެމްއަކީ އެމަސައްކަތްކުރެވޭގޮތަށް އޮތް ޕާޓީއެއް ނޫންކަމަށެވެ.
"ޕީޕީއެމް މިހާރު އެއޮތީ ވަކި ބަޔަކު ހައިޖެކް ކޮށްފައި، ހިޞޯރުކޮށްފައި. ޕާޓީގެ އޮފީހަކަށް ނާދޭ، ޕާޓީ ހިންގާކަށް މަސައްކަތެއް ނުކުރޭ. އަދި ރައީސް ޔާމީން ޕާޓީ ހިންގެވުމަށް ކުރައްވާ މަސައްކަތަކަށް ޖާގަ ދޭކަށް ބޭނުމެއްނުވޭ" ޖަމީލް ވިދާޅުވިއެވެ.
ރައީސް ޔާމީން ޕީޕީއެމްއާއި ދުރަށް ވަޑައިގެންނެވިކަން ހާމަކުރައްވާފައިވާއިރު، އެމަނިކުފާނު އެ ނިންމެވުން ނިންމެވީ އެމަނިކުފާނުގެ މަޝްވަރާ ޕީޕީއެމްގެ ލީޑާޝިޕްގެ ބޭފުޅުން ނުނަންގަވާތީ ކަމަށާއި އެއީ ރައީސް ޔާމީނަށް ފަސޭހަ ނިންމުމެއް ނޫން ކަމަށް ވެސް ޖަމީލް ވިދާޅުވިއެވެ.







ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.