ރައީސް ޑރ. މުޢިއްޒު ހުންނެވީ ޢަބްދުއްރަޙީމްގެ އަތްދަށުވެފައި: ޑރ. ޖަމީލް

"ކިޔަވައިގެން ހުރި މީހަކަށްވިޔަސް ހެދޭނެ އެންމެ ބޮޑު މިސްޓޭކަކީ ޖާހިލެއްގެ އަތް ދަށުވުން، އިނގޭތޯ، ޖާހިލެއްގެ އަތްދަށުވުން، ޖާހިލެއްގެ އަތްދަށުވުމަށްވުރެ ބޮޑު ގޯހެއް އިންސާނެއް ނުކުރާނެ،" ޖަމީލު ވިދާޅުވި އެވެ.
ޢަބްދުއްރަޙީމްއަށް ފާޑުވިދާޅުވަމުން ޖަމީލް ވިދާޅުވީ، ރައީސް ޑރ. މުޢިއްޒު ވެރިކަމަށް ގެންނަން އެންމެ ބޮޑަށް މަސައްކަތްކުރެއްވި ބޭފުޅުންގެ ތެރޭގައި ޢަބްދުއްރަޙީމް ހިމެނޭނެކަމަށާއި، ރައީސް ޑރ. މުޢިއްޒުގެ ކެމްޕޭންތައް ކުރިއަށް ގެންދެވީ ރައީސް ޔާމީންގެ ނަންފުޅު ބޭނުންކުރައްވައިގެންކަމަށެވެ. ނަމަވެސް ވެރިކަން ލިބިވަޑައިގެންނެވުމާއެކު ރައީސް ޔާމީންއަކީ ނެތް ބޭފުޅަކަށް އެ ލީޑަރޝިޕުން ހަދާފައިވާކަމަށް ޖަމީލް ވިދާޅުވިއެވެ. މި ސަރުކާރުން ވެރިކަމަށް އައުމަށް ކެމްޕޭންކޮށް މަސައްކަތްތައް ކުރަމުންދިޔައީ ރައީސް ޔާމީންއަކީ އެންމެ އިސް ލީޑަރުކަމަށް ދެކިގެން ކަމަށްވާއިރު، އޭރު ރައީސް ޔާމީން ޖަލުގައި ހުންނެވުމުން، އިންތިޚާބުގައި ބައިވެރިވެވަޑައިގަންނަވަން ޤާނޫނީ ހުރަހެއް އޮތްކަމަަށް އެބޭފުޅުންނަށް ފެނިވަޑައިނުގެންނެވިކަމަށްވެސް ޖަމީލް ވިދާޅުވިއެވެ. އަދި ހަމައެއާއެކު، ޤާނޫނީ ގޮތުން ރައީސް ޔާމީން އަށް ކުރެވޭނެ ކަންކަމާއި ނުކުރެވޭނެ ކަންކަމުގެ ވާހަކަ ދައްކަވަން އޭރު އެއްވެސް ބޭފުޅަކަށް ކެރިވަޑައިގެން ނުގެންނެވި ކަމަށް ފާހަގަކުރައްވަމުން ޖަމީލް ވިދާޅުވީ ވެރިކަން ލިބިވަޑައިގަތުމާއެކު އެބޭފުޅުންގެ ކުލަ ބަދަލުވެއްޖެކަމަށާއި އެއީ ރައީސް ޔާމީން އަށް ބޭވަފާތެރިވުންކަމަށެވެ. "އެކަމަކު ބައްލަވާ އިނގޭތޯ، މިވެރިކަން ހަމަ ލިބުމާ އެކީގައި މުޅި އެތި ބަދަލުވެގެން މިދިޔައީ މިހާރު ރައީސް ޔާމީންއަށް ބައެއް ކަންތައްތައް ކުރެވިގެން ނުވޭ، ރައީސް ޔާމީންއާ މަޝްވަރާ ކުރައްވާކަށް ބޭނުމެއް ނުވޭ ރައީސް ޔާމީން މީގެ ތެރެއަށް ވަދެގެން ނުވޭ،" ޖަމީލް ވިދާޅުވި އެވެ. ޖަމީލް އިތުރަށް ވިދާޅުވީ، ވެރިކަމަށް އިންތިޚާބުވެވަޑައިގެންނެވުމާއެކު، ރައީސް ޑރ. މުޢިއްޒުއާއި ރައީސް ޔާމީން އާ އެއްވެސް ގުޅުމެއް ނެތްކަމަށާއި، އެއްވެސް އިޙްތިރާމެއްވެސް އެމަނިކުފާނަށް "ލީޑަރޝިޕުން" ނުކުރައްވާ ކަމަށެވެ. އަދި ރައީސް ޔާމީންގެ ފޯނުކޯލުތަކަށް ޖަވާބު ނުދެއްވާކަމަށްވެސް ޖަމީލް ވިދާޅުވިއެވެ. ޖަމީލް ސިފަކުރައްވާ ގޮތުގައި މިހުރިހާ ކަމެއްގެ އަސްލު ގުޅިފައިވަނީ ޢަބްދުއްރަޙީމްއާއެވެ."އަޅުގަނޑު މިހުރީ ބުނާނެ އެއްޗެއް ނޭނގިފައި، މި މިންވަރަށް މިކަން ފޮނުވައިލީ ހަމަ ސީދާ އަބްދުއްރަހީމް ބުނާ ގޮތަށް، އަބްދުއްރަހީމްއަކީ މުއިއްޒުގެ މުރުޝިދު، މުއިއްޒުގެ ޒައީމު،"
ރައީސް މުއިއްޒުއަށާއި އަބްދުއްރަހީމްއަށް ބޮޑެތި ފާޑުކިޔުންތަކެއް ޑރ. ޖަމީލު އަމާޒު ކުރައްވާފައިވާއިރު، އަބްދުއްރަހީމްއަކީ ރައީސް މުއިއްޒުއަށް ވެރިކަން ކާމިޔާބު ކޮށްދެއްވުމަށް އެންމެ ބޮޑު މަސައްކަތެއް ކުރެއްވި އެއް ބޭފުޅާ އެވެ. އަބްދުއްރަހީމް ވަނީ ކެމްޕޭނު ދުވަސްވަރު، ރައީސް މުއިއްޒު އާއެކު ހުރިހާ ރަށަކަށްހެން ވަޑައިގެންފަ އެވެ.
އޭގެ އިތުރުން އަބްދުއްރަހީމްއަކީ ޕްރޮގުރެސިވް ކޯލިޝަނުން އިންތިހާބު ބޮއިކޮޓު ކުރުމަށް ރައީސް ޔާމީން އެދިވަޑައިގެންނެވި އެދިވަޑައިގަތުމާ ހިލާފަށް އިންތިހާބުގައި ވާދަކުރުމަށް ނިންމި ނިންމުމުގެ ފަހަތުގައި ވެސް އެންމެ އިސްކޮށް ހުންނެވި ބޭފުޅާ އެވެ.
ނަތީޖާއެއްގެ ގޮތުން އިންތިހާބު ކާމިޔާބު ކުރެއްވުމަށްފަހު ސަރުކާރު ބަދަލުވި މަރުހަލާގައި އިންތިގާލީ އޮފީހުގެ އެންމެ އިސްވެރިޔާގެ މަގާމު ވެސް ފުރުއްވީ އަބްދުއްރަހީމް އެވެ. އަބްދުއްރަހީމްއަކީ މިހާރު ރައީސް މުއިއްޒުއަށް ހާއްސަ ލަފާ އަރުވާ، ސްޕެޝަލް އެޑްވައިޒަރެވެ.
ރައީސް ޔާމީން ޕީޕީއެމްއާއި ދުރަށް ވަޑައިގެންނެވިކަން ހާމަކުރައްވާފައިވާއިރު، އެމަނިކުފާނު އެ ނިންމެވުން ނިންމެވީ އެމަނިކުފާނުގެ މަޝްވަރާ ޕީޕީއެމްގެ ލީޑާޝިޕްގެ ބޭފުޅުން ނުނަންގަވާތީ ކަމަށާއި އެއީ ރައީސް ޔާމީނަށް ފަސޭހަ ނިންމުމެއް ނޫން ކަމަށް ޖަމީލްވަނީ މީގެ ކުރިން ވިދާޅުވެފައެވެ.





ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.