Saturday, 14 November 2026
Advertisement
STO — McCoy (leaderboard)
ޚަބަރު

ލާމަރުކަޒީ ޤާނޫނަށް ބަދަލުގެންނާނީ އެކަށީގެންވާ ދިރާސާތަކެއް ކުރުމަށްފަހު: މިނިސްޓަރު އާދަމް ޝަރީފު

ލާމަރުކަޒީ ޤާނޫނަށް ބަދަލުގެންނާނީ އެކަށީގެންވާ ދިރާސާތަކެއް ކުރުމަށްފަހު: މިނިސްޓަރު އާދަމް ޝަރީފު
ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނަށް އިޞްލާހު ގެންނަވާނީ އެކަމަށް އެކަށީގެންވާ ޢިލްމީ އަދި މިނިވަން ދިރާސާތަކެއް ކޮށްގެންކަމަށް ސިޓީތަކާއި އިދާރީ ދާއިރާތައް ހިންގުމާއި، ޢާންމު މަސައްކަތްތަކާ ބެހޭ މިނިސްޓަރު އާދަމް ޝަރީފް އުމަރު ވިދާޅުވެއްޖެއެވެ. ޕީއެސްއެމްގެ "ރާއްޖެމިއަދު" ޕްރޮގްރާމްގައި ވާހަކަ ދައްކަވަމުން މިނިސްޓަރު ވިދާޅުވީ، އެ ޤާނޫނަށް އިޞްލާޙް ގެނައުމަށް މިނިވަން ޢިލްމީ ދިރާސާއެއް ކުރައްވާނެކަމަށާއި އެ ޤާނޫނަށް މިހާތަނަށް ގެނެސްފައިވާ ގިނަ އިޞްލާހުތަކަކީ، ދިރާސާ ކުރުމެއްނެތި ވަގުތީ ޙައްލުތަކެއް ހޯދުމަށް ގެނެސްފައިވާ އިޞްލާހުތަކެއްކަމަށެވެ. މީގެ އިތުރުން، ދުނިޔޭގެ ގިނަ ޤައުމުތަކުގައި ޤާނުނު ހެދުމަކީ، އެކަންކަމާއި ގުޅޭ ގޮތުން ވަރަށް ބޮޑަށް ދިރާސާތައްކުރެވި، އެކަންކަމުން ނިކުންނާނެ ނަތީޖާއަށް ދެނެގަތުމަށްފަހު ގެންނަ ބަދަލުތަކެއްކަމަށާއި، ނަމަވެސް ރާއްޖޭގައި ގިނަފަހަރަށް ޤާނުނުތަކަށް އިޞްލާހު ހުށައަޅަނީ، ވަގުތީގޮތުން އޮތް މައްސަލައަކަށް އަވަސް ޙައްލެއް ބޭނުންވެގެންކަމަށް މިނިސްޓަރު ފާހަގަކުރެއްވިއެވެ. ހަމައެއާއެކު، އިދާރީ ދާއިރާތައް ލާމަރުކަޒު އުސޫލުން ހިންގުމުގެ ޤާނުނަށް ގެނެސްފައިވާ ބައެއް އިސްލާހުތައްވެސް ހުރީ ހަމަ އެގޮތަށް ވަގުތީ ހައްލެއް ގެނައުމަށްކަމަށާއި، މި ޤާނޫނަކީ، ރާއްޖޭގެ ހިންގުމުގެ ނިޒާމަށް އެންމެ މުހިންމު އެއް ޤާނުނުކަމަށް މިނިސްޓަރު ވިދާޅުވިއެވެ. އެގޮތުން، މި ޤާނޫނާއި ގުޅޭ ކަންކަން މިހާރަށްވުރެ ރަނގަޅަށް ހިނގައިގަންނަންޖެހޭކަމަށް ފާހަގަކުރައްވަމުން މިނިސްޓަރު އެންމެ މުހިންމު ކަމެއްގެ ގޮތުގައި ފާހަގަކުރެއްވީ، ލާމަރުކަޒީ ނިޒާމާއި، މިހާރު އޮތް ޤާނޫނާއި ގުޅޭ ދިރާސާއެއް ކުރިއަށްގެންދަންޖެހޭކަމެވެ. އެ ދިރާސާ ކުރިއަށްގެންދާނީ މިނިވަން މުސްތަޤިއްލުކަމާއިއެކު، ޢިލްމީ ދިރާސާއެއްގެ ގޮތުގައި ކަމަށާއި، އެގޮތުން މިހާރު ޤާނޫނުގައި ހުރި ކަންކަމާއި، އެކަންކަމާއި މެދު ކައުންސިލްތަކުން ދެކޭގޮތާއި، އެކަންކަން ތަންފީޒުކުރުމާށް ހުރި ގޮންޖެހުންތައް އަދި ލާމަރުކަޒީ ނިޒާމައި ގުޅިގެން އާންމުންގެ ޚިޔާލުވެސް ހޯއްދަވާނެކަމަށް އެމަނިކުފާނު ވިދާޅުވިއެވެ. ހަމައެއާއެކު، ޚިޔާލު ހޯދުމުގެ މަހާސިންތާތައް އެ ވުޒާރާއިން އިސްނަގައިގެން ބާއްވާނެކަމަށާއި އެ ދިރާސާތަކަށް ބެއްލެވުމަށްފަހު، އިސްލާޙު ގެންނަން ފެންނަ ދާއިރާތަކުން އިސްލާހު ހުށައަޅުއްވާނެކަމަށް އެބޭފުޅާ ވިދާޅުވެފައެވެ.
"މި ދިރާސާގެ ބޭނުމަކަށްވާނީ ލާމަރުކަޒީ ނިޒާމުގެ މިސްރާބު މިދަނީ ރަނގަޅަށްތޯ ބެލުން. ދިރާސާ ކުރިއަށް ގެންދާނީވެސް، ސިޔާސީ ވިސްނުން ނުހިމެނޭ، ދިވެހި ޔުނިވަރސިޓީތަކުގެ އެކަޑަމިކް ދިރާސާއެއްގެ ގޮތުގައި. އަޅުގަނޑުމެން މިކަމަށް ފާޑުކިއުމެއް ނެތި." މިނިސްޓަރު އާދަމް ޝަރީފު ޢުމަރު ވިދާޅުވިއެވެ.
މީގެ އިތުރުން މިނިސްޓަރު ވިދާޅުވީ، ރައީސް މުޢިއްޒުގެ ސަރުކާރަކީ ރައްޔިތުންގެ އަޑުއަހާ، ހެޔޮ ބަދަލުތަކެއް ގެންނާނެ ސަރުކާރެއް ކަމަށާއި އެހެންކަމުން އިސްލާހުތައްވެސް ގެންނަވާނީ، ރައްޔިތުންގެ އަޑު އަހާ، ޚިޔާލާއި މަޝްވަރާއާއިއެކުކަމަށެވެ. އަދި ކުރިއަށް އޮތް މަހުގެ ތެރޭގައި، ކައުންސިލްތަކާއެކު މަޝްވަރާ ބައްދަލުވުންތަކެއް ކުރިއަށްގެންދަވާނެކަމަށްވެސް އެބޭފުޅާ ވިދާޅުވިއެވެ. "އަންނަ މަހުގެ 15 ގެ ކުރިން، ރާއްޖޭގެ ދެކުނާއި އުތުުގެ އަދި މެދުރާއްޖެތެރޭގެ އަތޮޅުތަކުގެ ކައުންސިލްތަކަށް ޚާއްސަކޮށް މަހާސިންތާއެއް ބާއްވާނަން. އެއަށްފަހު ކައުންސިލްތަކުން ހުށައަޅާ ޚިޔާލުތައް ރައީސްއާއި، ބަންޑާރަ ނައިބަށް ހުށައަޅާނަން." މިނިސްޓަރު އާދަމް ޝަރީފު ޢުމަރު ވިދާޅުވިއެވެ.

ރިއެކްޝަން

Advertisement
Ooredoo — Truecaller (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.