ޗާގޯސް މައްސަލާގައި ރާއްޖެއަށް ގެއްލުނު ސަރަހައްދު ހޯދުމުގެ މަސައްކަތް އަވަހަށް ފެށުމަށް ގާސިމް ގޮވައިލައްވައިފި

ޗާގޯސް މައްސަލާގައި ރާއްޖެއަށް ގެއްލުނު ސަރަހައްދު ހޯދުމުގެ މަސައްކަތް އަވަހަށް ފެށުމަށް ގާސިމް ޖުމްހޫރީ ޕާޓީގެ ލީޑަރު ގާސިމް އިބްރާހިމް ސަރުކާރަށް ގޮވައިލައްވައިފިއެވެ.
އެކްސްގައި ގާސިމް މިރޭ ކުރެއްވި ޕޯސްޓެއްގައި ވިދާޅުވީ އިނގިރޭސި ދައުލަތުން ޗާގޮސް އެކިޕެލާގޯ، މޮރިޝަސް އާއި ހަވާލު ކުރުމަށް ކުރިން ނިންމި ނިންމުން ބަދަލު ކުރިކަން އެ ޤައުމުގެ ނޫސްތަކުގައި ރިޕޯޓް ކޮށްފައިވާކަމަށެވެ.
އެހެންކަމުން މި ދަނޑިވަޅުގައި، އިޓްލޮސް ގެ ނިންމުމާއި އެކު ރާއްޖެއާއި ޗާގޮސްގެ މައްސަލައިގައި ދިވެހީންނަށް ގެއްލިފައިވާ ސަރަހައްދު ހޯއްދަވައިދެއްވުމަށް ވިސްނުންތެރިކަމާއެކު ވީހާވެސް ހަލުވިކޮށް މަސައްކަތްޕުޅު ފައްޓަވައިދެއްވުން އެދި ދިވެހިރާއްޖޭގެ ރައީސުލްޖުމްޙޫރިއްޔާ ޑރ. މުޙައްމަދު މުއިއްޒުގެ އަރިހުގައި ދަންނަވާ ކަމަށް ގާސިމް ވިދާޅުވިއެވެ.
“ ޚާއްޞަކޮށް ރައީސް ޑރ. މުޢިއްޒުވަނީ އެމަނިކުފާނުގެ ކެންޕޭނުގައި، ވެރިކަމަށް ވަޑައިގެންފިނަމަ ސަރުކާރުގެ ފުރަތަމަ 100 ދުވަހުގެ ތެރޭގައި އެ މައްސަލަ އިސްތިއުނާފަށް ވައްދާނެކަމަށްވެސް ވަޢުދުވެވަޑައިގެންފަ” ގާސިމް ވިދާޅުވިއެވެ.
ގާސިމް ވިދާޅުވީ މިމައްސަލަ އަކީ ފާއިތުވި ރިޔާސީ އިންތިޚާބުގައި ހައްލު ހޯދުމުގެ ޢަޒުމުގައި ވަރަށް ބޮޑަށް ވަކާލާތު ކުރި ޤައުމީ މައްސަލައެއް ކަމަށެވެ. އަދި އިނގިރޭސި ދައުލަތުން ފަހުން ނިންމާފައިވާ ނިންމުމުގެ ސަބަބުން ދިވެހީން ޒަމާނުއްސުރެ މަސްވެރިކަންކުރަމުންއައި ކަނޑުގެ ސަރަޙައްދު އަލުން ދިވެހީންނަށް ފުރިހަމައަށް ލިބުމުގެ ފުރުޞަތު ބޮޑުވެފައިވާ ކަމަށް ގާސިމް ވިދާޅުވިއެވެ.
އިނގިރޭސި ދައުލަތާއިއެކު އަވަސް މަޝްވަރާތަކެއް ފައްޓަވާ ޒަމާނުއްސުރެ ދިވެހީން ގެންގުޅެމުން އައި ސްޓޭންޑް ދަމަހައްޓަވާ މި ކަމުގައި ދިވެހީންނަށް ކާމިޔާބު ހޯއްދަވައިދެއްވުމަށް ރައީސް ޑރ. މުޢިއްޒު މަސައްކަތްޕުޅު ކުރައްވާނޭކަމަށް ޔަޤީން ކުރައްވާ ކަމަށާއި މި މަސައްކަތުގައި ދެވެން އޮތް ކޮންމެ އެހީތެރިކަމަކާއި އެއްބާރުލުމެއް ދިނުމަށް އެމަނިކުފާނާއި ޕާޓީން ތައްޔާރަށް އޮތް ކަމަށް ވެސް ގާސިމް ވިދާޅުވިއެވެ.






ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.