މޫސުމީ ބަދަލުތަކަށް ޙައްލު ހޯދުމަށް ވަކާލާތު ކުރުމަކީ މުހިންމު ކަމެއް: ޠާރިޤް
މޫސުމީ ބަދަލުތަކާއި މެދު ހޭލުންތެރި ވުމަށާއި މޫސުމީ ބަދަލުތަކަށް ޙައްލު ހޯދުމަށް ވަކާލާތު ކުރުމަކީ މުހިންމު ކަމެއް ކަމަށް މިނިސްޓަރ އޮފް ކްލައިމެޓް ޗޭންޖް، އެންވާރަމަންޓް އެންޑް އެނަރޖީ ޠާރިޤް އިބްރާހީމް ވިދާޅުވެއްޖެއެވެ.
މިނިސްޓަރ ޠާރިޤް މިހެން ވިދާޅުވީ ކްލައިމެޓް ޗޭންޖް ޑިޕްލޮމަސީ ލީޑަރޝިޕް އެންޑް ރެސިލިއެންސް ޕްރޮޖެކްޓްގެ ނިންމުމަށް ބޭއްވި ރަސްމިއްޔާތު ޝަރަފްވެރި ކުރައްވާ ދެއްކެވި ވާހަކަފުޅުގައެވެ.
ޠާރިގު ވިދާޅުވީ މޫސުމީ ބަދަލުތަކާއި ބެހޭ ގޮތުން ރާއްޖެ ވަކާލާތު ކުރަމުން އަންނަތާ އެތަށް އަހަރެއް ވެފައިވާއިރު، އޭގެން ނަތީޖާ ފެންނަން ފެށީ، 2015ވަނަ އަހަރު ދުނިޔޭގެ އެތަށް ޤައުމެއް އެއްބައިވެ، ޕެރިސްގައި އެކުލަވާލެވުނު މުޢާހަދާއަށް ފަހު ކަމަށެވެ.
ހަމަ އެހެންމެ އޭގެ 8 އަހަރުފަހުން، ނިމިގެންދިޔަ ކޮޕް28 ސަމިޓްގައި ގްލޯބަލް ސްޓޮކްޓޭކަކަށް ޤައުމުތަކަށް އެއްބަސްވެވި، އެއަށް ޢަމަލީ މަސައްކަތް ފެށިފައިވާ ކަމަށްވެސް މިނިސްޓަރ ފާހަގަކުރެއްވިއެވެ.
މިނިސްޓަރ ވިދާޅުވީ ދުނިޔޭގެ ތަރައްޤީވެފައިވާ ޤައުމުތަކާއި އަޅާބަލާއިރު، ރާއްޖެއިން ޖައްވަށް ބޭރުކުރާ ނުރައްކާތެރި މާއްދާގެ މިންވަރަކީ 0.0035 އިންސައްތަ ކަމަށެވެ.
އެ އަދަދަކީ ކުޑަ އަދަދަކަށްވީ ނަމަވެސް، ރާއްޖެއިން މަސައްކަތް ކުރާނީ މޫސުމީ ބަދަލުތަކަށް ހައްލު ހޯދުމަށް އެހެން ޤައުމުތަކަށް ނަމޫނާ ދައްކާ ބަޔަކަށް ވުމަށް ކަމަށްވެސް މިނިސްޓަރ ވިދާޅުވިއެވެ.
އެގޮތުން މިނިސްޓަރ ވަނީ ސަރުކާރުން އިއުލާންކޮށްފައިވާ އިޔާދަކުރުވަނިވި ހަކަތައިގެ މަޝްރޫޢުތަކަށް އަލިއަޅުއްވާލައްވާފައެވެ.
މިފަދަ މުހިއްމު މަސައްކަތްތައް ކުރިއަށްދާއިރު، ޑިޕްލޮމަސީ އާއި ވަކާލާތު ކުރުމާއި، ތަރައްޤީވެފައިވާ ޤައުމުތަކުން ރާއްޖެފަދަ ޖަޒީރާ ތަރައްޤީ ވަމުން އަންނަ ޤައުމުތަކަށް އެހީތެރިވެދިނުމުގެ މުހިންމުކަން މިނިސްޓަރ ޠާރިޤް ވަނީ ފާހަގަކުރައްވާފައެވެ.
ކްލައިމެޓް ޗޭންޖް ޑިޕްލޮމަސީ ލީޑަރޝިޕް އެންޑް ރެސިލިއެންސް ޕްރޮޖެކްޓަކީ ޔޫރަޕިއަން ޔޫނިއަން އިން ފަންޑްކޮށްގެން ދިވެހިރާއްޖޭގެ ޤައުމީ ޔުނިވަރސިޓީގައި މޫސުމީ ބަދަލުތަކާއި ބެހޭ ގޮތުން ކެޕޭސިޓީ އިތުރުކުރުމަށް ހިންގި މަޝްރޫއެކެވެ.
ބެލްޖިއަމްގެ ޔުނިވަރސިޓީ އޮފް ލިއެޖް، ސްލޮވާކިޔާގެ ޔުނިވަރސިޓީ އޮފް އިކޮނޮމިކްސް އޮފް ބްރަޓިސްލާވިއާ، ފްރާންސްގެ ޔުނިވަރސިޓީ ޕެރިސް ސީޓޭ އާއި އެމްއެންޔޫ ގުޅިގެން ކުރިއަށް ގެންދިޔަ މި މަޝްރޫޢުގެ ދަށުން، މޫސުމީ ބަދަލުތަކާއި ބެހޭ ޑިގްރީއެއް އެމްއެންޔޫއަށް ތަޢާރަފްވެގެންދިޔައެވެ. މީގެ އިތުރުން މަޢުލޫމާތު ބަދަލުކުރުމުގެ އެތަށް ޕްރޮގްރާމްތަކެއްގައި ހަތަރު ޔުނިވަރސިޓީން ވަނީ ބައިވެރިވެފައެވެ.
