ފައިލޭރިޔާއަށް ފަރުވާދޭން މަދުވާ ބޭސް ގެންނަނީ

ރާއްޖެއިން ނައްތާލެވިފައިވާ ކަމަށް ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯ އިން އިއުލާންކޮށްފައިވާ، ފައިލޭރިޔާ ނުވަތަ ފައިފަލަ ބަލީގެ ފަރުވާއަށް ދެވޭ ބޭސްތަކުގެ ތެރެއިން އެއް ބާވަތުގެ ބޭސް މި ވަގުތު ރާއްޖެއިން ލިބެން ނެތް ކަމަށް ހެލްތް މިނިސްޓްރީން ބުނެފިއެވެ.

Ads by STELCO

ރޭ، ޕީއެސްއެމްގެ ''ރާއްޖެ މިއަދު'' ޕްރޮގްރާމްގައި ފައިލޭރިޔާ ބައްޔާ ގުޅޭ މައުލޫމާތު ހިއްސާކުރަމުން ހެލްތު މިނިސްޓްރީގެ ޑިރެކްޓާ ޖެނެރަލް އޮފް ހެލްތު ސާވިސަސް ޑރ. އަހްމަދު އަޝްރަފް ވިދާޅުވީ، އާއްމު ގޮތެއްގައި ފައިލޭރިޔާއަށް ޕޮޒިޓިވްވާ މީހުންނަށް ދެނީ ތިން ވައްތަރެއްގެ ބޭހެއް ކަމަށެވެ. އެ ބޭސްތަަކަކީ، ޑައިހީތަލް ކާބަމެޒިން، އިވަމެކްޓިން އަދި އަލްބެންޑަޒޯލް ބޭސް ކަމަށް އަޝްރަފް ވިދާޅުވިއެވެ. އޭނާ ވިދާޅުވި ގޮތުގައި އެ ތިން ބޭސް އެއްފަހަރާ ދިނުމުން ބައްޔަށް ފަަރުވާދެވޭ މިންވަރު އަވަސްވެގެންދެއެެވެ.

އެކަމަކު އޭގެ ތެރެއިން އެއް ބޭސް މި ވަގުތު ރާއްޖެއިން ލިބެން ނެތް ކަމަށާއި އެ ބޭސް ހޯދުމުގެ މަސައްކަތް ކުރަވެމުންދާ ކަމަށް ވިދާޅުވިއެވެ. ނަމަވެސް އެ ތިން ބޭހުގެ ތެރެއިން މި ވަގުތު ރާއްޖޭގައި ނެތީ ކޮން ބޭހެއް ކަމެއް ސީދާ ވިދާޅެއް ނުވެއެވެ.

 ބޭހަކީ ވަރަށް މުހިއްމު އެއްޗެއް. އަޅުގަނޑުމެން މިހާރު ބޭސް ހޯދުމަށްޓަކައި ވަނީ ޑަބްލިއުއެޗްއޯ ގައި ވެސް ރިކުއެސްޓް ކޮށްފައި، އަދި ފޮރިން މިނިސްޓްރީ މެދުވެރިކޮށް ބޭސް ހޯދުމުގެ މަސައްކަތް މިހާރު ވަނީ ފަށާފައި

އޭނާ ވިދާޅުވީ ބޭސް ދިނުމުން 'ޑިޒީޒް ޕްރޮގްރެޝަން' ކޮންޓްރޯލް ކުރެވޭނެ ކަމަށާއި، އޭގެ ސަބަބުން ބަލީގައި އިތުރަށް ބޮޑުވަރުވުމުން ސަލާމަތްކުރެވޭނެ ކަމަށެވެ. ބަލިޖެހިފައި ހުރިކަން ކުރިއާލާއި އެނގުން މުހިއްމު ކަމަށާއި ނަމަވެސް ބޭސް ދޭން ފެށުމުން ލިބިފައި ހުރި ގެއްލުމެއް އިޔާދަ ނުކުރެވޭނެ ކަމަށް ވިދާޅުވިއެވެ.

އެ ބަލި ރާއްޖެއިން ޖެހިފައިވާ މީހުންގެ ހާލަތާއި ގުޅޭ ގޮތުން އެ ޕްރޮގްރާމް ގައި ސުވާލުކުރުމުން އަޝްރަފް ވިދާޅުވީ އެ ބައްޔަކީ މީހުންނަށް މާ ބޮޑުވަރު ވެގެންދާ ބައްޔެއް ނޫން ކަމަށާއި ނަމަވެސް ބަލީގައި ދިމާވާ ކަންތައްތަކުގެ ސަބަބުން ދިގު މުއްދަތަކަށް އުދަނގޫތަކަކާއި އެކު އުޅެން ޖެހޭ ކަމަށެވެ. އެއަށް ފަހު ކިޔަދެއްވީ ފައިލޭރިޔާ ޖެހުމުން ދިމާވާ ކަންތައްތަކެވެ.

ބަލީގެ ސަބަބުން ލިމްފެޓިކް ސިސްޓަމް ބްލޮކްވަނީ، އޭގެ ސަބަބުން ފައިދުޅަވެ ބަރުހެލިވެ އޭގެ ސަބަބުން ހިނގައި ބިގާވެ އުޅެން ދަތިވަނީ، ބައެއް ފަހަރަށް މި ބަލީގައި  އެއް ފައިވެސް ދުޅަވެދާނެ ނޫނީ ދެފައިވެސް ދުޅަވެދާނެ ނޫނީ ހަތަރެސްފައިވެސް ދުޅަވެދާނެ. އެ މީހުންގެ ކޮލިޓީ އޮފް ލައިފް ނިކަމެތިވެގެންދޭ

އަޝްރަފް ވިދާޅުވީ ބަލިޖެހޭ މީހުންނަށް ދޮށީ އުމުރުގައި ހެލިފެލިވެ އުޅެން ދަތިތަކެއް ކުރިމަތިވުމާއި، އޭގެ ސަބަބުން ސްޓިގްމާ އުފެދުން ފަދަ ކަންކަން ހިމެނޭ ކަމަށެވެ. ބަލިޖެހިފައިވާ މީހުންނަށް ބޭސްފަރުވާގެ އިތުރުން ކައުންސިލިން އާއި އެހީތެރިކަންވެސް ބޭނުންވެއެވެ. ރާއްޖެއިން ޕޮޒިޓިވްވި މީހުންނަކީ ޒުވާނުން ކަމަށާއި، އެ މީހުންނަށް އެހާބޮޑު ސީރިޔަސް ކަމެއް ނެތް ކަމަށް ވިދާޅުވިއެވެ.

ހެލްތް މިނިސްޓްރީގެ ޕަބްލިކް ހެލްތް ކޯޑިނޭޓާ މުހައްމަދު ހަމްޒަތު ވިދާޅުވީ ބަލީގެ އަލާމަތްތައް ފެންނަނީ ދިގު މުއްދަތެއް ފަހުން ކަމަށާއި، ޕޮޒިޓިވްވާކަން އެނގޭ ހިސާބުން އެ މީހަކަށް ބޭސް ދިނުމުގެ ކަންކަން ކުރިއަށްދާ ކަމަށެވެ.